22nd APR 2022 - (Ethnic language program-CHO_KAANG) by Radio NUG

📌(ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ ဧပြီလ ၂၂ ရက်နေ့နောက်ဆုံးရပြည်တွင်းသတင်းများ

📌📌၁။ မင်းတပ်-မတူပီလမ်း လည်မျိုချောင်းဆုံတိုက်ပွဲတွင် စစ်ကောင်စီတပ်သား ၈ ဦးခန့်သေ

၂၀၂၂ ဧပြီလ ၂၀ ရက်နေ့တွင် မင်းတပ်-မတူပီလမ်းရှိ လည်မျိုချောင်းဆုံတဝိုက်တွင် အကြမ်းဖက်စစ်ကောင်စီ ခမရ (၃၀၄) တပ်ရင်းနှင့် ဒေသခံ ကာကွယ်ရေးတပ် CDF-MATUPI တိုက်ပွဲဖြစ်ပွာခဲ့ပြီး စစ်ကောင်စီတပ်မှ ဗိုလ်ကြီးတစ်ဦး အပါအဝင် တပ်သား ၈ ဦိးသေဆုံး၊ ၅ ဦးထက်မနည်း ဒဏ်ရာရရှိခဲ့သည်ဟု CDF-MATUPI ကထုတ်ပြန်သည်။

ထို့နောက် ယနေ့တိုက်ပွဲတွင် ချင်းပြည်သူ့ကာကွယ်ရေးတပ် မတူပီမှ ရဲဘော်များ အထိအခိုက်မရှိ ဆုတ်ခွာလာနိုင်ကြောင်းနှင့် မတူပီစစ်ကောင်စီတပ်ရင်း၏ မင်းတပ်-မတူပီလမ်း CDF-MATUPI နယ််မြေအတွင်းသို့ စစ်အင်အားအဆမတန် ဖြည့်တင်းနေမှုကြောင့် တိုက်ပွဲဆက်လက်ပြင်းထန်လာနိုင်ကြောင်းဖော်ပြထားသည်။

 

📌📌၂။ ဒေသခံပြည်သူ့ကာကွယ်ရေးတပ် (ထီးလင်း) မှ မကွေးတိုင်း ဂန့်ဂေါခရိုင်အတွင်းက ပထမဦးဆုံးရဲစခန်းသိမ်းပြီး လက်နက်အများအပြား သိမ််းဆည်းထား

၂၀၂၂ ဧပြီလ ၁၇ ရက်နေ့တွင် မကွေးတိုင်း ထီးလင်းမြို့နယ် ကျင်းကျေးရွာ နယ်မြေခံ ရဲစခန်းကို People Defence Force-Htilin တပ်ဖွဲ့ဝင်များမှ အင်အားအလုံးအရင်းဖြင့် အလစ်အငိုက်ဝင်ရောက်တိုက်ခိုက်ခဲ့ပြီး ပစ်ခတ်တိုက်ခိုက်မှု ၁ နာရီအတွင်း ကျင်းကျေးရွာ နယ်မြေခံ ရဲစခန်း တစ်ခုလုံး သိမ်းပိုက်နိုင်ခဲ့ကြောင်းသိရသည်။

အဆိုပါတိုက်ပွဲတွင် ကျင်းနယ်မြေခံ ရဲစခန်းမှုးတစ်ဦး သေဆုံးခဲ့ပြီး စစ်ကောင်စီလက်အောက်ခံ ရဲတပ်ဖွဲ့ဝင် ၂ ဦီး အပြင်းအထန်ဒဏ်ရာရရှိခဲ့ကြောင်းနှင့် ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိဘေးကင်းစွာ ပြန်လည်ဆုတ်ခွာနိုင်ခဲ့ကြောင်း ဒေသခံကာကွယ်ရေးတပ် (ထီးလင်း) က ထုတ်ပြန်ထားသည်။

 

📌📌၃။ ယခင်အစိုးရပိုင် နွားနောက်များကို ပြည်သူပိုင်အဖြစ်သိမ်းယူကြောင်း မင်းတပ် ပအဖ ကြေညာ

၂၀၂၂ ဧပြီလ ၂၀ ရက်နေ့တွင် မင်းတပ်မြို့နယ်အတွင်းရှိ ကျေးရွာတချို့တွင် ယခင်အစိုးရမှ မွေးမြူရေးနှင့် ကုသရေးဌာနပိုင်အဖြစ် နွားနောက်များကို အခကြေးငွေဖြင့် မွေးမြူထိန်းကြောင်းစေခဲ့ကြောင်းသိရသည်။

ယခုကာလသည် အာဏာသိမ်းစစ်ကောင်စီကို ပြည်သူတစ်ရပ်လုံးက တော်လှန်နေချိန်ဖြစ်ပြီး ၄င်းနွားနောက်များနှင့်ပတ်သက်၍ Non-CDM ဝန်ထမ်းများ၏ ဝင်ရောက်ပြောဆိုမှုများသည် တရားဝင်မှု မရှိသောကြောင့် ပြည်သူများ အနေဖြင့် အလေးထားရန်မလိုအပ်ကြောင်းနှင့် မိမိတို့ထိန်းကျောင်းနေသော နွားနောက်များကို ပုဂ္ဂိုလ်ရေး(ကိုယ်ရေးကိုယ်တာ)အဖြစ် အလွဲသုံးစားမပြုလုပ်ကြရန်နှင့် အဆိုပါနွားနောက်များကို ပြည်သူပိုင်အဖြစ်သိမ်းယူကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ဧပြီလ ၂၀ ရက် ယနေ့တွင် ကြေညာချက်အမှတ် (၇/၂၀၁၁) ဖြင့်ကြေညာလိုက်သည်။

နွားနောက်သည် ချင်းပြည်နယ်ရှိ ချင်းတိုင်းရင်းသားများက အလွန်တန်ဖိုးထားသော နို့တိုက်သတ္တဝါဖြစ်ပြီး ချင်းတိုင်းရင်းသားများ၏ သာရေးနာရေးလူမှုရေးနှင့် ပွဲလမ်းသဘင်များတွင် အသုံးပြုကြသည်။

 

📌📌၄။ စစ်ကောင်စီက နိုင်ငံတဝန်း တပ်များအားလုံးကို အရေးပေါ်ကာလအဖြစ် သတ်မှတ်တပ်လှန့်

အမျိုးသားညီညွတ်ရေးအစိုးရ NUG က ခုခံစစ်ကနေ ထိုးစစ်ကိုပြောင်းလဲတော့မယ်လို့ တရားဝင်ကြေညာလိုက်ပြီးနောက် အာဏာသိမ်းစစ်ကောင်စီက တနိုင်ငံလုံးမှာရှိနေတဲ့ တပ်ရင်းတပ်ဖွဲ့ အားလုံးကို အကန့်အသတ်မရှိ အရေးကြီးကာလအဖြစ် သတ်မှတ်လိုက်တယ်လို့ တပ်တွင်းသတင်းအရင်းအမြစ်တွေက ပြောပါတယ်။

CDM ဗိုလ်ကြီးလင်းထက်အောင်ကတော့ စစ်ရေးအရဆိုရင် ဒါဟာစစ်တပ်အနေနဲ့ ခံစစ်ကိုအသားပေး တည်ဆောက်လိုက်တဲ့သဘောဖြစ်ပြီး တချို့မြို့နယ်တွေက တပ်စခန်းတွေမှာ စစ်တပ်ရဲ့ လှုပ်ရှားနိုင်ရေးစွမ်းရည်ဟာရပ်တန့်နေပြီဖြစ်တာကြောင့် တပ်စခန်းတွေကို ဝင်အတိုက်မခံရရေးကို ပြင်ဆင်လိုက်တာဖြစ်နိုင်တယ်လို့ ဆိုပါတယ်။

မကြာခင်ကာလအတွင်းမှာ မိုးတွင်းကာလကို ရောက်လာတော့မှာဖြစ်တာကြောင့် တပ်တွေအရှေ့ကိုတိုးရင်း နောက်တန်းခံစစ်တွေ မလုံချိန်မှာ တိုင်းရင်းသားတော်လှနရေးတပ်ဖွဲ့တွေနဲ့ ပြည်သူ့ကာကွယ််ရေးတပ်တွေဝင်တိုက်မှာကို စိုးရိမ်တာကြောင့်လည်း ဖြစ်နိုင်တယ်လို့ CDM ဗိုလ်ကြီးလင်းထက်အောင်က ပြောပါတယ်။

အမျိုးသားညီညွတ်ရေးအစိုးရအနေနဲ့ ပြည်သူ့ကာကွယ်ရေးတပ်ရင်း ၂၅၉ တပ်ရင်းဖွဲ့စည်းပြီး LDF လို့ခေါ်တဲ့ ဒေသပြောက်ကျားတပ်ဖွဲ့ ၄၀၁ ဖွဲ့ရှိတယ်လို့ ကာကွယ်ရေးဝန်ကြီးဌာန ပြည်ထောင်စုဝန်ကြီးဦးရည်မွန်က ပြောဆိုပါတယ်။

စစ်အာဏာသိမ်းပြီးနောက် စစ်ကောင်စီတပ်တွေ နေ့စဥ်လိုလို ထိခိုက်သေဆုံးမှုတွေရှိနေပြီး ၁ နှစ်အတွင်းသေဆုံးသူ သောင်းနဲ့ချီရှိသွားပြီဖြစ်ပြီး တပ်ကနေထွက်ပြီး ပြည်သူနဲ့ပူပေါင်းခဲ့ကြတဲ့ အရာရှိတွေအပါအဝင် စစ်တပ်နဲ့ ရဲတပ်ဖွဲ့ဝင်တွေလည်း သောင်းနဲ့ချီရှိလာနေပြီဖြစ်ပါတယ်။

📌📌၅။ ရုရှား၏ထိုးစစ် အရှိန်မြင့်နေချိန်တွင် ယူကရိန်းက တိုက်လေယာဥ်များလက်ခံရရှိ

ယူကရိန်းနိုင်ငံတွင် ရုရှားတို့ပိတ်ဆို့ထားသည့် မာရီယူပိုးလ်မြို့မှ အရာရှိများက ၄င်း၏တပ်ဖွဲ့များသည် နာရီပိုင်းမဟုတ်ပါက နောက်ဆုံးနေ့ရက်များနှင့် ရင်ဆိုင်နေရကြောင်း ဧပြီလ ၂၀ ရက်က သတိပေးခဲ့ပြီး ယင်းမြို့တည်ရှိသည့် ယူကရိန်းအရှေ့ပိုင်းဒေသ၌ ရုရှားက ၄င်း၏ထိုးစစ်ကို အရှိန်မြှင့်တင်နေချိန်တွင် ယူကရိန်းသည် ရုရှား၏ကျူးကျော်မှုကို ခုခံရာတွင် အထောက်အကူဖြစ်စေမည့် တိုက်လေယာဥ်များကို လက်ခံရရှိခဲ့သည်။

အနောက်နိုင်ငံများသည် ဒွန်ဘက်စ်ဒေသထဲသို့ ထိုးဖောက်ချီတက်နေသည့် ရုရှာ၏ လုပ်ဆောင်မှုကို တုံ့ပြန်သည့်အနေဖြင့် ယူကရိန်းကို လက်နက်အသစ်များ ထောက်ပံ့ခဲ့ပြီး ရုရှားကို နိုင်ငံတကာအသိုင်းအဝိုင်းမှ ဖယ်ကြဥ်ထားမှုကို ပိုမိုတိုးမြှင့်ရန် တွန်းအားပေးလုပ်ဆောင်ခဲ့ကြသည်။

ယူကရိန်းသည် မကြာသေးမီက တိုက်လေယာဥ်များနှင့် ၄င်း၏လေတပ်အင်အားကို မြှင့်တင်နိုင်မည့် ပစ္စည်းအစိတ်အပိုင်းများလက်ခံရရှိခဲ့ပြီးဖြစ်ကြောင်း အမေရိကန်ကာကွယ်ရေးဝန်ကြီးဌာနက ပြောကြားခဲ့သော်လည်း လေယာဥ်အရေအတွက်အတိအကျနှင့် အမျိုးအစားများကို အသေးစိတ်ပြောကြားရန်ငြင်းဆိုခဲ့သည်။

အမေရိကန်ကမူ ယူကရိန်းကို စစ်ရေးအကူအညီ ဒေါ်လာသန်း ၈၀၀ ထပ်မံကူညီရေးကို အတည်ပြုရန် စီစဥ်နေသည်ဟု CNN သတင်းဌာနက ထုတ်ပြန်ခဲ့သည်။ ယူကရိန်းကို စစ်ရေးအကူအညီဒေါ်လာ သန်း ၈၀၀ ကူညီမည်ဟု ကြေညာခဲ့ပြီး သီတင်းတစ်ပတ်မပြည့်မီအချိန်မှာပင် နောက်ထပ် အကူအညီ သန်း ၈၀၀ ပေးရန် စီစဥ်ခဲ့ခြင်းဖြစ်သည်ဟု အမေရိကန်သမ္မတ ဂျိုးဘိုင်ဒင်၏အစိုးရအဖွဲ့ထဲမှ ထိပ်သီးအရာရှိသုံးဦး၏ ပြောကြားချက်ကို ကိုးကားပြီး CNN က သတင်းထုတ်ပြန်ခဲ့သည်။

#RadioNUGLocalNews

#SpringRevolution