27 Sep 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ စက်တင်ဘာလ ( ၂၇ ) ရက်နေ့နောက်ဆုံးရပြည်တွင်းသတင်းများ

📌📌 ၁။ CDF – Daai တည်ထောင်ခြင်း (၄) နှစ်ပြည့် အထိမ်းအမှတ် ကျင်းပ။

 

CDF-Daai ဖွဲ့စည်းတည်ထောင်ခဲ့တာဟာ ယခုနှစ် စက်တင်ဘာလ ၂၁ရက်နေ့ဆိုရင် ၄နှစ်ပြည့်မြောက်ခဲ့ပြီဖြစ်ကြောင်း CDF-Daai က စက်တင်ဘာလ ၂၁ရက် က ထုတ်ပြန်ပါတယ်။

၄နှစ်တာကာလအတွင်း စစ်အာဏာရှင်တော်လှန်တိုက်ပွဲဝင်ရင်း အသက်နှင့် ကိုယ်လက်အင်္ဂါပေးဆပ်ခဲ့တဲ့ ရဲဘော်များကို ဦးညွတ်အလေးပြုကြောင်း၊ ချင်းပြည်တောင်ပိုင်း၊ ဒိုင်ရ်လုထုက ခေတ်အဆက်ဆက် ကြိုးပမ်းလာခဲ့သည့် မြို့နယ် ၄ခုအတွင်း ပြန့်ကျဲနေထိုင်လျက်ရှိတဲ့ ဒိုင်ရ်မျိုးနွယ်အားလုံးပြန်စုစည်းရေးအတွက် ဒိုင်ရ်ဒေသန္တရကောင်စီ (Daai Regional Council)ကို ဖွဲ့စည်းကာ အုပ်ချုပ်ရေးယူနစ်တစ်ခုရရှိအောင် ကြိုးပမ်းသွားမည်ဖြစ်ကြောင်း၊ ထို့ပြင် ချင်းပြည်တည်ဆောက်ရေးမှာလည်း ချင်းတော်လှန်ရေးအင်အားစုများနှင့်အတူ ဆက်လက်လက်တွဲမည်ဖြစ်ကြောင်း ထုတ်ပြန်ချက်မှာ ပါရှိပါတယ်။

ထို့ပြင် CDF-Daaiပေါ်ပေါက်လာရေးအတွက် ပထမဦးဆုံး အပတ်စဉ်(၁)နှင့်(၂) စစ်ပညာသင်ပေးခဲ့တဲ့ CDF-Mindatကို အထူးကျေးဇူးတင်သကဲ့သို့ စစ်ပညာနှင့်စစ်ရေးအတွေ့အကြုံများ၊ လက်နက်ခဲယမ်းရိက္ခာများ ထောက်ပံ့ကူညီပေး‌တဲ့ အာရက္ခတပ်တော်(AA)ကိုလည်း ကျေးဇူးတင်သည့်အပြင် အာရက္ခတပ်တော်နှင့် ခိုင်မာသော မဟာမိတ်ကို ဆက်လက်တည်ဆောက်သွားမယ်လို့ CDF-Daaiကဆိုပါတယ်။

အဖက်ဖက်က ဝိုင်းဝန်းကူညီပေးနေတဲ့ ပြည်တွင်းပြည်ပအလှူရှင်များကို ကျေးဇူးတင်ကြောင်း၊ အများပြည်သူ မျှော်လင့်နေတဲ့ စစ်အာဏာရှင် အမြစ်ပြတ်ချေမှုန်းရေး၊ ဖက်ဒရယ်ဒီမိုကရေစီနိုင်ငံတည်ဆောက်ရေး၊ ချင်းအမျိုးသားတည်ဆောက်ရေးလုပ်ငန်းများ ပြီးစီးသည်အထိ ညီအစ်ကိုတော်လှန်ရေးအင်အားစုများနှင့်ပူးပေါင်းပြီး ဆက်လက်တိုက်ပွဲဝင်သွားမယ်လို့ CDF-Daaiက ထုတ်ပြန်ထားပါတယ်။

 

========================

 

📌📌 ၂။ CNU ရဲ့ အကြိုကောလိပ် ဒီပလိုမာသင်တန်း ပထမသုတ်ဘွဲ့နှင်းသဘင်အခမ်းအနားကျင်းပ။

 

ချင်းပြည်(Chinland) အစိုးရ ပညာရေးဝန်ကြီးဌာနလက်အောက်က ချင်းအမျိုး သားတက္ကသိုလ် (CNU) ရဲ့ ပထမဆုံးအကြိမ် အကြိုကောလိပ် ဒီပလိုမာသင် တန်းဘွဲ့နှင်းသဘင်အခမ်းအနားကို  စက်တင်ဘာလ ၂၄ ရက်နေ့မှာ ကျင်းပပြုလုပ်ခဲ့ကြပါတယ်။ 

ချင်းပြည်လွတ်မြောက်နယ်မြေတနေရာမှာ ဒီကနေ့ကျင်းပပြုလုပ်တဲ့ ဘွဲ့နှင်းသဘင်အခမ်းအနားမှာ အကြိုကောလိပ် ဒီပလိုမာသင်တန်း ပထမအသုတ် တက်ရောက်ခဲ့ကြတဲ့ ကျောင်းသား/ကျောင်းသူ ၁၄၀ ထံ ဒီပလိုမာဘွဲ့လက်မှတ်တွေ ပေးအပ်ခဲ့တယ်လို့ သိရပါတယ်။ 

ချင်းအမျိုးသားတက္ကသိုလ် (CNU) ရဲ့ အကြိုကောလိပ်ဒီပလိုမာသင်တန်းကို ယခုနှစ်ဇန်နဝါရီလကနေ စတင်ဖွင့်လှစ်ခဲ့ပြီး ၉ လတက်ရောက်ခဲ့ကြတယ်လို့သိရပါတယ်။ ဘွဲ့နှင်းသဘင်အခမ်းအနားမှာ ချင်းပြည်(Chinland) အစိုးရ ဝန်ကြီးချုပ်၊ ပညာရေးဝန်ကြီး၊ လွှတ်တော် ဥက္ကဌတို့အပါအဝင် တာဝန်ရှိသူတွေတက်ရောက်ချီးမြှင့်ခဲ့ကြပါတယ်။ 

 

========================

 

📌📌 ၃။ ချင်းလဲန်းကောင်စီ အစိုးရအဖွဲ့ဝန်ကြီးတွေနဲ့ KNU ထိပ်ပိုင်းခေါင်းဆောင်တွေကို အကြမ်းဖက်စစ်တပ်က ရွေးကောက်ပွဲဥပဒေဖြင့် အမှုဖွင့်။

 

ရွေးကောက်ပွဲပျက်ပြားစေရန် ဟောပြောလှုံ့ဆော်တယ်ဆိုပြီး ချင်းလဲန်းကောင်စီအစိုးရအဖွဲ့ဝန်ကြီးတွေနဲ့ ကရင်အမျိုး သားအစည်းအရုံး KNU ထိပ်ပိုင်းခေါင်းဆောင်တွေကို အကြမ်းဖက်စစ်တပ်က ရွေးကောက်ပွဲဥပဒေဖြင့် အမှုဖွင့်ထားတယ် လို့ သိရပါတယ်။ 

အာဏာသိမ်းအကြမ်းဖက်စစ်တပ်က ယခုနှစ်ကုန်ပိုင်းမှာ စတင်ကျင်းပမယ့် ရွေးကောက်ပွဲကို ပျက်ပြားစေရန် ချင်းပြည် ထန်တလန်မြို့နယ်မှာ ဩဂုတ်လ ၃၁ ရက်နေ့က ဟောပြောလှုံ့ဆော်တယ်ဆိုပြီး ချင်းလဲန်း ကောင်စီဥက္ကဌ ပူးဇင်ကျုံး၊ ချင်းလဲန်းအစိုးရဝန်ကြီးချုပ်ပူးပါထန်း နဲ့ အစိုးရအဖွဲ့တွေဖြစ်ကြတဲ့ ဒေါက်တာ ရွှေခါရ်း၊ ဦးထောင်ဇလျန်း၊ ဦးရိုဘင်၊ ဦးစိန်အောင်၊ ဆလိုင်းခရော်စ်ထန်း၊ ဒေါက်တာ ရှရွန်ပါရ်၊ ဦးဆလိုင်းမနားကီး၊ ဆလိုင်းဂျိုးဇက် လားရမ်းလော်မာ၊ ဒေါ်နီဆွီလျန်၊ ဦးမန်အုပ်ခမ်၊ ဦးထန်ကမ်းလျန်၊ ဦးမောင်ဦး၊ ဦးဟာမိုရုန်းလျန်၊ ဦးဇလိုင်းဇထောင်း၊ ဒေါက်တာ တီလ်နှင်းစတဲ့ ၁၇ ဦးတို့ကို စက်တင်ဘာ ၄ ရက်နေ့က ဟားခါးမြို့မရဲစခန်းမှာ အမှုဖွင့်ထားတယ်လို့ အကြမ်း ဖက်စစ်တပ်က ထုတ်ပြန်ထားပါတယ်။ 

အလားတူ ကရင်အမျိုးသားအစည်းအရုံး (KNU) ဥက္ကဌ ပဒိုစောကွယ်ထူးဝင်း၊ ပဒိုစောဆဲဂေ၊ ပဒိုတာဒိုမူး၊ ပဒိုစောသော သီဘွဲ၊ ပဒိုစောလှထွန်း၊ စောဂျော်နီ၊ စောတာမလာသော၊ ပဒိုစောလော်အယ်မူး၊ ပဒိုစောအယ်ကလူစေး၊ ပဒိုနော်ဒါးဒါး၊  ပဒိုစောတောနီး နဲ့ စောဆာပုလဲဒီဝမ်း တို့ကိုလည်း ကရင်ပြည်နယ် လှိုင်းဘွဲ့မြို့မရဲစခန်း နဲ့ ပိုင်ကျုံနယ်မြေရဲစခန်းတို့မှာ ရွေးကောက်ပွဲဥပဒေဖြင့် အမှုဖွင့်ထားတယ်လို့ သိရပါတယ်။ 

 

အကြမ်းဖက်အာဏာသိမ်းစစ်တပ်ဟာ ယခုနှစ် ဒီဇင်ဘာ ၂၈ ရက်နေ့မှာ အတုအယောင်ရွေးကောက်ပွဲအပိုင်း ၁ ကို စတင်ကျင်းပမှာဖြစ်ပါတယ်။

#RadioNUGLocalNews

#SpringRevolution