7th FEB 2022 - Evening Daily News by Radio NUG

၂၀၂၂ ဖေဖေါ်ဝါရီလ ၇ ရက်နေ့ ညနေခင်း ရပြည်တွင်းသတင်းများ

သတင်းခေါင်းစဉ်များ -

📌စစ်တပ်ဆက်နွယ်ကုမ္ပဏီများမှ ဒေါ်လာသန်းချီစစ်လက်နက်များနှင့် စက်ပစ္စည်းများ ဝယ်ယူခဲ့ကြောင်း လျှို့ဝှက်ပေါက်ကြားစာရွက်စာတမ်းများက ဖော်ပြထားသလို အထောက်အထားအသစ်ရရှိပြီးနောက် အရေးတကြီးပစ်မှတ်ထား ဒဏ်ခတ်ပိတ်ဆို့မှုများ Justice For Myanmar တောင်းဆို

📌(၇၅) နှစ်မြောက် ရှမ်းအမျိုးသားနေ့(ရှမ်းပြည်နယ်နေ့) သို့ အမျိုးသားညီညွတ်ရေးအစိုးရအဖွဲ့ကသဝဏ်လွှာ

ဤသတင်းများကို ရေဒီယိုအန်ယူဂျီသတင်းတာဝန်ခံများနှင့် ခိုင်လုံသော မိတ်ဖက်သတင်းရင်းမြစ်များဆီမှ အခြေခံတင်ပြထားခြင်း ဖြစ်ပါတယ်

========================

📌📌စစ်တပ်ဆက်နွယ်ကုမ္ပဏီများမှ ဒေါ်လာသန်းချီစစ်လက်နက်များနှင့် စက်ပစ္စည်းများ ဝယ်ယူခဲ့ကြောင်း လျှို့ဝှက်ပေါက်ကြားစာရွက်စာတမ်းများက ဖော်ပြထားသလို အထောက်အထားအသစ်ရရှိပြီးနောက် အရေးတကြီးပစ်မှတ်ထား ဒဏ်ခတ်ပိတ်ဆို့မှုများ Justice For Myanmar တောင်းဆိုတဲ့သတင်း

လျှို့ဝှက်ပေါက်ကြားလာသော စာရွက်စာတမ်းများနှင့် ကုန်ပစ္စည်းတင်ပို့မှုမှတ်တမ်းများအရ မြန်မာ စစ်တပ်အတွက် အမေရိကန်ဒေါ်လာသန်းပေါင်းများစွာတန်ဖိုးရှိ စစ်လက်နက်များနှင့် စစ်ဘက်ပစ္စည်း ဝယ်ယူမှုများစွာတွင် International Gateways Group of Companies Limited (IGG)၊ Myanmar Consultancy Company Limited နှင့် Myanmar New Era Trading Company တို့၏ ပါဝင်မှု သက်သေအထောက်အထားများ ဖော်ပြထားသည်။

ထိုစာရွက်စာတမ်းများတွင် ဖော်ပြပါကုမ္ပဏီများမှ မြန်မာစစ်တပ်ကိုယ်စား ဝယ်ယူပေးမှုများ၏ သမိုင်း ကြောင်းများကို ထုတ်ဖော်ထားသည်။ စာရွက်စာတမ်းများထဲမှ အချို့ကို Justice For Myanmar ဝဘ်ဆိုဒ်တွင် ထုတ်ပြန်ခဲ့ပြီးဖြစ်ပါသည်။

လျှို့ဝှက်ပေါက်ကြားသည့်စာရွက်စာတမ်းတစ်ခုတွင် IGG ၏ ကုမ္ပဏီခွဲ Gateways Hongkong Company Limited ကို (၂၀၁၅-၂၀၁၆) ဘဏ္ဍာနှစ်အတွင်း မြန်မာ့လေတပ်အတွက် အမေရိကန်ဒေါ်လာ ၈ သန်းတန်ဖိုးရှိ လေယာဉ်စက်ပစ္စည်းများ ပေးသွင်းရန် အနည်းဆုံး စာချုပ် ၁၂ ခုကို ပေးအပ်ခဲ့ကြောင်း ဖော်ပြထားသည်။

ကာကွယ်ရေးဝန်ကြီးဌာနမှ အခြားလျှို့ဝှက်ပေါက်ကြားစာရွက်စာတမ်းတစ်ခုတွင် ၂၀၁၆ ခုနှစ်နှင့် ၂၀၁၇ ခုနှစ်အတွင်း စုစုပေါင်းအမေရိကန်ဒေါ်လာ ၃.၇ သန်းကျော် တန်ဖိုးရှိ လေယာဉ်များအတွက် စက်ပစ္စည်း အစိတ်အပိုင်းများနှင့် စစ်သင်္ဘောများအတွက် စစ်လက်နက်များကို ကုမ္ပဏီတစ်ခုတည်းက ဝယ်ယူမှု ၅ ကြိမ်၏ အသေးစိတ်အချက်အလက်များ ပါရှိသည်။

အဆိုပါ စစ်တပ်ဆက်နွယ်သည့် အဓိကကုမ္ပဏီများ၏ ဒါရိုက်တာများနှင့် ရှယ်ယာရှင်နေရာများတွင် လူပုဂ္ဂိုလ် (၁၈) ဦးကို ဖော်ပြထားပြီး ယင်းတို့ထဲမှ ၄ ဦးမှာ မိသားစုဝင်များ ဖြစ်ကြသည်။

၎င်းတို့တစ်ဦးချင်းစီသည် စင်ကာပူနိုင်ငံတွင် ကုမ္ပဏီခွဲများ ဖွင့်လှစ်ထားရှိသည်။ မြန်မာလက်နက်ပွဲစား များသည် မြန်မာစစ်တပ်နှင့် နိုင်ငံတကာလက်နက်ရောင်းချသူများကြား ငွေပေးချေမှု အဆင်ပြေစေရန် စင်ကာပူနိုင်ငံကို အမြဲတမ်းအသုံးပြုခဲ့သည်။

၎င်းတို့ထဲမှ ဒေါက်တာနိုင်ထွဋ်အောင်သည် မြန်မာ့စစ်လက်နက်ကုန်သွယ်မှုတွင် အဓိကပုဂ္ဂိုလ်တစ်ဦး ဖြစ်ပြီး ပစ္စည်းပေးသွင်းသူများ အထူးသဖြင့် တရုတ်နိုင်ငံရှိပစ္စည်းပေးသွင်းသူများနှင့် မြန်မာ့လေတပ်၊ မြန်မာ့ရေတပ်တို့ အကြား အကျိုးဆောင်ပေးသည်။

ဒေါက်တာနိုင်ထွဋ်အောင်သည် လက်ရှိကာကွယ်ရေးဦးစီးချုပ်၊ စစ်ရာဇဝတ်ကောင် ဗိုလ်ချုပ်မှူးကြီး မင်းအောင်လှိုင် အပါအဝင် ထိပ်ပိုင်းစစ်ခေါင်းဆောင်များနှင့် ဆက်နွယ်မှုရှိသည်။

အမျိုးသားညီညွတ်ရေးအစိုးရ NUG၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ဇန်နဝါရီလ ၂၅ ရက်နေ့ရက်စွဲဖြင့် ထုတ်ပြန်ခဲ့သော ကြေညာချက် တစ်စောင်တွင် ဒေါက်တာ နိုင်ထွဋ်အောင်နှင့် IGG ကုမ္ပဏီအား အကြမ်းဖက်စစ်ကောင်စီအတွက် စစ်လက်နက်ပွဲစားလုပ်ကိုင်သည့် အမည်စာရင်းတွင် ဖော်ပြခဲ့သည်။

ကုန်ပစ္စည်းတင်ပို့မှုအချက်အလက်အစုအစည်းဖြစ်သည့် ImportGenius ၏ မှတ်တမ်းများအရ ထင်ရှားသောအခြားကုမ္ပဏီတစ်ခုဖြစ်သည့် Myanmar Consultancy Company Limited မှာ စစ်အာဏာသိမ်းကြိုးပမ်းမှုနောက်ပိုင်း မြန်မာစစ်တပ်အတွက် စက်ပစ္စည်းအစိတ်အပိုင်းများ တင်သွင်း ပေးခဲ့သည်။

နောက်ထပ်ဒဏ်ခတ်ပိတ်ဆို့မှုများလိုအပ်တာနဲ့ပတ်သက်ပြီး

Justice For Myanmar ၏ ပြောရေးဆိုခွင့်ရှိသူ မရတနာမောင်က “အခုဖေဖော်ဝါရီ ၁ ရက်နေ့ဆိုရင် မြန်မာစစ်တပ်က သွေးထွက်သံယိုစစ်အာဏာသိမ်းကြိုးပမ်းမှု လုပ်ဆောင်ခဲ့တာ တစ်နှစ်ပြည့်ခဲ့ပါပြီ၊ အဲဒီတစ်နှစ်တာကာလမှာ မြန်မာစစ်တပ်က လက်နက်မဲ့အရပ်သားပြည်သူ (၁,၅၀၀) ကျော်ကို သတ်ဖြတ် ခဲ့ပြီး (၁၁,၀၀၀) ကျော် ကို ဖမ်းဆီးထားပါတယ်။”

“စစ်ကောင်စီက အဆင်ခြင်မဲ့လေကြောင်းတိုက်ခိုက်တာ၊ ဗုံးကြဲတာ၊ အတင်းအဓမ္မရွှေ့ပြောင်းခိုင်းတာ၊ မုဒိန်းကျင့်တာတွေ စတဲ့ သူတို့ရဲ့ အကြမ်းဖက်စစ်ဆင်ရေးကို ဆက်ပြီးကျူးလွန်နေတုန်းပါပဲ။

“UNHCR ရဲ့ အချက်အလက်တွေအရ စစ်အာဏာသိမ်းကြိုးပမ်းမှုနောက်ပိုင်း အရပ်သားပြည်သူ (၄၀၀,၀၀၀)ကျော် ကို အတင်းအဓမ္မဖိအားပေး ရွှေ့ပြောင်းစေခဲ့ပြီးပါပြီ။

“စစ်ကောင်စီက ထိခိုက်ခံစားခဲ့ရတဲ့ ပြည်သူလူထုအတွက် လူသားချင်းစာနာထောက်ထားမှုအကူအညီ တွေကို နှောက်ယှက်ဖျက်ဆီးတာ ဟန့်တားပိတ်ပင်တာတွေလုပ်ခဲ့ပြီး ကျန်းမာရေးနဲ့ ကူညီထောက်ပံ့ ရေးဝန်ထမ်းတွေကို တိုက်ခိုက်နေပါတယ်။

“ဒီလိုရာဇဝတ်မှုတွေကို International Gateways Group နဲ့ Myanmar Consultancy Company တို့ လို ပွဲစားကုမ္ပဏီတွေရဲ့ စစ်လက်နက်တွေ ဆက်လက်ပေးသွင်းနေမှုက အားပေးကူညီနေပါတယ်။

“ကမ္ဘာတဝှမ်းက အစိုးရတွေအနေနဲ့ မြန်မာစစ်တပ်ကို စစ်လက်နက်ကူပေးနေပြီး မြန်မာပြည်သူတွေ အပေါ် ဆက်လက်တိုက်ခိုက်မှုတွေမှာ ကြံရာပါပတ်သက်နေတဲ့ ကုမ္ပဏီတွေနဲ့ လူပုဂ္ဂိုလ်တွေကို ပစ်မှတ်ထား ဒဏ်ခတ်ပိတ်ဆို့မှုတွေ အရေးတကြီးလုပ်ဆောင်ဖို့ Justice For Myanmar က တောင်းဆိုပါတယ်။

“အကြမ်းဖက်စစ်ကောင်စီဆီ စစ်လက်နက်စီးဆင်းမှုတွေရပ်တန့်ဖို့ ကမ္ဘာလုံးဆိုင်ရာစစ်လက်နက် ရောင်းချမှုပိတ်ပင်ရေးကို ချက်ချင်းလက်ငင်း လုပ်ဆောင်ရမှာဖြစ်ပါတယ်။

“မြန်မာစစ်တပ်ရဲ့ ရက်စက်ယုတ်မာမှုတွေမှာ အားပေးအားမြှောက်ဖို့အတွက် စင်္ကာပူဟာ နာမည်ကြီး လက်နက်ပွဲစားတွေကို သူ့နိုင်ငံမှာအသုံးချခွင့်ပေးထားတာပါ၊ စင်္ကာပူအနေနဲ့ မြန်မာစစ်တပ်ဝယ်ယူမှု တွေအတွက် အခရာကျတဲ့ သူ့ရဲ့ အခန်းကဏ္ဍကနေ မဖြစ်မနေရပ်တန့်ပါ” လို့ဖေါ်ပြထားပါတယ်။

========================

📌📌(၇၅) နှစ်မြောက် ရှမ်းအမျိုးသားနေ့ (ရှမ်းပြည်နယ်နေ့) သို့ အမျိုးသားညီညွတ်ရေးအစိုးရအဖွဲ့ကသဝဏ်လွှာကို‌ပေးပို့ခဲ့ပါတယ်။

ပေးပို့ခဲ့တဲ့ သဝဏ်လွှာထဲမှာ ရေးသားထားတာ ကတော့

၁။ ယနေ့ကျရောက်သော (၇၅) နှစ်မြောက် ရှမ်းအမျိုးသားနေ့ (ရှမ်းပြည်နယ်နေ့) တွင် ရှမ်းပြည်နယ်အတွင်းရှိ တိုင်းရင်းသားပြည်သူများအားလုံး ကိုယ်စိတ်နှစ်ဖြာကျန်းမာချမ်းသာ၍ ဘေးလွတ်လုံခြုံစွာရှိကြပါစေဟု ဆုမွန် ကောင်းတောင်းရင်း နုတ်ခွန်းဆက်သလိုက်ပါသည်။

၂။ ရှမ်းပြည်နယ်အတွင်း နိုင်ငံရေးပြုပြင်ပြောင်းလဲမှုပြုလုပ်ပေးရန် ရှမ်းပြည်နယ်လူထု၏တောင်းဆိုချက်အား ဗြိတိသျှအစိုးရကငြင်းပယ်လိုက်သည့်အတွက် ၁၉၄၇ ခုနှစ် ဖေဖေါ်ဝါရီလ (၇) ရက်နေ့တွင် စော်ဘွားများနှင့် တိုင်းရင်းသားလူထုခေါင်းဆောင်များက ဗြိတိသျှအစိုးရကိုဆန့်ကျင်လိုက်ကြသည်။ ထိုသို့ ဆန့်ကျင်လိုက်မှု ကြီးကြောင့် နောက်ထပ်ရက်အနည်းငယ်အကြာ ဖေဖေါ်ဝါရီလ (၁၂) ရက်နေ့တွင် သမိုင်းဝင်ပင်လုံစာချုပ်ကို လက်မှတ်ရေးထိုးနိုင်ရန် လမ်းပွင့်သွားစေခဲ့သည်။

၃။ သမိုင်းဝင် ပင်လုံစာချုပ်ကို လက်မှတ်ရေးထိုးခြင်း မပြုမီ တစ်ရက်အလို ၁၉၄၇ ခုနှစ် ဖေဖော်ဝါရီလ (၁၁) ရက်နေ့တွင်ကျင်းပသော ပင်လုံညီလာခံအစည်းအဝေး၌ စော်ဘွားများနှင့်လူထုကိုယ်စားလှယ်များ စုံညီစွာ တက်ရောက်ခဲ့ပြီး၊ စိတ်သဘောတစ်ညီတစ်ညွတ်တည်းဖြင့် ဖေဖေါ်ဝါရီလ (၇) ရက်နေ့ကို ရှမ်းအမျိုးသားနေ့ (ရှမ်းပြည်နယ်နေ့) အဖြစ် သတ်မှတ်ကျင်းပရန် ဆုံးဖြတ်ခဲ့ကြသည်။

၄။ လွတ်လပ်ရေးမရမီကတည်းကပင် စော်ဘွားများအုပ်ချုပ်ခဲ့သည့်နယ်မြေများ (princely states) ကို ဖက်ဒရယ်ရှမ်းပြည် (Federated Shan States) အဖြစ် စုစည်းခဲ့ကြပြီး၊ ယင်းစုစည်းမှုဖြင့် လွတ်လပ်သည့် ပြည်ထောင်စုမြန်မာနိုင်ငံတွင် ပြည်ထောင်စုအဖွဲ့ဝင်အဖြစ် ပူးပေါင်းပါဝင်ခဲ့ခြင်းဖြစ်သည်။ ရှမ်းပြည်နယ်သည် လွန်ခဲ့သည့် (၇၅) နှစ်တာကာလအတွင်း ကြမ်းတမ်းသည့် နိုင်ငံရေးလှိုင်းတံပိုးများစွာကို ဖြတ်သန်းခဲ့ရသည့် တိုင် ယနေ့အချိန်အထိ ဖက်ဒရယ်ပြည်ထောင်စုတစ်ခု၏ ပုံသွင်ကို မဆုတ်မနစ် ထိန်းသိမ်းထားနိုင်ဆဲဖြစ်သည်။

၅။ ယခုအချိန်သည် စစ်အာဏာသိမ်းယူမှုကို အကြမ်းမဖက် ဆန့်ကျင်ကြသည့် နိုင်ငံသူ၊ နိုင်ငံသားများစွာအပေါ် အကြမ်းဖက်နှိမ်နင်းခြင်း၊ ရက်စက်စွာ ဖမ်းဆီးသတ်ဖြတ်ခြင်း၊ ပြည်သူများ၏အသက်အိုးအိမ်ကို ဖျက်ဆီးခြင်း၊ တိုင်းရင်းသားနယ်မြေများတွင် အလွန်အကျွံစစ်အင်အားဖြင့် ထိုးစစ်ဆင်ခြင်းနှင့် ပြည်သူတို့၏ ဒီမိုကရေစီနှင့် လူ့အခွင့်အရေးများကို ပြောင်ပြောင်တင်းတင်းချိုးဖောက်ခြင်းအစရှိသည်တို့ကို စစ်ကောင်စီက နေ့စဉ်ရက်ဆက် ကျုးလွန်လျက်ရှိပြီး ပြည်သူတစ်ရပ်လုံးက ရရာနည်းလမ်းများဖြင့် ခုခံတွန်းလှန်နေကြရချိန်ဖြစ်သည်။

၆။ ထိုကဲ့သို့သောအချိန်အခါတွင် ရှမ်းပြည်နယ်အတွင်းရှိ နိုင်ငံရေးအင်အားစုများ၊ တိုင်းရင်းသားပြည်သူများ အားလုံးသည် တစ်စိတ်တစ်ဝမ်းတည်းဖြင့် စစ်အာဏာရှင်စနစ်အောက်မှ ပြည်သူ့ဘဝလွတ်မြောက်ရေး၊ ဒီမိုကရေစီနှင့်လူ့အခွင့်အရေး တန်းတူညီမျှရရှိရေးနှင့် ဖက်ဒရယ်ပြည်ထောင်စုတည်ဆောက်ရေးဟူသည့် နိုင်ငံရေးဦးတည်ချက်များဖြင့် စစ်အာဏာရှင်စနစ်ဆန့်ကျင်ရေး ပြည်သူ့ဘဝလွတ်မြောက်ရေးအတွက် စုစည်း လက်တွဲဆောင်ရွက်ကြပါစို့ဟုတိုက်တွန်းဖိတ်ခေါ်ရင်း ဤသဝဏ်လွှာကို ပေးပို့အပ်ပါသည်။

#RadioNUGLocalNews

#SpringRevolution