28th MAY 2022 - (Ethnic language program-CHO_DAAI) by Radio NUG

📌(ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ မေလ ၂၈ ရက်နေ့ နောက်ဆုံးရပြည်တွင်းသတင်းများ 

📌📌၁။ အကြမ်းဖက်စစ်ကောင်စီက ဖွင့်လှစ်မည့်ကျောင်းများတွင် ပြန်လည်သင်ကြားမည့် Non-CDM နဲ့ ကူညီသူများကို အပြစ်ပေးအရေးယူမယ်လို့ မင်းတပ်မြို့နယ်ပြည်သူ့အုပ်ချုပ် ရေးအဖွဲ့ကြေညာ

အကြမ်းဖက်စစ်ကောင်စီက ဖွင့်လှစ်မည့်ကျောင်းများတွင် ပြန်လည်သင်ကြားမည့် Non-CDM နဲ့ ကူညီသူများကို အပြစ်ပေးအရေးယူမယ်လို့ မင်းတပ်မြို့နယ်ပြည်သူ့အုပ်ချုပ် ရေးအဖွဲ့ကမေလ၂၆ ရက်မှာ ကြေညာလိုက်ပါတယ်။

"အကြမ်းဖက်စစ်ကောင်စီက ဖွင့်လှစ်မည့်ကျောင်းများတွင် ပြန်လည်သင်ကြားမည့် Non-CDM ပညာရေးဝန်ထမ်းများနှင့် မြို့ပေါ်တွင်စစ်ကောင်စီပညာရေးလည်ပတ်ရန် ကူညီနေသူများကို ပြည်သူ့သစ္စာဖောက်များအဖြစ် သတ်မှတ်ပြီး အပြစ်ပေးအရေးယူမယ်" လို့ဆိုပါတယ်။

 

ဒါ့အပြင်ချင်းပြည်နယ် မင်းတပ်မြို့ရှိ စစ်ကောင်စီဖွင့်လှစ်မယ့် ကျောင်းများတွင်ကျောင်းအပ်နှံခြင်းမပြုဘဲ မင်းတပ်မြို့ ပြည်သူ့အုပ်ချုပ်ရေးအဖွဲ့မှ ဦးစီးဖွင့်လှစ်သည့် ပြည့်သူ့စာသင်ကျောင်းများတွင်သာ အပ်နှံကြရန်မင်းတပ်မြို့ နယ်၊ ပြည်သူ့အုပ်ချုပ်ရေးအဖွဲ့က နှိုးဆော်တိုက်တွန်းထားပါတယ်။

 

📌📌၂။ မင်းတပ် ၂၇၄ တပ်ရင်းမှ လက်နက်ကြီးများ ရမ်းသန်းပစ်ခတ်မှုကြောင့် ကလေးငယ်တစ်ဦး ခြေထောက်ပြတ်၊ မိခင်ဖြစ်သူ ဦးခေါင်းဒဏ်ရာရ

မေလ ၂၃ ရက် နံနက်အစောပိုင်းတွင် မင်းတပ်မြို့ နယ်မြေခံ ၂၇၄ တပ်ရင်းမှ လက်နက်ကြီးများ ရမ်းသန်းပစ်ခတ်မှုကြောင့် မဒပ်ကျေးရွာနေ အသက် (၁၀) နှစ်ဝန်းကျင် ကလေးငယ်တစ်ဦး ခြေထောက်တစ်ဖက်ပြတ်သွားပြီး မိခင်ဖြစ်သူမှာ ဦးခေါင်းဒဏ်ရာရကြောင်း မဒပ်ကျေးရွာ ဒေသခံတစ်ဦးက The Mindat Post သို့ပြောပါတယ်။

 

"ဒီနေ့ မနက်ပိုင်းမှာ ၂၇၄ ဖက်ကနေ လက်နက်ကြီးတွေနဲ့ ၆ ချက်လောက်ပစ်တယ်။ အိမ်ရှေ့မှာဆော့နေတဲ့ ကလေးကိုထိတာ ဒူးအောက်ပိုင်း ပြတ်သွားပါတယ်။ သူ့အမေက ခေါင်းကိုထိတာ၊ အိမ်တွေလည်း ရစရာမရှိအောင် ပျက်သွားတယ်၊ ခုကလေးကို အရေးပေါ်ဆေးရုံခေါ်သွားကြပြီ" လို့ အဆိုပါဒေသခံတစ်ဦးက ဆိုပါတယ်။

 

မေလ (၂၂) ရက် ညနေတွင် မင်းတပ်မြို့ အရှေ့ပြင်ရပ်ကွက် မီးသတ်ကုန်းတွင် နေရာယူသော စစ်ကောင်စီတပ်နှင့် CDF မင်းတပ်တို့ မိနစ် ၃ဝ ကြာ ပစ်ခတ်မှုရှိခဲ့ပြီး စစ်ကောင်စီတပ်သား ၂ ဦး သေဆုံးခဲ့ကြောင်း ထုတ်ပြန်ပါတယ်။ စစ်ကောင်စီ၏ လက်နက်ကြီးပစ်ခတ်မှုကိစ္စ ဆက်သွယ်စုံစမ်းကြည့်ရာ မဒပ်ကျေးရွာ၌ ဆေးခန်းများဖွင့်လှစ်ထား ရှိမှုကြောင့် စစ် ကောင်စီဖက်မှ ပစ်ခတ်ခြင်းဖြစ်ကြောင်း မင်းတပ်မြို့နယ်မြေခံတပ်ရင်း ၂၇၄က ဖြေရှင်းချက် ပေးထား ကြောင်း အဆိုပါဒေသခံတစ်ဦးက ဆက်ပြီးပြောပါတယ်။

 

မဒပ်ကျေးရွာသည် မင်းတပ်မြို့မှ ၁၀ မိုင်ခန့်သာကွာဝေးပြီး ပြီးခဲ့သည့်နှစ်က စစ်ဘေးရှောင်ပြည်သူများအတွက် အလံဖြူထောင်ရိက္ခာသယ်သည့် မဒပ်ကျေးရွာ လူငယ်တစ်ဦးကို စစ်ကောင်စီဖက်က ဖမ်းဆီးသည့်ဖြစ်ရပ်မျိုး ရှိခဲ့ဖူး ပါတယ်။

📌📌၃။ ပလက်ဝမှာ အေအေနဲ့ စစ်ကောင်စီတပ် တိုက်ပွဲဖြစ်

 

ချင်းပြည်နယ် ပလက်ဝမြို့နယ်ထဲမှာ စစ်ကောင်စီတပ်နဲ့ ရက္ခိုင့်တပ်တော်(အေအေ)တို့ မေလ ၂၆ ရက် မနက် ၁၀ နာရီကစလို့ တိုက်ပွဲ စဖြစ်နေတယ်ဆိုပြီး ဘီဘီစီသတင်းဌာနက ဖေါ်ပြထားတာတွေ့ရပါတယ်။ တိုက်ပွဲဟာ ပလက်ဝမြို့နယ်ထဲက အပေါင်စကျေးရွာအနီးမှာ ဖြစ်နေတာလို့လည်း ပလက်ဝဒေသခံတွေက ပြောပါတယ်။ ပလက်ဝမြို့ပေါ်ကနေ လက်နက်ကြီး ပစ်ခတ်သံကြားရာကနေ အပေါင်စကျေးရွာဘက်ကို ဆက်သွယ်မေးမြန်းချိန်မှာ အဲဒီရွာအနီး တိုက်ပွဲဖြစ်နေတာကိုသိရှိခဲ့ရတာလို့လည်း ပြောပါတယ်။

 

ရခိုင်ပြည်နယ်အတွင်းမှာ စစ်ကောင်စီရဲ့လှုပ်ရှားမှုတွေဟာ ၂၀၂၀ နို၀င်ဘာမတိုင်ခင် နှစ်ဖက် တိုက်ပွဲပြင်းထန်ခဲ့တဲ့ ကာလက စစ်ကြောင်းလှုပ်ရှားမှုတွေထက် ပိုဆိုးရွားနေတယ်ဆိုပြီး အေအေဘက်က ပြောဆိုတာ၊ နောက် နှစ်ဖက်တိုက်ပွဲတွေ ဖြစ်လာနိုင်တယ်ဆိုပြီး အေအေဘက်က ဒေသခံတွေကို သတိပေးတာတွေ ရှိခဲ့ပြီး စစ်ကောင်စီဘက်ကလည်း အေအေကရခိုင်မှာတိုက်ပွဲခေါ်နေတာဖြစ်ပြီး တပ်ကိုအဆိုးမဆိုနဲ့လို့ ပြောကြားလာအပြီးမှာ အခုတိုက်ပွဲပေါ်ပေါက်လာတာဖြစ်ပါတယ်။

 

📌📌၄။ ဒီမိုကရေစီလမ်းကြောင်းပေါ် မြန်မာ အမြန်ပြန်ရောက်ဖို့ QUAD အဖွဲ့ တိုက်တွန်း

 

ဂျပန်နိုင်ငံ တိုကျိုမြို့မှာ ကျင်းပနေတဲ့ အမေရိကန်၊ သြစတြေးလျ၊ အိန္ဒိယနဲ့ ဂျပန်နိုင်ငံတို့ ပါဝင်တဲ့ လေးနိုင်ငံ QUAD ထိပ်သီးညီလာခံက မြန်မာနိုင်ငံမှာ ဖြစ်ပျက်နေတဲ့ အခြေအနေတွေကို စိုးရိမ်တယ်လို့ ထုတ်ဖော်ပြောဆိုလိုက်ပြီး မြန်မာနိုင်ငံ ဒီမိုကရေစီလမ်းကြောင်းပေါ်ကို အမြန်ဆုံးပြန်လည်လျှောက်လှမ်းနိုင်ရေး အာဆီယံဘုံသဘောတူညီချက်ကို ချက်ချင်း အကောင်အထည်ဖော်ဆောင်ရွက်ဖို့ မေလ ၂၄ ရက်နေ့မှာ တိုက်တွန်းလိုက်တယ်လို့ အိန္ဒိယအခြေစိုက် ANI သတင်းမှာ ဖော်ပြပါတယ်။

 

QUAD အဖွဲ့ရဲ့ ထုတ်ပြန်တဲ့ကြေညာချက်မှာ မြန်မာနိုင်ငံက ဖြစ်ပျက်မှုတွေဟာ လူသားချင်းစာနာမှုဆိုင်ရာ ဆင်းရဲဒုက္ခတွေ ရင်ဆိုင်နေရတာ ဖြစ်တာကြောင့် ဒေသတွင်းတည်ငြိမ်ရေးနဲ့ လုံခြုံရေးကို ထိခိုက်မှာကို စိုးရိမ်ရတယ်လို့ ဆိုပါတယ်။ ကြေညာချက်မှာ အကြမ်းဖက်မှုတွေ ချက်ချင်းရပ်ဖို့၊ ဖမ်းဆီးထိန်းသိမ်းထားတဲ့ နိုင်ငံခြားသားတွေအပါအဝင် နိုင်ငံရေး အကျဉ်းသားတွေကို ချက်ချင်းလွှတ်ပြီး အပြုသဘောဆောင်တဲ့ တွေ့ဆုံဆွေးနွေးမှုတွေလုပ်ဖို့၊ လူသားချင်း စာနာမှုနဲ့ အကူ အညီတွေပေးပို့နိုင်ရေးခွင့်ပြုဖို့၊ ဒီမိုကရေစီလမ်းကြောင်းပေါ် ပြန်လည်လျှောက်လှမ်းနိုင်ဖို့ စတဲ့ အချက်တွေကို တောင်း ဆိုထားပါတယ်။ မြန်မာနိုင်ငံက ဒီအခြေအနေတွေ အဆုံးသတ်နိုင်ရေး အာဆီယံအသင်းရဲ့ ဆောင်ရွက်မှုကို QUAD အဖွဲ့က အလေးထားပြီး ပံ့ပိုးကူညီသွားမှာ ဖြစ်တယ်လို့လည်း ထုတ်ပြန်ချက်မှာ ဖော်ပြထားပါတယ်။

#RadioNUGLocalNews

#SpringRevolution