2 Jun 2025 - (Ethnic language program-Matupi) by The Matupi Times

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဇွန်လ ( ၂ ) ရက်နေ့ ရပြည်တွင်းသတင်းမျာ

📌📌 ၁/ အိန္ဒိယနိုင်ငံတွင် တရားမဝင်နေထိုင်သူများကို မူရင်းနိုင်ငံပြန်ပို့ရန် ဆောင်ရွက်နေကြောင်း India For Myanmar ထုတ်ပြန်

The Matupi Times ၊ မေလ ၃၀ ၊ ၂၀၂၅

အိန္ဒိယနိုင်ငံ နယူးဒေလီတွင် အစိုးရအပြောင်းအလဲ ဖြစ်ပြီးနောက် တရားမဝင်ရွှေ့ပြောင်းနေထိုင်သူများကို ဖော်ထုတ်ပြီး ၎င်းတို့၏ မူရင်းနိုင်ငံကို ပြန်လည်ပို့ဆောင်ရန် စနစ်တကျ ဆောင်ရွက်နေသည်ဟု သိရသည်။

အဆိုပါကိစ္စနှင့်ပတ်သက်၍ India For Myanmar အဖွဲ့က မြန်မာဒုက္ခသည်များ သတိထားနေထိုင်ကြဖို့ ယမန်နေ့ မေလ ၂၉ ရက်နေ့တွင် အသိပေး ထုတ်ပြန်ခဲ့သည်။

အထူးသဖြင့် ပါကစ္စတန်နှင့် အိန္ဒိယအကြား ပဋိပက္ခ ဖြစ်ပြီးနောက်ပိုင်း တရားမဝင်နေထိုင်သည့် နိုင်ငံခြားသားများကို ပိုမိုတင်းကြပ်စွာ ကိုင်တွယ်လာပြီး ရိုဟင်ဂျာနှင့် ဘင်္ဂလားဒေ့ရှ် နိုင်ငံသားများကို ပြန်လည်ပို့ဆောင်ခံရမှုများကို စတင်ကြုံနေရပြီဖြစ်သည်ဟု ဆိုသည်။

အိန္ဒိယရှိ UNHCR ရုံးက ဒုက္ခသည်များ၏ အချက်အလက်များကိုလည်း အိန္ဒိယအစိုးရထံ လွှဲပြောင်းပေးထားသည်ဟု ဆိုသည်။ ထို့ကြောင့် အိန္ဒိယအစိုးရ၏ ပစ်မှတ်ထားခံရနိုင်သူဟု ကိုယ်တိုင်သတ်မှတ်ပါက UNHCR ရုံးတွင် စာရင်းသွင်းခဲ့သည့် လိပ်စာ၌ ဆက်လက်နေထိုင်ခြင်းကို ရပ်ဆိုင်း၍ အခြားဘေးကင်းသည်ဟု ယုံကြည်သောနေရာများတွင် ယာယီခိုလှုံနေထိုင်ကြဖို့ အကြံပြုထားသည်။

ထို့အပြင် အိန္ဒိယအစိုးရ၏ တရားဝင်အထောက်အထားမရှိဘဲ ခရီးသွားလာခြင်း မပြုလုပ်ကြရန်၊ ဒုက္ခသည်များအနေဖြင့် UNHCR မှ ထုတ်ပေးထားသည့် ဒုက္ခသည်အထောက်အထားကဒ် (UN Card)၊ စာရွက်စာတမ်းများကို အမြဲဆောင်ထားရန်နှင့် ပစ်မှတ်ထားခံရနိုင်ခြေ နည်းသောအဖွဲ့ဝင်များအနေဖြင့် မလိုအပ်ဘဲ စိုးရိမ်ခြင်း၊ အထောက်အထားမခိုင်လုံဘဲ ရှောင်ထွက်ခြင်း မပြုလုပ်ကြရန် India For Myanmar မှ အသိပေး ထုတ်ပြန်ထားသည်။

အိန္ဒိယနိုင်ငံ နယူးဒေလီမြို့၌ မြန်မာနိုင်ငံမှ စစ်ဘေးရှောင် တစ်သောင်းကျော်ခန့် ရှိပြီး ၎င်းအနက် ၃၀၀၀ ကျော်မှာ UNHCR မှ အသိမှတ်ပြုထားသည့် UN Card ကိုင်ဆောင်ထားသူများဖြစ်သည်ဟု သိရသည်။

 

========================

 

📌📌 ၂/ မတူချင်းဓမ္မအမှုတော်ဆောင်များဦးဆောင်သည့် ငြိမ်းချမ်းရေးကော်မတီမှ CDF-Matupi တပ်မဟာ (၂) ခုနှင့် တွေ့ဆုံဆွေးနွေး၊ အချင်းချင်း ပစ်ခတ်တုံ့ပြန်မှု မပြုရန် သဘောတူညီမှုရရှိ

The Matupi Times ၊ မေလ ၃၁ ၊ ၂၀၂၅

မတူချင်းဓမ္မအမှုတော်ဆောင်များမှ ဦးဆောင်သည့် ငြိမ်းချမ်းရေးကော်မတီ (Peace Maker) မှ CDF-Matupi တပ်မဟာ (၁) နှင့် တပ်မဟာ (၂) တို့အကြား အချင်းချင်း သင့်မြတ်မှုရရှိရေးအတွက် တွေ့ဆုံဆွေးနွေးမှု ပြုလုပ်ခဲ့သည်ဟု သိရသည်။

ဆွေးနွေးမှုကို Matu Chin Ministry Fellowship (MCMF)၊ Matupi Revolution Organization (MRO)/CDF-Matupi နှင့် CDF-Matupi တပ်မဟာ (၂) ငြိမ်းချမ်းရေးကော်မတီ ရပ်မိရပ်ဖများ သုံးပွင့်ဆိုင် ဆွေးနွေးခဲ့ကြပြီး အချက် (၈) ချက်ကို သဘောတူညီ လက်မှတ်ရေးထိုးခဲ့ကြသည်ဟု သိရသည်။

နှစ်ဖက်အဖွဲ့များအနေဖြင့် အချင်းချင်း လက်နက်ဖြင့် ပစ်ခတ်တုံ့ပြန်မှု မပြုလုပ်ရန် သဘောတူခဲ့ကြသည့်အပြင် (Non-CDM) နှင့် စစ်ကောင်စီထောက်ခံအားပေးသည့် (ဒလန်) များမှအပ အရပ်သားပြည်သူများအား လွတ်လပ်စွာ သွားလာခွင့်ပြုရန်၊ (NGO, INGO, IDP) တို့မှ ပံ့ပိုးမှုများကိုလည်း လွတ်လပ်စွာ သွားလာခွင့်ပြုရန် စသောအချက်များကို သဘောတူခဲ့ကြသည်။

ထို့အပြင် ပြည်သူများ ဝင်ရောက်နေထိုင်ခြင်းမရှိသေးသည့် မတူပီမြို့နယ် ငလိုင်ကျေးရွာတွင် ၂၀၂၅ ခုနှစ် ဇွန်လ (၁၀) ရက်နေ့အထိ နှစ်ဖက် ပူးပေါင်းဆွေးနွေးကာ မိုင်းရှင်းလင်းရေးလုပ်ငန်း ဆောင်ရွက်ပေးရန်၊ ရွာထဲ ဒေသခံပြည်သူများ ပြန်လည်နေထိုင်နိုင်ရေး ဆောင်ရွက်ပေးရန် သဘောတူခဲ့ကြသည်ဟု ဆိုသည်။

ဆက်လက်၍ နှစ်ဖက်ငြိမ်းချမ်းရေး တည်မြဲစေရန်အတွက် ကော်မတီတစ်ရပ် ဖွဲ့စည်းရန်၊ လူမျိုးရေး၊ ပုဂ္ဂိုလ်ရေး ထိခိုက်စေသော အသုံးအနှုန်းများကို ရှောင်ရှားရန်နှင့် ကာကွယ်ရေးဆိုင်ရာ ဆောင်ရွက်ရမည့် ကိစ္စရပ်များကို သဘောတူညီကာ လေးစားမှုနှင့်အတူ ဆောင်ရွက်သွားရန်လည်း သဘောတူခဲ့ကြသည်။

ငြိမ်းချမ်းရေးကော်မတီ (Peace Maker) ကို မီဇိုရမ်ရှိ မတူချင်းဓမ္မအမှုတော်ဆောင်များက CDF-Matupi တပ်မဟာ (၁) နှင့် (၂) အကြား သင့်မြတ်မှုရရှိရေးအတွက် ၂၀၂၄ ခုနှစ် ဇူလိုင် ၁၉ ရက်နေ့တွင် စတင်ဖွဲ့စည်းခဲ့ခြင်း ဖြစ်သည်။

ကော်မတီဖွဲ့ပြီးနောက် ၂၀၂၄ ခုနှစ် အောက်တိုဘာလတွင် ပထမအကြိမ် ဆွေးနွေးညှိနှိုင်းမှု ပြုလုပ်ခဲ့ပြီး၊ ယခု ၂၀၂၅ ခုနှစ်တွင် ဒုတိယအကြိမ် ထပ်မံ ဆွေးနွေးကြပြီးနောက် အချက် (၈) ချက်ကို သဘောတူခဲ့ကြသည်။

Chinland Defense Force - Matupi၊ တပ်မဟာ (၁) ကို Chin Defense Force Matupi ဟု အမည်ပြောင်းလဲခဲ့ပြီး ၂၀၂၅ ခုနှစ် ဧပြီလ ၂-၃ ရက်နေ့က ကျင်းပခဲ့သည့် အထွေထွေအစည်းအဝေးတွင် ထုတ်ပြန်ခဲ့သည်။

ထို့အပြင် Matupi Revolutionary Organization – MRO (မတူပီတော်လှန်ရေးအဖွဲ့ချုပ်) ကိုလည်း CDF-Matupi တပ်ဖွဲ့ဝင်များ အားလုံး ပါဝင်သော အထွေထွေအစည်းအဝေးကြီးမှ တော်လှန်ရေးအဖွဲ့ချုပ်အဖြစ် သဘောတူဖွဲ့စည်းခဲ့ကြောင်း CDF-Matupi တပ်မဟာ (၁) က ဧပြီလ ၁၀ ရက်နေ့တွင် သတင်းထုတ်ပြန်ခဲ့သည်။

 

========================

 

📌📌 ၃/ မီဇိုရမ်မှာ မိုးသည်းထန်စွာ ရွာသွန်းမှုကြောင့် လောင်တလိုင်မြို့က နေအိမ် (၅) လုံးနှင့် ဟိုတယ် (၁) လုံး ပြိုကျ၊ ဟိုတယ်ပြိုကျမှုမှာ ပိတ်မိနေသူ (၆) ဦးကို ကယ်ထုတ်နိုင်ခဲ့

The Matupi Times ၊ မေလ ၃၁ ၊ ၂၀၂၅

မီဇိုရမ်ပြည်နယ်၊ လောင်တလိုင်မြို့မှာ မိုးသည်းထန်စွာ အဆက်မပြတ် ရွာသွန်းမှုကြောင့် ယမန်နေ့ညပိုင်းက နေအိမ် (၅) လုံးနှင့် ဟိုတယ် (၁) လုံး ပြိုကျပျက်စီးသွားပြီး ဟိုတယ်ပြိုကျမှုကြောင့် ပိတ်မိနေတဲ့သူ (၆) ဦးကို ကယ်ထုတ်နိုင်ခဲ့တယ်လို့ သိရပါတယ်။

အဆိုပါဖြစ်စဉ်မှာ ယမန်နေ့ (သောကြာနေ့) ည ၁၀ နာရီ ၃၀ မိနစ်ခန့်က ဘဇားရ်ရပ်ကွက် (Bazar Veng) နှင့် ချန်းမာရီးရပ်ကွက် (Chandmary) မှာ ဖြစ်ပွားခဲ့တာပါ။

ကယ်ထုတ်ခဲ့တဲ့သူတွေဟာ ဟိုတယ်မှာ တည်းနေတဲ့ မြန်မာနိုင်ငံသားတွေ ဖြစ်နိုင်ကြောင်း မီဇိုရမ်သတင်းက ဖော်ပြပါတယ်။ ပြိုကျပျက်စီးသွားတဲ့ ဟိုတယ်ဟာ မြန်မာနိုင်ငံသားတွေ တည်းခိုလေ့ရှိတဲ့ ဟိုတယ်ဖြစ်တယ်လို့လည်း သိရပါတယ်။

မီဇိုရမ်ပြည်နယ်တွင် ယမန်နေ့သောကြာနေ့ (မေလ ၃၀ ရက်၊ ၂၀၂၅ ခုနှစ်) မှ စတင်၍ မိုးသည်းထန်စွာ ရွာသွန်းနေပြီး နေရာအများအပြားတွင် မြေပြိုမှုများ ဖြစ်ပွားနေတယ်လို့ သိရပါတယ်။ မီဇိုရမ်အစိုးရအနေဖြင့်လည်း မေလ ၃၀ ရက်နေ့မှ လာမည့် ဇွန်လ ၃ ရက်နေ့အထိ မီဇိုရမ်ပြည်နယ်အတွင်း မိုးသည်းထန်စွာ ရွာသွန်းပြီး လေပြင်းမုန်တိုင်း တိုက်ခတ်နိုင်တာကြောင့် သတိထားနေထိုင်ဖို့ အသိပေးကြေညာထားပါတယ်။

အရေးပေါ်ကယ်ဆယ်ရေးလုပ်ငန်းတွေကို Young Lai Association (YLA)၊ State Disaster Response Force (SDRF) နှင့် 3rd Indian Reserve Battalion တို့က ပူးပေါင်းဆောင်ရွက်နေတယ်လို့ သိရပါတယ်။

ယခုရက်ပိုင်းအတွင်း မီဇိုရမ်ပြည်နယ်တဝန်းမှာ မိုးအဆက်မပြတ် ရွာသွန်းပြီး ရေကြီးမှု၊ မြေပြိုကျမှုတွေ ဖြစ်ပွားနေပါသည်။ မြေပြိုမှုတွေကြောင့် ထိခိုက်ဒဏ်ရာရသူနှင့် သေဆုံးသူတွေလည်း ရှိနေတယ်လို့ ဒေသခံသတင်းတွေအရ သိရပါတယ်။

 

========================

 

📌📌 ၄/ မလေးရှားနိုင်ငံမှာ မြန်မာနိုင်ငံသား ၁၀၀၀ ကျော် အဖမ်းခံရ

The Matupi Times ၊ မေလ ၃၁ ၊ ၂၀၂၅

မလေးရှားနိုင်ငံ၊ ဆလန်ဂေါပြည်နယ်၊ ဆလာယန်းမြို့မှာ သက်ဆိုင်ရာဌာနတွေပူးပေါင်းပြီး မေလ ၂၉-၃၀ ရက်နေ့အတွင်း အော်ပရေးရှင်း ဝင်ရောက်စစ်ဆေးခဲ့ရာ အထောက်အထားမဲ့ နိုင်ငံခြားသား ၁၄၀၀ ကျော် ဖမ်းဆီးထိန်းသိမ်းခံရကြောင်း သိရပါတယ်။

ဆလာယန်းနယ်မြေတွင် မြန်မာရွှေ့ပြောင်းလုပ်သားများ အများအပြား နေထိုင်လျက်ရှိရာ ယခုဖမ်းဆီးခံရမှုတွင်လည်း မြန်မာနိုင်ငံသားများ အများဆုံး ဖြစ်ကြောင်း သိရပြီး ဖမ်းဆီးခံရသူများထဲတွင် မြန်မာနိုင်ငံသား ၁၂၂၂ ဦး၊ ဘင်္ဂလားဒေ့ရှ်နိုင်ငံသား ၁၄၂ ဦး၊ အိန္ဒိယနိုင်ငံသား (၉) ဦး၊ အင်ဒိုနီးရှားနိုင်ငံသား (၄) ဦးနှင့် နီပေါနိုင်ငံသားများပါဝင်ကြောင်း သိရပါတယ်။

မလေးရှားနိုင်ငံ ဆလာယန်းနယ်မြေတွင် ဌာနပေါင်းစုံ (၇) ခုမှ အော်ပရေးရှင်း ဝင်ရောက်စစ်ဆေးခဲ့ခြင်း ဖြစ်ပြီး ဖမ်းဆီးခံထားရသူတွေကို လဝကဥပဒေဖြင့် အရေးယူနိုင်ရန် ဆောင်ရွက်နေတယ်လို့ သိရပါတယ်။

========================

 

📌📌 ၅/ CDF-Matupi တပ်မဟာ (၂) ကို Chinland Defense Force-Matupi အဖြစ် အမည်ပြောင်းလဲ၊ (၄) နှစ်တာကာလအတွင်း ရဲဘော် (၁၄) ဦး ကျဆုံးပြီး၊ (၄၀) ကျော် ထိခိုက်ဒဏ်ရာ ရရှိဟုဆို

The Matupi Times၊ မေလ ၃၁၊ ၂၀၂၅

Chinland Defense Force-Matupi တပ်မဟာ (၂) ၏ အမည်ကို Chinland Defense Force-Matupi အဖြစ် ပြောင်းလဲအတည်ပြုလိုက်ကြောင်း ဒီကနေ့ မေလ ၃၁ ရက်နေ့တွင် သတင်းထုတ်ပြန်ခဲ့သည်။

ချင်းလန်းကာကွယ်ရေးတပ်ဖွဲ့ - မတူပီ (၄) နှစ်ပြည့်အထိမ်းအမှတ် နှင့် တပ်မဟာ (၂) ဒုတိယအကြိမ် ညီလာခံကို ၂၀၂၅ ခုနှစ် မေလ ၂၈ မှ ၂၉ ရက်အထိ (၂) ရက်တာ ကြာမြင့်စွာ ကျင်းပပြုလုပ်ခဲ့ပြီး၊ Chinland Defense Force-Matupi တပ်မဟာ (၂) ၏ အမည်၊ အမှတ်တံဆိပ်၊ ရုံးတံဆိပ်တို့အား ပယ်ဖျက်ကာ Chinland Defense Force-Matupi အဖြစ် ပြန်လည်အတည်ပြုကြောင်း ထုတ်ပြန်ထားသည်။

ချင်းလန်းကာကွယ်ရေးတပ်ဖွဲ့ - မတူပီ (၄) နှစ်တာကာလအတွင်း တိုင်းပြည်နှင့် လူမျိုးအတွက် ရဲဘော် (၁၄) ဦး ကျဆုံးခဲ့ပြီး၊ ကိုယ်လက်အင်္ဂါဆုံးရှုံးသူ (၆) ဦး၊ အမြင်အာရုံဆုံးရှုံးသူ (၂) ဦးနှင့် (၄၀) ကျော် ထိခိုက်ဒဏ်ရာ ရရှိခဲ့ကြောင်းနှင့် ကျဆုံးရဲဘော်များ၊ ကိုယ်လက်အင်္ဂါပေးဆပ်သူများအား ချင်းလန်းကာကွယ်ရေးတပ်ဖွဲ့ - မတူပီ မှ မှတ်တမ်းတင်ဂုဏ်ပြုကြောင်း ဖော်ပြထားသည်။

ထို့အပြင်၊ ချင်းလန်းကာကွယ်ရေးတပ်ဖွဲ့ - မတူပီ (၄) နှစ်တာကာလအတွင်း အဖက်ဖက်က ကူညီထောက်ပံ့ပေးခဲ့သော လူပုဂ္ဂိုလ်များ၊ အဖွဲ့အစည်းများနှင့် ပြည်တွင်းပြည်ပ မိဘပြည်သူများအား မှတ်တမ်းတင်ဂုဏ်ပြုကြောင်းနှင့် တော်လှန်ရေးအောင်မြင်သည်အထိ ဆက်လက်ထောက်ပံ့ကြရန်လည်း တိုက်တွန်းထားသည်။

တဖက်တွင်လည်း Chinland Defense Force-Matupi တပ်မဟာ (၁) ကို Chin Defense Force-Matupi အဖြစ် အမည်ပြောင်းလဲကြောင်း ၂၀၂၅ ခုနှစ်၊ ဧပြီလ ၁၀ ရက်နေ့တွင် သတင်းထုတ်ပြန်ထားသည်။

 

========================

📌📌 ၆/ မီဇိုရမ်၊ လောင်တလိုင်ခရိုင်က ပလက်ဝ (ချင်း) စစ်ရှောင်စခန်း (၁၃၀) ကျော် ရေနစ်မြုပ်ပြီး အရေးပေါ်အကူအညီများ လိုအပ်နေ

The Matupi Times၊ ဇွန်လ ၁၊ ၂၀၂၅

မီဇိုရမ်၊ လောင်တလိုင်ခရိုင်နယ်စပ်ရှိ ပလက်ဝ (ချင်း) စစ်ရှောင်များနေထိုင်သော စစ်ရှောင်စခန်း (၁၃၀) ကျော် ရေနစ်မြုပ်ပြီး၊ စစ်ရှောင်များအရေးပေါ်အကူအညီများ လိုအပ်နေသည်ဟု သိရသည်။

လောင်တလိုင်ခရိုင်တွင် မိုးသည်းထန်စွာ အဆက်မပြတ် ရွာသွန်းနေမှုကြောင့် တွီဒင်းနှင့် ကာကီရွာများတွင် ရေကြီးမှု ဖြစ်ပေါ်လာပြီး၊ ပလက်ဝမြို့နယ်မှ စစ်ဘေးရှောင်များ၏ နေအိမ်အများအပြား ရေမြှုပ်မှု၊ မျှော်ပါမှုအခြေအနေ ခံကြုံနေရသည်ဟု Paletwa IDPs and Humanitarian Supporting Group ထံမှ သိရသည်။

ယမန်နေ့ မေလ ၃၁ ရက်နေ့ ၁ နာရီခန့်အချိန်တွင် မြစ်ရေကြီးမှု ဖြစ်ပေါ်လာခဲ့ပြီး၊ မြစ်ကမ်းဘေးတွင် တည်ရှိသော တွီဒင်းစစ်ရှောင်စခန်းမှ နေအိမ် (၅၆) လုံးခန့်၊ ကာကီစစ်ရှောင်စခန်းမှ နေအိမ် (၈၀) ခန့်၊ စုစုပေါင်း (၁၃၆) လုံးခန့် ရေမြှုပ်သည့် အခြေအနေ နှင့် ရင်ဆိုင်နေရသည်ဟု ဆိုသည်။

မိုးဆက်တိုက်ရွာသွန်းခြင်းနှင့် ရေအဆက်မပြတ်တက်လာမှုကြောင့် မြစ်ကမ်းဘေးရှိ စစ်ဘေးရှောင်ပြည်သူများသည် တွီဒင်းကျေးရွာအတွင်းရှိ နီးစပ်နေအိမ်များ၊ ဒါမှမဟုတ် ရွာအတွင်း ခန်းမနေရာများသို့ အရေးပေါ်ပြောင်းရွှေ့နေထိုင်နေရသည်။

လက်ရှိတွင် နေအိမ်များ ရေမြှုပ်ခြင်းကြောင့် စစ်ရှောင်များအမိုးအကာ၊ အစားအသောက် အရေးပေါ်အကူအညီများ လိုအပ်နေသလို၊ ပြန်လည်တည်ဆောက်နိုင်ရေးအတွက် ငွေကြေးအကူအညီများလည်း လိုအပ်နေသည်ဟု Paletwa IDPs and Humanitarian Supporting Group မှ ပြည်သူများကို ဝိုင်းဝန်းကူညီပေးရန် တောင်းဆိုထားသည်။

 

========================

 

📌📌 ၇/ အားကစားသတင်း

မလေးရှားနိုင်ငံ၊ ကွာလာလမ်ပူမြို့၊ ဘူကစ်ဂျာလီ အားကစားကွင်းတွင် မေလ ၂၈ ရက်နေ့ ညပိုင်းက ယှဉ်ပြိုင်ကစားခဲ့သော ခြေစမ်းပွဲတွင် ASEAN All-Stars အသင်းက မန်ချက်စတာ ယူနိုက်တက် အသင်းကို ပွဲပြီးချိန် (၁-၀) ရလဒ်ဖြင့် အနိုင်ရခဲ့သည်။

မန်ယူအသင်းကို ပွဲကစားချိန် ၅၄ မိနစ်မှာ လူစားလဲ ဝင်ရောက်လာသည့် မောင်မောင်လွင်၏ တစ်လုံးတည်းသော သွင်းဂိုးဖြင့် အနိုင်ရခဲ့ခြင်းဖြစ်သည်။ ထိုကြောင့် မောင်မောင်လွင်သည် မန်ယူအသင်းကို ဂိုးသွင်းနိုင်ခဲ့သော ပထမဦးဆုံး မြန်မာကစားသမား ဖြစ်လာခဲ့သည်။

ASEAN All-Stars အသင်းတွင် မလေးရှားကစားသမား ၅ ဦး၊ ထိုင်းနှင့် ဗီယက်နမ်ကစားသမား သီးသန့် ၄ ဦးစီ၊ ကမ္ဘောဒီးယားကစားသမား ၂ ဦး၊ စင်ကာပူ၊ ဖိလစ်ပိုင်၊ လာအို၊ မြန်မာနှင့် တီမောအသင်းများမှ ကစားသမား ၁ ဦးစီ ပါဝင်သည်။

#RadioNUGLocalNews

#SpringRevolution