3rd JUN 2022 - (Ethnic language program-CHO_KAANG) by Radio NUG

📌(ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ ဇွန်လ ၃ ရက်နေ့နောက်ဆုံးရပြည်တွင်းသတင်းများ 

ပြည်တွင်းသတင်း 

📌📌၁။ အရပ်ဝတ် ၂၅ ဦးခန့် အပါအဝင် စစ်​ကောင်စီ တပ်သား အင်အား ၁၀၀ ဝန်းကျင် ​ယော​ဒေသမှ မင်းတပ်နယ်ဘက်သို့ စစ်ကြောင်းထိုး 

၂၀၂၂ ခုနှစ်၊ ဇွန်လ ( ၁ ) ရက်နေ့တွင် မင်းတပ်မြို့နယ်  တိုက်နယ်အမှတ်၂ အတွင်း စစ်ကောင်စီတပ်သား အင်အား ( ၁၀၀ ) ကျော် ဝင်ရောက် စစ်​ကြောင်း ထိုးလာတာကြောင့် ​ကျေးရွာ​ဒေသခံများ နှင့် စစ်ဘေးရှောင်များ ထပ်မံ ထွက်​ပြေး​နေကြရ​ကြောင်း မင်းတပ်မြို့နယ် စစ်​ဘေး​ရှောင် စီမံခန့်ခွဲ​ရေး ​​ကော်မတီက သတင်းထုတ်ပြန်ထားသည်။

စစ်​ကောင်စီတပ်များသည် ချင်း​တောင်​ခြေ က​လေး၊ ဂန့်​ဂေါစသည့် ​စစ်ကိုင်း နှင့် ယော​ဒေသ တ​ကြောကိုအပြင်းအထန် စစ်​ကြောင်းထိုးလျက်ရှိပြီး နှစ်ဘက်ထိခိုက်​သေဆုံးမှု ရှိကြောင်းသတင်းရရှိပါသည်။ 

📌📌၂။ ကလေးမြို့နယ်တောင်ပိုင်း ၂ ရက်တာတိုက်ပွဲဖြစ် စကစဘက်မှ (၇) ဦးခန့်သေဆုံးပြီး PDF(Kalay) မှရဲဘော် (၁) ဦးကျဆုံး

ဒေသကာကွယ်ရေးပူးပေါင်းတပ်ဖွဲ့ဖြစ်သည့် CNDF၊ PDF (Kalay) နှင့် ပ က ဖ  တို့သည် စကစတပ်ဖွဲ့၀င်များနှင့် ကလေးမြို့နယ်တောင်ပိုင်းနတ်ချောင်းကျေးရွာတွင်မေလ (၃၁) ရက်နေ့နှင့် ဇွန်လ (၁) ရက်နေ့တို့တွင် (၂) ရက် တာတိုက်ပွဲဖြစ်ပွားခဲ့ကြောင်းသိရသည်။

အဆိုပါတိုက်ပွဲအတွင်းတွင်စကစဘက်မှ ၇ ဦးခန့်သေဆုံးပြီး ဒေသကာ ကွယ်ရေးပူးပေါင်းတပ်ဖွဲ့များဖြစ်သည့် CNDF နှင့် PDF (Kalay) မှ ရဲဘော်(၁)ဦးကျဆုံးသွားပြီး ၂ ဦးဒဏ်ရာရရှိခဲ့သည်။ ဆက်လက်၍ နတ်ချောင််းကျေးရွာအတွင်းရှိနေအိမ်များကိုလည်း စကစတပ်ဖွဲ့၀င်များမှမီးရှို့ဖျက်စီးခဲ့ကြကြောင်းသိရသည်။

📌📌၃။ ICNCC က ချင်း ပဋိညာဥ်မူကြမ်း ထွက်ရှိလာရေးကြိုးပမ်း၊ အားလုံး၏ သဘောတူညီမှုများစုစည်းကာ အတည်ပြုပြဌာန်းနိုင်ရေး ဆောင်ရွက်သွားမည် ဟုဆို

၂၀၂၂ ခုနှစ်၊ မေလ ( ၃၀ ) နေ့တွင် ကြားကာလ ချင်းအမျိုးသားအတိုင်ပင်ခံကောင်စီ တစ်ခုတည်းသော ချင်း ပဋိညာဥ်မူကြမ်း (Single Text Draft) ထွက်ရှိလာရန် ကြိုးပမ်းလျက်ရှိပြီး ထွက်ရှိလာသောအခါ ချင်းတော်လှန်ရေးအင်အားစုများနှင့် တူညီမှုများကိုစုစည်း၍ အတည်ပြုပြဌာန်းနိုင် ရေး ဆောင်ရွက်သွားမည်ဖြစ်ကြောင်း သတင်းထုတ်ပြန်ချက် (၄/၂၀၂၂) ဖြင့် ထုတ်ပြန်လိုက်သည်။

အဆိုပါ ထုတ်ပြန်ချက်တွင် ကြားကာလ ချင်းအမျိုးသားအတိုင်ပင်ခံကောင်စီသည် ကြားကာလ ချင်းပြည်အစိုးရဖွဲ့စည်းပေါ်ပေါက်နိုင်ရေးအပါအဝင် ကြားကာလ အုပ်ချုပ်ရေး၊ ဥပဒေပြုရေးနှင့် တရားစီရင်ရေးလုပ်ငန်းများ ဆောင်ရွက်နိုင်ရန် ဖက်ဒရယ်ဒီမိုကရေစီစနစ်ကို အခြေခံထားသည့် ချင်း ပဋိညာဥ်ရရှိနိုင်ရေးအတွက် ချင်း ပဋိညာဥ်မူကြမ်းရေးဆွဲ ရေးကော်မတီကို ဖွဲ့စည်းကာ လုပ်ငန်းများဆောင်ရွက်ခဲ့ကြောင်း သိရသည်။ 

ICNCC သို့ ပေးပို့တင်ပြလာသည့် မူကြမ်းများကို စိစစ်သုံးသပ်ကာ တစ်ခုတည်းသောမူကြမ်း (Single Text Draft) အဖြစ် စုစည်းရရှိနိုင်ရေးအတွက် ၂၄/၅/၂၀၂၂ ရက်နေ့ ကျင်းပပြုလုပ်သည့် ကောင်စီ၏ ပုံမှန်အစည်းအဝေး (၅/၂၀၂၂) တွင် ချင်း ပဋိညာဥ်မူကြမ်းများ စုစည်းရေး လုပ်ငန်းကော်မတီကို အစုအဖွဲ့အသီးသီးမှ ကိုယ်စားပြုကောင်စီဝင် နှစ်ဦးစီ (စုစုပေါင်း ရှစ်ဦး) ဖြင့် ဖွဲ့စည်း တာဝန်ပေးအပ်ထားပြီးဖြစ်ကြောင်း သိရသည်။  

📌📌၄။ ကန်ပက်လက်မြို့နယ်ရှိ ဒါးရင်ဒူးစစ်ဘေးရှောင်စခန်းများတွင် ကလေးငယ်(၇)ဦးခန့်သေဆုံး ခဲ့ပြီဖြစ်ကာ ဆေးဝါးများနှင့်စားနပ်ရိက္ခာများ၊ မိုးကာများ၊ အနွေးထည်များ၊ အရေးပေါ်လိုအပ်

ချင်းပြည်နယ်တောင်ပိုင်း၊ ကန်ပက်လက်မြို့နယ်အတွင်းရှိ ဒါးရင်ဒူးဒေသ စစ်ဘေးရှောင်စခန်းများတွင် စစ်ဘေးရှောင် ကလေးငယ်(၇)ဦးခန့်သေဆုံးခဲ့ပြီဖြစ်ကာ ဆေးဝါးများနှင့် စားနပ်ရိက္ခာများ မိုးကာများ၊ အနွေးထည်များ၊ အရေးပေါ်လိုအပ်နေကြောင်း ထန်းကုန်း စစ်ဘေး ရှောင်စခန်းတာဝန်ခံတစ်ဦး၏ ပြောကြားချက်အရသိရသည်။

ယခုလက်ရှိတွင် အဆိုပါ ဒါးရင်ဒူးဒေသဒေသစစ်ဘေးရှောင်စခန်းများတွင် ကန်ပက်လက် မြို့ပေါ်မှ စစ်ဘေးရှောင်ပြည်သူများနှင့် ကျင်ဒွေးအနီးမှစစ်ဘေးရှောင်သူ စုစုပေါင်း (၃၀၀) ကျော်ရှိပြီး ကိုယ်ဝန်ဆောင်မိခင် (၂၅) ဦးနှင့် နို့စို့အရွယ် ကလေး(၇၀)ဦးရှိတယ်လို့ သိရပြီး ယခုလက်ရှိတွင် စစ်ဘေးရှောင်အတွက် စားနပ် ရိက္ခာများလိုအပ်လျက်ရှိကြောင်း ၎င်းကဆက်လက်ပြောကြားသည်။

ကန်ပက်လက်မြို့နယ်အတွင်း စစ်ကောင်စီတပ်ဖွဲ့ဝင်များနှင့် ပြည်သူ့ကာကွယ်ရေး တပ်ဖွဲ့ဝင်များအကြားဖြစ်ပွားသည့် တိုက်ပွဲများကြောင့် ဒေသခံပြည်သူများ ထောင်ချီ ထွက်ပြေး တိမ်းရှောင်နေရပြီး ထိုများအထဲမှ ဆေးဝါးလိုအပ်ချက်များကြောင့် ကိုယ်ဝန်ပျက်ကျပြီး သေဆုံးသွားသောကလေးငယ်များနှင့် နို့စို့အရွယ်ကလေးငယ်များ (၇) ဦးခန့်သေဆုံးသွားပြီဖြစ်ကြောင်း သိရသည်။

📌📌၅။ မြန်မာစစ်တပ်က ကယားနဲ့ကရင်ပြည်နယ်တို့မှာ စစ်ရာဇဝတ်မှုတွေ ကျူးလွန်နေတယ်လို့ အေအိုင်အဖွဲ့ ပြော

အာဏာသိမ်းမှုဖြစ်ပြီးနောက်ပိုင်း ကယား(ကရင်နီ)နဲ့ ကရင်ပြည်နယ်တို့မှာ မြန်မာစစ်တပ်ရဲ့ စစ်ရေးတိုက်ခိုက်မှုတွေဟာ စစ်ရာဇဝတ်မှုတွေ ပါဝင်နေတဲ့အပြင် လူသားမျိုးနွယ်ပေါ်ကျူးလွန်တဲ့ရာဇဝတ်တွေပါ ပါဝင်နိုင်ချေရှိနေတယ်လို့ နိုင်ငံတကာလွတ်ငြိမ်းချမ်းသာခွင့်အဖွဲ့(အေအိုင်)က ပြောလာပါတယ်။

စစ်တပ်ဟာ အဲဒီပြည်နယ် ၂ ခုမှာ ပြီးခဲ့တဲ့လတွေအတွင်း တရားမဲ့သတ်ဖြတ်တာ၊ အကြောင်းမဲ့ဖမ်းဆီးတာနဲ့ အရပ်သားတွေမနေနိုင်အောင်လုပ်တာလို ရက်စက်မှုတွေကို ကျယ်ကျယ်ပြန့်ပြန့် ကျူးလွန်နေတယ်လို့လည်း အေအိုင်အဖွဲ့က မေလ ၃၁ ရက်မှာ ထုတ်ပြန်တဲ့ အစီရင်ခံစာမှာရေးသားဖော်ပြပါတယ်။

#RadioNUGLocalNews

#SpringRevolution