15th JUL 2022 - (Ethnic language program-CHO_KAANG) by Radio NUG

📌 (ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ ဇူလိုင်လ ( ၁၅ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ တိုက်ပွဲအတွင်း သေဆုံးသော စစ်ကောင်စီအလောင်းများကို CDF - Matupi မှ သဂြိုလ်ပေး

လွန်ခဲ့သောရက်ပိုင်း ၂၀၂၂ ခုနှစ်၊ ဇူလိုင်လ (၆ - ၇) ရက်နေ့ တိုက်ပွဲအတွင်း သေဆုံးသော စစ်ကောင်စီအလောင်းများ လမ်းဘေးနှင့် လူနေအိမ် အောက်များ၌ ပစ်ထားခဲ့သော အလောင်းများကို CDF - Matupi မှ သဂြိုလ်ပေးခဲ့သည်။ လိုင်လင်းပီ နှင့် အာရူရွာ ကြားတွင် စစ်ကြောင်း၌ပါလာသော စကစ ရဲဘော်များအချင်းချင်း သတ်ဖြတ်ကြပြီး ရဲဘော် (၂) ဦး သတ်ဖြတ်ခဲ့ပြီး ၊ ရဲန်ခဲန်းရွာနှင့် အမ်လိုင်းရွာကြား လူနာ (၂) ဦးအား ထပ်မံသတ်ဖြတ်ခဲ့ကြောင်း CDF - Matupi မှ ထုတ်ပြန်ထားပါသည်။

အကြမ်းဖက်စကစနှင့် CDF-Matupi တို့သည် ၂၀၂၂ခုနှစ် ဇူလိုင်လ ၁၁ ရက်နေ့တွင် မတူပီ CDF တပ်ရင်း ( ၂ ) နယ်မြေ စောင်ထီးယားကျေးရွာနှင့်လုံတုမ်းကျေးရွာကြားတွင် ထိတွေ့တိုက်ပွဲဖြစ်ပွားခဲ့ရာ စကစဘက်မှ (၄) ဦးသေဆုံးပြီး (၂) ဦးထက်မနည်းဒဏ်ရာရရှိကာ CDF-Matupi ဘက်မှအထိခိုက်အကျဆုံးမရှိဘဲ အောင်မြင်စွာဆုတ်ခွာနိုင်ခဲ့ကြောင်းသိရသည်။

📌📌 ၂။ CDF ကန်ပက်လက်က မြို့တွင်း ပျောက်ကြားစစ်ဆင်ရေးပြုလုပ်နေ၊ စစ်ကောင်စီဘက် ထိခိုက်သေဆုံးမှုရှိ

CDF ကန်ပက်လက်က ယခုရက်ပိုင်းတွင် မြို့တွင်း ပျောက်ကြားစစ်ဆင်ရေးပြုလုပ်နေ​ပြီး စစ်ကောင်စီဘက် ထိခိုက်သေဆုံးမှုရှိ ကြောင်း ဇူလိုင်လ ၁၂ ရက်နေ့တွင် သတင်းထုတ်ပြန်သည်။ ၁၁-၇-၂၀၂၂ ရက်နေ့က ကန်ပက်လက်မြို့၊ အထွေထွေအုပ်ချုပ်ရေးဦးစီးဌာနတွင်တပ်စွဲ ထားသော အကြမ်းဖက် စစ်ကောင်စီတပ်ဖွဲ့နှင့် CDF-Kanpetlet တို့အကြား တိုက်ပွဲဖြစ်ပွားခဲ့ရာ CDF ကန်ပက်လက်ဘက်မှ အထိအခိုက်မရှိဘဲ ပြန်လည်ဆုတ်ခွာနိုင်ခဲ့ကြောင်းသိရသည်။

၁၂-၇-၂၀၂၂ ရက်နေ့တွင်လည်း ကန်ပက်လက်မြို့၊ မြို့နယ်ပညာရေးရုံးနှင့် မြို့နယ်အခြေခံပညာအထက်တန်း ကျောင်းတို့တွင် တပ်စွဲထားသော အကြမ်းဖက်စစ် ကောင်စီတပ်ဖွဲ့များနှင့် CDF-Kanpetlet တို့အကြား   တိုက်ပွဲပြန်လည်ဖြစ်ပွားခဲ့ရာ စစ်ကောင်စီဘက်မှ (၂) ဦး သေဆုံး၍ CDF ကန်ပက်လက်ဘက်မှ အထိအခိုက်မရှိဘဲ ပြန်လည်ဆုတ်ခွာခဲ့ ကြောင်း သတင်းထုတ်ပြန်ချက်တွင်ပါရှိသည်။

📌📌 ၃။ ကလေးတောင်ပိုင်းတွင်အကြမ်းဖက်စကစတပ်နှင့် CNDF CDF PDF အခြားကာကွယ်ရေးပူးပေါင်းအဖွဲ့ (၃) ဖွဲ့ တို့ (၃) ရက်ကြာတိုက်ပွဲဖြစ် ၊ စကစဘက်မှ (၄၀)ကျော်သေဆုံး

ကလေးတောင်ပိုင်းတွင် အကြမ်းဖက်စကစတပ်နှင့် CNDF၊ PDF-Kalay၊ CDF-KKG၊ RKDF ၊UGF Kalay နှင့် ပကဖကကွယ်ရေးပူးပေါင်းတပ်တို့သည် ၂၀၂၂ ဇူလိုင်လ (၁၁) ရက်နေ့ မှ (၁၃) ရက်နေ့အထိ (၃) ရက်ကြာ တိုက်ပွဲပြင်းထန်စွာဖြစ်ပွားခဲ့ကြောင်းသိရသည်။

ဇူလိုင် (၁၁)ရက်နေ့တွင် အင်အား (၁၂၀) ခန့်ရှိသည့်စကစတပ်ဖွဲ့များသည် ဟားခါးလေးရွာသို့ဝင်ရောက်ချိန် ကာကွယ်ရေးပူးပေါင်းတပ်ဖွဲ့များနှင့်ထိပ်တိုက်ပစ်ခတ်မှုဖြစ်ပွားခဲ့ပါသည်။ ဇူလိုင်လ(၁၂)ရက်နေ့တွင်လည်း အဆိုပါစစ်ကြောင်းသည် စည်သာရွာတောင်ခြေဘက်ရှိ ဘိုးဘွားရိပ်သာအကြားတွင် ကာကွယ်ရေးပူးပေါင်းတပ်ဖွဲ့များနှင့် ထပ်မံပစ်ခတ်မှုဖြစ်ပွားခဲ့ကြောင်းသိရသည်။

ဇူလိုင်လ(၁၃)ရက်နေ့တွင် စကစတပ်များထောက်ကြန့်ကျေးရွာအရောက် CNDF နှင့် ကာကွယ်ရေးပူးပေါင်းတပ်ဖွဲ့များမှ မိုင်းဆွဲတိုက်ခိုက်ခြင်း၊ လက်နက် ကြီး၊ငယ်များဖြင့် ပစ်ခတ်မှုကြောင့် ဆက်လက်တိုက်ပွဲပြင်းထန် ခဲ့ပြီးစကစ၏ပစ်ခတ်မှုကြောင့် အရပ်သားအမျိုးသမီးတစ်ဦး ထိခိုက်ဒဏ်ရာရရှိကာ PDF-Kalay မှရဲဘော်တစ်ဦးကျဆုံးခဲ့ကြောင်းသိရသည်။ (၃)ရက်ကြာတိုက်ပွဲအတွင်း စကစဘက်မှ စစ်သား (၄၀) ကျော်သေဆုံးပြီး ဒဏ်ရာအများအပြားရရှိခဲ့ကြောင်း CNO ၏ထုတ်ပြန်ချက်အရ သိရသည်။

📌📌 ၄။ မြဝတီ-ဝေါ်လေ ကားလမ်းမပေါ်တိုက်ပွဲ စစ်ကောင်စီတပ် အသေအဆုံးများ၊ လက်နက်ခဲယမ်း အမြောက်အမြား သိမ်းဆည်းရမိ

 

ကရင်ပြည်နယ်၊ မြဝတီ-ဝေါ်လေ ကားလမ်းမပေါ်တွင် စစ်ကောင်စီ၏ တပ်မ ၄၄ လက်အောက်ခံ ခလရ ၈ စစ်ကြောင်းကို ကော်ဘရာစစ်ကြောင်းက တိုက်ခိုက်ရာ စစ်ကောင်စီတပ်ဘက်မှ တပ်ရင်းမှူး၊ ဒုတပ်ရင်းမှူး အပါအဝင် တပ်ဖွဲ့ဝင်အများအပြား သေဆုံးပြီး လက်နက်ခဲယမ်း အမြောက်အမြားကို သိမ်းဆည်းရမိခဲ့ကြောင်း ကော်ဘရာစစ်ကြောင်းက ဓာတ်ပုံများနှင့်တကွ သတင်းထုတ်ပြန်လာသည်။ ဇူလိုင်လ ၁၂ ရက်နေ့တွင် တိုက်ပွဲဖြစ်ပွါးခဲ့ခြင်းဖြစ်ကြောင်း၊ တိုက်ပွဲအတွင်း ကော်ဘရာစစ်သည် ၃ ဦး ပွန်းပဲ့ဒဏ်ရာရရှိခဲ့ကြောင်း သိရသည်။

 

ကော်ဘရာစစ်သည်များ နယ်မြေရှင်းလင်းရေး ဆောင်ရွက်လျက်ရှိပြီး ကနေဦး အနေဖြင့် RPG ဗုံးသီး ၂၆ လုံး၊ RPG ပို့ယမ်း ၂၁ တောင့်၊ ရှေ့ထွက်မိုင်း ၁ လုံး၊ နင်းမိုင်း ၂၁ လုံး ၊ လက်ပစ်ဗုံး ၁၇ လုံး၊ စကုတ် ၂ ခု၊ မိုင်းရှာစက် ၁ ခု၊ ၄၀ မမ ၃၁ လုံး၊ဖြိုခွင်းရေး ယမ်းမဲ ၇ ချောင်း၊ ၆၀ မမ ၂၉ လုံး၊ အီနာဂါ  ၂၂ လုံး၊ ၅.၅၆ ကျည် ၅၀၀၀၊ စက်လတ်ကျည် ၃၀၀၀ MA - 1  ၁လက်၊ ဂျန်ဘာစက် ၁ ခု၊ ငွေ သိန်း ၂၀ နှင့်အတူ စစ်ရေး အသုံးအဆောင်ပစ္စည်းများစွာ သိမ်းဆည်းရမိခဲ့ကြောင်း ကော်ဘရာ စစ်ကြောင်း၏ ထုတ်ပြန်ချက်တွင် ဖော်ပြထားသည်။ 

📌📌 ၅။ မြန်မာ့အရေးဖိအားပေးကြဖို့ တရုတ်နဲ့အာဆီယံကို အမေရိကန်နိုင်ငံခြားရေးဝန်ကြီး တိုက်တွန်း

အမေရိကန်ပြည်ထောင်စုအနေနဲ့ မြန်မာအာဏာသိမ်းစစ်ကောင်စီအပေါ်၊ ဖိအားပေးမှာဖြစ်ပြီး၊ တရုတ်ပြည်အနေနဲ့လည်း ဖိအားပေးရေးသဘောတူညီချက်မှာ ပါဝင်သင့်ကြောင်း အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် က ပြောဆိုလိုက်ပါတယ်။ ထိုင်းနိုင်ငံကိုရောက်ရှိနေစဉ်အတွင်း မြန်မာ့ဒီမိုကရေစီရေးတက်ကြွလှုပ်ရှားသူတွေနဲ့ တွေ့ဆုံရာမှာ ပြောဆိုခဲ့တာပါ။

မြန်မာစစ်ကောင်စီအပေါ် အမေရိကန်ရဲ့ ပိတ်ဆို့အရေးယူ ဖိအားပေးရေး မဟာဗျူဟာ အနေနဲ့ ရလဒ်ကောင်းတွေ မရရှိခဲ့ပေမယ့် အမေရိကန်အစိုးရကတော့၊ ယူကရိန်းကို ရုရှားကျူးကျော်မှုကိစ္စနဲ့ ရင်ဆိုင်နေရတဲ့တိုင် ဝါရှင်တန်အနေနဲ့ မြန်မာ့အရေးကို ဦးစားပေးကိစ္စတွေထဲမှာ ထည့်သွင်းထားတာဖြစ်ကြောင်း၊ အဖိနှိပ်ခံနေရဆဲ ဖြစ်တဲ့ မြန်မာပြည်သူတွေအတွက် တခြားနိုင်ငံတွေနဲ့အတူ အပြုသဘောဆောင်လှုပ်ရှားမှုတွေနဲ့  ဒီမိုကရေစီ လမ်းကြောင်းကို ဆက်လက် လျှောက်လှမ်းသွားမှာဖြစ်ကြောင်းလည်း အမေရိကန်နိုင်ငံခြားရေးဝန်ကြီး ဘလင်ကင် က ဆက်လက်ပြောဆိုခဲ့ပါတယ်။ 

မကြာခင်ကပဲ မြန်မာနိုင်ငံက လူငယ်တချို့နဲ့အတူ ထိုင်မှာစကားပြောခွင့်ရခဲ့လို့ မြန်မာ့ဒီမိုကရေစီရဲ့ ရှေ့ရေးအနာဂတ်နဲ့ပတ်သက်ပြီး သူတို့ရဲ့အမြင်သဘောထားတွေ မေးမြန်းခွင့်ရခဲ့ကြောင်း၊ လူငယ်တွေ NUG အမျိုးသားညီညွတ်ရေးအစိုးရနဲ့အတူ မြန်မာပြည်သူတွေရဲ့ကိုယ်စားလှယ် အစစ်အမှန်တွေနဲ့အတူ ပူးပေါင်းဆောင်ရွက် နေကြကြောင်း၊ မိမိတို့ဆက်လက်ဆောင်ရွက်သွားမှာဖြစ်ကြောင်းလည်း အမေရိကန်နိုင်ငံခြားရေးဝန်ကြီး ဘလင်ကင်က ပြောဆိုပါတယ်။

#RadioNUGLocalNews

#SpringRevolution