27th AUG 2022 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ သြဂုတ်လ ( ၂၇ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့မှ မြို့နယ်ခြားသို့ သွားလိုလျှင် ရဲစခန်းထောက်ခံချက်၊ မှတ်ပုံတင်ပြနိုင်မှ စစ်ကောင်စီက ခွင့်ပြုမည်

မင်းတပ်မြို့ပေါ်ကနေ မြို့နယ်ခြားကို ခရီးသွားလာလိုပါက ရဲစခန်းထောက်ခံချက်၊ မှတ်ပုံတင်ကဒ်တို့ ပြနိုင်မှ စစ်ကောင်စီက သွားလာခွင့်ပြုတာဖြစ်တယ်လို့ ဒေသခံပြည်သူတွေက ပြောကြပါတယ်။ ယခင်က မှတ်ပုံတင်ကဒ်ပြားနဲ့ သွားလာနိုင်ပေမယ့် ယခုမင်းတပ်မြို့မှ မြို့နယ်ရပ်ခြားကို ခရီးသွားမယ်ဆိုရင် ရဲစခန်းထောက်ခံချက်ပါ ပါရှိရမယ်လို့ စစ်ကောင်စီဘက်က ထုတ်ပြန်လိုက်တာပါ။

“အရင်ကလို မှတ်ပုံတင်ပဲရှိရုံနဲ့ ကားစီးမရတော့ဘူး၊ ထောက်ခံချက်ပါလိုတာ၊ ခုတလောတော့ မင်းတပ်ကနေ အောက်ပြည်ဘက် တစ်ပတ်ကို ၅ ကြိမ်လောက်တော့ ကားထွက်ပါတယ်” လို့ ဒေသခံတစ်ဦးက The Mindat Post သတင်းဌာနကို ပြောပါတယ်။

စစ်ကောင်စီက ခရီးသည်တင်မော်တော်ယာဥ်ပေါ် လူဦးရေကန့်သတ်ထားမှုကြောင့် ယာဥ်လိုင်းအများစုမှာ ကုန်တင်ယာဥ် အဖြစ်သာ အသုံးပြုနေရတာလို့ အဲဒီ သတင်းရင်းမြစ်က ဆက်ပြောပါတယ်။ ပြီးခဲ့တဲ့ ရက်ပိုင်းအတွင်းကလည်း မင်းတပ် - ပခုက္ကူ ခရီးသည်တင် မော်တော်ယာဥ်တစ်စီးကို နယ်မြေခံတပ်ရင်း ၂၇၄ ကုန်းမှာ ယာဥ်မောင်းနဲ့အတူ ဖမ်းဆီး စစ်ဆေးတယ်ဆိုတဲ့ သတင်းထွက်ပေါ်နေပေမယ့် The Mindat Post သတင်းဌာန အနေဖြင့် သီးခြား အတည်ပြုနိုင်ခြင်း မရှိပါ။ လက်ရှိ မင်းတပ်မြို့ပေါ်မှာ စစ်ကောင်စီက ကုန်တင်ယာဥ် သွားလာမှုများ ကန့်သတ်ခံတာမျိုးရှိနေတာကြောင့် ကုန်ပစ္စည်း တချို့ ဈေးနှုန်းမြင့်တက်နေတယ်လို့လည်း ဒေသခံပြည်သူတွေက ပြောပါတယ်။

📌📌 ၂။ YDF ထီးလင်းက ချုံခိုတိုက်ခိုက်သဖြင့် စစ် ကောင်စီတပ်သားများ ဖရိုဖရဲထွက် ပြေး၊ ၅ ဦးထက်မနည်းသေ

ယော ဒေသ ကာကွယ် ရေးတပ်ဖွဲ့ YDF ထီးလင်းက ချုံခိုတိုက်ခိုက် သဖြင့် စစ် ကောင်စီတပ်သားများ ဖရိုဖရဲ ထွက် ပြေးခဲ့ပြီး ၅ ဦးထက်မနည်းသေဆုံး တယ်လို့ YDF ထီးလင်းက သြဂုတ်လ ၂၄ ရက်နေ့ ရက်စွဲနဲ့ ထုတ်ပြန်လာပါတယ်။ ထီးလင်းမြို့နယ်၊ ရွှေခုံတိုင်ကျေးရွာမှာ ညအိပ်ပြီး ထွက်လာတဲ့ အင်အား ၁၀၀ ဝန်းကျင်ရှိတဲ့ စစ်ကောင်စီ စစ်ကြောင်းကို ရွှေခုံတိုင်ကျေးရွာ၏တောင်ဘက် ၃မိုင်ခန့်အကွာ ၊ ၂၄.၈.၂၀၂၂ ရက် နေ့ ၊ နံနက် ၈ နာရီခန့်မှာ YDF ထီးလင်း (တပ်ရင်း - ၇၊ ၈) က အနီးကပ် ချုံခိုတိုက်ခိုက်ခဲ့ တာပါ။

အဲဒီ တိုက်ခိုက်မှုမှာ စစ်ကောင်စီတပ်သား ၅ ဦးထက်မနည်း သေဆုံးကာ ဒဏ်ရာရရှိသူအများအပြားရှိနိုင်တယ်လို့ သိရပါတယ်။ YDF ထီးလင်းဘက်မှာ အထိခိုက်မရှိ အောင်မြင်စွာဆုတ်ခွာနိုင်ခဲ့ပြီး ညနေ ၃ နာရီခွဲခန့်အချိန်တွင် စစ်ကောင်စီ စစ်ကြောင်းသည် လူနာအထမ်း ၄ ခု နဲ့အတူ ပဇင်းချောင်ရွာထဲ ဝင်ရောက်ပြီဖြစ်တယ်လို့ YDF ထီးလင်း သတင်းမှန် ပြန်ကြားရေး ဌာနက ထုတ်ပြန်ထားပါတယ်။

📌📌 ၃။ Non CDM ဝန်ထမ်း ၉၅ ဦးကို အမျိုးသားသစ္စာ ဖောက် အမည်ပျက်စာရင်းသွင်းကြောင်း မင်းတပ် ပအဖ ကြေညာ

Non CDM ဝန်ထမ်း ၉၅ ဦးကို အမျိုးသားသစ္စာ ဖောက်အဖြစ်သတ်မှတ်ပြီး အမည်ပျက်စာရင်းသွင်းလိုက်ကြောင်း မင်းတပ် မြို့နယ်ပြည်သူ့အုပ်ချုပ် ရေးအဖွဲ့က ဩဂုတ်လ ၂၄ ရက်၊ ယ နေ့ ရက်စွဲနဲ့ ထုန်ပြန်ကြေညာလိုက်ပါတယ်။

သြဂုတ် ၂၀ (၁၁:၄၅) ချိန်မှာ ကျင်းပပြုလုပ်တဲ့ မြို့နယ်ပြည်သူ့အုပ်ချုပ် ရေးအဖွဲ့ ၊ CDF မင်းတပ်၊ ပညာ ရေးဘုတ်အဖွဲ့နှင့် MUSU တို့ တွေ့ဆုံညှိနှိုင်းအစည်းအ ဝေးဆုံးဖြတ်ချက် ၂ (က) အရ၊ မင်းတပ်မြို့ ပေါ်ရှိ အထက ၁၊ အထက ၃ နှင့် အထက (ခွဲ) တပ် မြေကျောင်းများတွင် သင်ကြားလျက်ရှိတဲ့ ဆရာ/ဆရာမ ၉၅ ဦးအား အကြမ်းဖက်စစ် ကောင်စီနဲ့ ပူး ပေါင်း ဆောင်ရွက်တဲ့ အမျိုးသားသစ္စာ ဖောက် အမည်ပျက်များအဖြစ် ပထမအကြိမ် မှတ်တမ်းစာရင်းထည့်သွင်း ကြေညာ လိုက်တယ်လို့ အဲဒီကြေညာချက်မှာ ဖော်ပြထားပါတယ်။

ဆက်လက် ပြီး မင်းတပ်မြို့နယ်အတွင်း စစ်ကောင်စီနဲ့ ပူးပေါင်းတဲ့ ဌာနဆိုင်ရာဝန်ထမ်း တွေကို အမည်ပျက်စာရင်းအဖြစ် ဆက်လက်ထုတ်ပြန်သွားမယ်လို့လည်း မင်းတပ်မြို့နယ် ပြည်သူ့အုပ်ချုပ် ရေးအဖွဲ့က ဆိုပါတယ်။

📌📌 ၄။ လက်နက်ဆက်ကိုင်ချင်သည့် EAO များကို စစ်တပ်ထဲ ဝင်ခွင့်ပြုမည်ဟု စစ်ခေါင်းဆောင်ပြော

တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ထိုးပြီး တိုင်းရင်းသားလက်နက်ကိုင်အဖွဲ့ (EAO) များအနေဖြင့် လက်နက်ဆက်ကိုင်ချင်ပါက မြန်မာစစ်တပ်နှင့် နယ်ခြားစောင့်တပ် (BGF) ထဲ ဝင်ခွင့်ပြုမည်ဖြစ်ကြောင်း အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောသည်။

ဩဂုတ် ၂၂ ရက်က နေပြည်တော်တွင် ပြုလုပ်သည့် စစ်ကောင်စီ၏ အစိုးရအဖွဲ့အစည်းအဝေး၌ ၎င်းက NCA လက်မှတ်ထိုးပြီးနောက် ဆက်လက်ဆောင်ရွက်ရမည့်ကိစ္စနှင့် ပတ်သက်၍ ထိုသို့ပြောဆိုခဲ့ခြင်း ဖြစ်သည်။

သို့သော် ပြည်သူများ ထိခိုက်နစ်နာမှုရှိလာပါက နစ်နာသူများတောင်းဆိုလျှင် ဥပဒေနှင့်အညီ ဆောင်ရွက်ရမည် ဖြစ်ကြောင်း စစ်ခေါင်းဆောင်က ပြောသည်။ ဆက်လက်၍ EAO များအနေဖြင့် တိုင်းရင်းသားအခွင့်အရေး၊ ဒေသ အခွင့်အရေး ရရှိရန်အတွက် နိုင်ငံရေးစင်မြင့် လွှတ်တော်တွင် ဆွေးနွေးဆောင်ရွက်နိုင်မည်ဖြစ်ပြီး စီးပွားရေး လုပ်ငန်းများ ဆောင်ရွက်လိုပါကလည်း ဥပဒေနှင့် ညီညွတ်သည့်လုပ်ငန်းများ ဆောင်ရွက်နိုင်ရေး ကူညီပေးမည်ဖြစ်ကြောင်း ဆိုသည်။

လက်ရှိတွင် မြန်မာတနိုင်ငံလုံး ငြိမ်းချမ်းရေးရရှိရန် NCA စာချုပ်အတိုင်း အလေးထားလုပ်ဆောင်နိုင်ရေးအတွက် EAO များအား ဖိတ်ခေါ်ဆောင်ရွက်နေပြီး EAO များနှင့် သဘောတူညီချက်ရယူနိုင်ရေး ဆောင်ရွက်နေကြောင်း၊ မြန်မာနိုင်ငံ၌ လွှတ်တော်ပေါ်ပေါက်လာပါက လွှတ်တော်တွင်း ဆွေးနွေးသဘောတူထားသည့် EAO များနှင့် ထာဝရငြိမ်းချမ်းရေးရရန် ရည်ရွယ်ကြောင်းလည်း ၎င်းက ပြောဆိုထားသည်။

📌📌 ၅။ စစ်ကောင်စီအပေါ် ဖိအားပေးမှုတိုးမြှင့်မယ်လို့ အမေရိကန်နိုင်ငံခြားရေးဝန်ကြီး ထုတ်ပြန်

မြန်မာနိုင်ငံမှာ ရိုဟင်ဂျာတွေအပေါ် မြန်မာစစ်တပ်ရဲ့ လူမျိုးတုံးသတ်ဖြတ်မှု လုပ်ဆောင်ခဲ့တဲ့ ငါးနှစ်ပြည့်အထိမ်းအမှတ် ထုတ်ပြန်ချက်တစ်စောင်ကို အမေရိကန် နိုင်ငံခြားရေးဝန်ကြီးဌာနက ဩဂုတ်လ ၂၄ ရက် မနေ့က ထုတ်ပြန်ပါတယ်။ ထုတ်ပြန်ချက်ထဲမှာ ရိုဟင်ဂျာတွေနဲ့ မြန်မာပြည်သူတွေကို ဆက်လက်ထောက်ခံ အားပေးသွားမှာဖြစ်ပြီး စစ်ကောင်စီ အပေါ် စီးပွားရေးနဲ့ သံတမန်ရေးရာ ဖိအားပေးမှုတွေကိုလည်း တိုးမြှင့်သွားမယ်လို့ ဆိုပါတယ်။

မြန်မာစစ်တပ်က ကျူးလွန်ခဲ့တဲ့ ရက်စက်ယုတ်မာမှုတွေဟာ လူသားမျိုးနွယ်အပေါ်ကျူးလွန်တဲ့ ရာဇဝတ်မှုတွေဖြစ်ပြီး လူမျိုးတုံးသတ်ဖြတ်မှုဖြစ်တယ်လို့ အခုနှစ် မတ်လတုန်းက အမေရိကန်ပြည်ထောင်စု လူမျိုးတုံး သတ်ဖြတ်မှု အထိမ်းအမှတ်ပြတိုက်မှာ ပြောကြားခဲ့ပြီးဖြစ်တယ်လို့ အမေရိကန်နိုင်ငံခြားရေးဝန်ကြီး အန်တိုနီ ဂျေ ဘလင်ကန် (Antony J. Blinken) က ပြောဆိုပါတယ်။

၂၀၂၁ ခုနှစ် ဖေဖော်ဝါရီမှာ စစ်အာဏာသိမ်းပြီးကတည်းက မြန်မာစစ်တပ်ဟာ ပြည်သူတွေကို ဖိနှိပ်၊ ညှဉ်းပန်း၊ နှိပ်စက်သတ်ဖြတ်နေပြီး စစ်အစိုးရက ဒီမိုကရေစီတက်ကြွလှုပ်ရှားသူတွေနဲ့ အတိုက်အခံခေါင်းဆောင်တွေကို ကွပ်မျက်ခဲ့ တာကလည်း စစ်ကောင်စီအနေနဲ့ ပြည်သူလူထုရဲ့ အသက်အိုးအိမ်စည်းစိမ်ကို လျစ်လျူရှုတဲ့ နောက်ဆုံးသာဓကတစ်ခု ဖြစ်တယ်လို့ အမေရိကန်နိုင်ငံခြားရေးဝန်ကြီးဌာနရဲ့ ထုတ်ပြန်ချက်ထဲမှာ ရေးသားထားပါတယ်။ မြန်မာစစ်တပ်ရဲ့ ရက်စက် ကြမ်းကြုတ်တဲ့ ရာဇဝတ်မှုတွေကို တရားစီရင်ပိုင်ခွင့်ရှိတဲ့ ကမ္ဘာတစ်ဝန်းက ယုံကြည်ကိုးစားထိုက်တဲ့ တရားရုံးတွေကို အမေရိကန် က ဆက်လက်ထောက်ခံတယ်လို့ ဆိုပါတယ်။

စစ်ကောင်စီရဲ့ လုပ်ဆောင်ချက်တွေအတွက် တရားမျှတမှုနဲ့ တာဝန်ခံမှုရှိစေဖို့ ကုလသမဂ္ဂ လုံခြုံရေးကောင်စီရဲ့ အရေးယူဆောင်ရွက်မှုတွေကိုလည်း အမေရိကန်က ထောက်ခံတယ်လို့ ပြောပါတယ်။ စစ်ကောင်စီအပေါ် အရေးယူ ဆောင်ရွက်မှုတွေအတွက် နိုင်ငံတကာ ရာဇဝတ်ခုံရုံးကို လွှဲပြောင်းပေးဖို့ အမေရိကန်အနေနဲ့ ထောက်ခံမှာဖြစ်တယ်လို့ ထုတ်ပြန်ချက်ထဲမှာ ရေးသားထားပါတယ်။

လွန်ခဲ့တဲ့ ငါးနှစ်က မြန်မာစစ်တပ်ဟာ ရိုဟင်ဂျာ အမျိုးသား၊ အမျိုးသမီးနဲ့ ကလေးထောင်ပေါင်းများစွာကို သတ်ဖြတ်ခဲ့ပြီး မုဒိမ်းမှု၊ ညှဉ်းပန်းနှိပ်စက်မှုနဲ့ ကြီးမားတဲ့ အကြမ်းဖက်မှုတွေနဲ့ ရက်စက်ကြမ်းကြုတ်တဲ့ စစ်ဆင်ရေးတစ်ရပ်ကို လုပ်ဆောင် ခဲ့တာပါ။ ဒီအဖြစ်အပျက်ကြောင့် ရိုဟင်ဂျာ ၇၄၀,၀၀၀ ကျော်ဟာ နေရပ်က ထွက်ပြေးကြရပြီး ဘင်္ဂလားဒေ့ရှ်နိုင်ငံမှာ ခိုလှုံခွင့်တောင်းခံခဲ့ရပါတယ်။