RADIO NUG (Ethnic language program) 26th NOV 2022

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ နိုဝင်ဘာလ ( ၂၆ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ CDF – Daaiက (၁) နှစ်ပြည့် အခမ်းအနားကျင်းပ

 

Chinland Defnse Force - Daai ( CDF - Daai ) ဖွဲ့စည်းခြင်း (၁) နှစ်ပြည့် အခမ်းအနားကို၂၀၂၂ ခုနှစ် ၊ စက်တင်ဘာလ (၂၁) ရက်နေ့တွင် (CDF - Daai) ၏ ဗဟိုဌာနချုပ်တွင် အောင်မြင်စွာ ကျင်းပနိုင်ခဲ့‌ကြောင်း ၂၀၂၂ခုနှစ်၊ နိုဝင်ဘာ ၂၄ရက်နေ့က CDF-Daaiကထုတ်ပြန်ထားပါတယ်၊ CDF-Daai၏ လှုပ်ရှားမှုမှတ်တမ်းများကို လုံခြုံရေးအခြေအနေအမျိုးမျိုးကြောင့် အချိန်နောက်ကျပြီးမှ တင်ရခြင်းဖြစ်ကြောင်း အဆိုပါထုတ်ပြန်ချက်မှာ ပါရှိပါတယ်။

 

‌မိမိတို့ (CDF - Daai) ရဲဘော်များအပေါ် အဘက်ဘက်မှ ကူညီပံ့ပိုးပေးခဲ့ကြသော မိဘပြည်သူများအား အထူးကျေးဇူး တင်ရှိပါကြောင်းနှင့် စစ်အာဏာရှင် အမြစ်ပြတ်သည်ထိ တိုက်ပွဲဝင်နိုင်ရန်အတွက် ထပ်မံကူညီပေးကြပါရန် အကူညီတောင်းခံအပ်ပါတယ်လို့ ထုတ်ပြန်ချက်မှာ တွေ့ရပါတယ်။ 

 

CDF-Daaiကို ၂၀၂၁ခုနှစ်၊ စက်တင်ဘာလ (၂၀)ရက်နေ့မှာ စတင်ဖွဲ့စည်းပြီး ယခု ၂၀၂၂ခုနှစ်၊ စက်တင်ဘာလ (၂၀)ရက်နေ့ဆိုရင် တစ်နှစ် ပြည့်ပြီဖြစ်ပါတယ်။ CDF-Daaiသည် ပလက်ဝမြို့နယ် ဒိုင်ရ်လူမျိုးကိုယ်စားပြု တော်လှန်ရေးအင်အားစုတစ်ရပ်အနေဖြင့် ရပ်တည်ပြီး စစ်အာဏာရှင်ကို တော်လှန်တိုက်ပွဲဝင်နေကြောင်း၊ တော်လှန်ရေးအောင်မြင်သည်အထိ ဆက်လက်တိုက်ပွဲဝင် မည်ဖြစကြောင်း၊ မိဘပြည်သူများအနေဖြင့် ကူညီပံ့ပိုးပေးရန်တောင်းခံကြောင်း CDF-Daaiရဲ့  ထုတ်ပြန်ချက်မှာ ပါရှိပါတယ်။

 

 

📌📌 ၂။ CDF မင်းတပ်, တပ်တွင်းပြုပြင်ပြောင်းလဲရေး စတင်နေ၊ CDF မင်းတပ်ရဲ့ ပုံရိပ်ကျဆင်းစေမည့် ကိစ္စရပ်များ မပြုလုပ်ကြရန် အသိပေးထုတ်ပြန်

CDF မင်းတပ်အနေနဲ့ ပိုမိုကျစ်လစ်ခိုင်မာတဲ့ အဖွဲ့အစည်း ဖြစ်လာဖို့၊ ရှေ့လုပ်ငန်းစဉ်တွေနဲ့ တပ်တွင်း ပြုပြင်ပြောင်းလဲရေးလုပ်ငန်းအစည်းအဝေးကို နိုဝင်ဘာလ ၂၂ ရက်နေ့ကနေ ၂၃ ရက်နေ့အထိ ပြုလုပ်ခဲ့တယ်လို့ CDF မင်းတပ်က ထုတ်ပြန်ချက် အမှတ် ၃/၂၀၂၂ နဲ့ နိုဝင်ဘာ ၂၃ ရက်နေ့ ညပိုင်းမှာ သတင်း ထုတ်ပြန်လာပါတယ်။ 

 

အဲဒီအစည်းအဝေးမှာ CDF မင်းတပ် တပ်မဟာမှူး၊ ဗျူဟာမှူးနဲ့ တပ်ရင်းအသီးသီးက တပ်ရင်းမှူး၊ တပ်ဖွဲ့ တာဝန်ရှိသူများ စုစုပေါင်း ၄၀ ဦး တက်ရောက်ခဲ့ကြတယ်လို့ သိရပါတယ်။ 

 

CDF မင်းတပ်ရဲ့ ပုံရိပ်ကျဆင်းစေဖို့ ရည်ရွယ်ချက်ရှိရှိ မြေပြင်၊ အွန်လိုင်း ပလက်ဖောင်းတွေမှာ ဝေဖန်တိုက်ခိုက်နေတဲ့ လူပုဂ္ဂိုလ်များ/အဖွဲ့အစည်းများကို ကန့်ကွက်ရှုတ်ချကြောင်းနဲ့ CDF မင်းတပ်သည် မြေပြင်မှာ စည်းလုံး ညီညွတ်စွာ ရပ်တည်နေတဲ့ မင်းတပ်မြို့နယ်ရဲ့ တစ်ခုတည်းသော လက်နက်ကိုင် အဖွဲ့အစည်း ဖြစ်ကြောင်း အဲဒီထုတ်ပြန်ချက်မှာ ပါရှိပါတယ်။

 

နောက်နောင်တွင် CDF မင်းတပ် ပုံရိပ်ကျဆင်းစေမယ့် လုပ်ရပ်များ အင်တာနက် အွန်လိုင်း ရေးသားဖော်ပြတာတွေကို လူပုဂ္ဂိုလ်/အဖွဲ့အစည်းများအနေနဲ့ လုံးဝ မပြုလုပ်ကြဖို့၊ ဝေဖန် အကြံပြုလိုပါက CDF မင်းတပ် Facebook Page, တပ်မဟာမှူးရုံး၊ ဒုတပ်မဟာမှူးရုံး၊ တာဝန်ရှိပုဂ္ဂိုလ်တွေဆီ ရေးသားပေးပို့နိုင်တယ်လို့ ဆိုပါတယ်။ 

CDF မင်းတပ်အနေနဲ့ တပ်ဖွဲ့တွင်း ပိုမိုကျစ်လစ်ခိုင်မာပြီး စည်းကမ်းပြည့်ဝပြီး ပြည်သူလူထုရဲ့ အသက်အိုးအိမ် စည်းစိမ်ကို ကာကွယ် စောင့်ရှောက်တဲ့ လက်နက်ကိုင်အဖွဲ့အစည်း ဖြစ်လာရေး ဦးထိပ်ထားရင်း စစ်အာဏာရှင်ကျဆုံးပြီး ကိုယ့်ကြမ္မာကိုယ်ဖန်တီးခွင့် အပြည့်အဝရှိသော ဖက်ဒရယ် ဒီမိုကရေစီ ပြည်ထောင်စု ပေါ်ပေါက်သည့်အထိ အသက်ပေးရှေ့ဆက်လုပ်ဆောင်သွားမယ်လို့လည်း CDF မင်းတပ်ရဲ့ ဒီကနေ့ ထုတ်ပြန်ချက်မှာ ဖော်ပြပါရှိပါတယ်။

 

📌📌 ၃။ သီးမြစ်တိုက်ပွဲမှာ ချင်းကာကွယ်ရေးပူးပေါင်းတပ်က စစ်ကောင်စီတပ်ရဲ့ လက်နက်၊ ခဲယမ်းများ သိမ်းဆည်းရမိ

 

ဟားခါးနဲ့ ထန်တလန်မြို့အကြား နိုဝင်ဘာလဆန်းပိုင်းကနေ စတင်ဖြစ်ပွားတဲ့ သီမြစ်ချောင်းအနီး တိုက်ပွဲအတွင်းမှာ စစ်ကောင်စီတပ်ဖွဲ့ရဲ့ လက်နက်၊ ခဲယမ်းတချို့ကို ချင်းကာကွယ်ရေးပူးပေါင်းတပ်ဖွဲ့က သိမ်းဆည်းရမိတယ်လို့ သိရပါတယ်။

 

တိုက်ပွဲအတွင်းမှာ MA 1, MA2, MA3, Machine gun တစ်လက်နဲ့ ကျည်ဆံတစ်ထောင်ကျော် သိမ်းဆည်းရမိထားတယ်လို့ The Chin Post က ရုပ်သံဖိုင်နဲ့အတူ နိုဝင်ဘာ ၂၁ ရက် ညပိုင်းမှာ ဖော်ပြလာပါတယ်။ နိုဝင်ဘာ၂၁ရက်နေ့ ဖြစ်ပွားတဲ့တိုက်ပွဲအတွင်းမှာတော့ စစ်ကောင်စီတပ်က ရဟတ်ယာဉ်နဲ့ လာရောက် ပစ်ခတ်တာမျိုး ရှိတယ်လို့လည်း မြေပြင်နဲ့ နီးစပ်တဲ့သတင်းတွေအရ သိရပါတယ်။

 

ဟားခါးမြို့နဲ့ ၅ မိုင်ဝန်းကျင်ဝေးတဲ့ သီမြစ်ချောင်းအနီးတဝိုက်မှာ စစ်ကောင်စီတပ်ဖွဲ့နဲ့ ချင်းကာကွယ်ရေးပူးပေါင်းတပ်တို့ ထိတွေ့တိုက်ပွဲဖြစ်ပွားနေတာ ၂ ပတ်ကျော်ရှိပြီဖြစ်ပေမယ့် နှစ်ဘက် ထိခိုက်သေဆုံးမှုအခြေနေကိုတော့ မသိရသေးဘူး လို့လည်း The Chin Post က ဆိုပါတယ်။

 

📌📌 ၄။ လေကြောင်းပစ်ကူနေတဲ့ စစ်ကောင်စီရဲ့ သီးဘွာလ်တပ်စခန်းတိုက်ပွဲမှာ စစ်ကောင်စီတပ်သား နှစ်ဦးသေပြီး CNDF က ကျည်တောင့် ၂၀ဝ ကျော် သိမ်းဆည်း

စစ်ကောင်စီရဲ့ လေကြောင်းပစ်ကူတိုက်ခိုက်နေတဲ့ ဖလမ်းမြို့နယ် သီးဘွာလ်တပ်စခန်းတိုက်ပွဲသတင်း အသေးစိပ်ကို ချင်းအမျိုးသား အဖွဲ့ချုပ် CNO/CNDF က နိုဝင်ဘာ ၂၀ တွင် အောက်ပါအတိုင်း သတင်းထုတ်ပြန်သည်။ လက်ရှိတိုက်ပွဲပြင်းထန်နေသော ချင်းပြည်နယ်၊ ဖလမ်းမြို့နယ်ရှိ သီးဘွာလ်တပ်စခန်းအတွက် နိုဝင်ဘာ ၂၀ နံနက် ၁၀:၀၀ နာရီအချိန်ခန့်တွင် စားနပ်ရိက္ခာနှင့်လက်နက်အကူများကို တိုက်ပွဲသုံးရဟတ်ယာဉ်နှစ်စင်းဖြင့် လာရောက်ပေးပို့ခဲ့ကြပါသည်။

 

ထို့နောက် နံနက် ၁၀:၃၀ နာရီခန့်တွင် တိုက်ပွဲသုံး MI-35 ဖြင့် မိမိတို့ CNDF နှင့် ပူးပေါင်းကာကွယ်ရေးတပ်ဖွဲ့များအား လာရောက်ပစ်ခတ်ခဲ့သည်။ နံနက် ၁၁:၂၀ အချိန်ခန့်တွင်လည်း တိုက်ပွဲသုံးရဟတ်ယာဉ်ဖြင့် ရိက္ခာများဖြည့်တင်းခဲ့သည်ဟု ယူဆရပါသည်။

 

၎င်းနောက်ပိုင်း နံနက် ၁၁:၃၈ နာရီခန့်တွင် အကြမ်းဖက်စစ်ကောင်စီများအား မိမိတို့ CNDF လက်ဖြောင့်တပ်သားများက အလစ်ဝင်ပစ်ခတ်ခဲ့ရာ စစ် ကောင်စီတပ်သား ၂ ဦး သေဆုံးသွားပြီး ကျည်တောင့် ၂၀၀ ကျော် သိမ်းဆည်းနိုင်ခဲ့ပါသည်။ CNDF နှင့် ပူးပေါင်းကာကွယ်ရေး ရဲဘော်များ ထိခိုက်မှုမရှိခဲ့ပါဟူ၍ ချင်းအမျိုးသားအဖွဲ့ချုပ် သတင်းနှင့် ပြန်ကြားရေးက ထုတ်ပြန်သည်။

#RadioNUGLocalNews

#SpringRevolution