21st JAN 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇန်နဝါရီလ ( ၂၁ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ အင်အားသုံး ထိုးစစ်ခံရတဲ့ CDF မတူပီ တပ်ရင်း ၂ မှာ ရဲဘော်တစ်ဦးကျဆုံး၊ လက်နက်များ သိမ်းဆည်းခံရ

 

မတူပီမြို့နယ် ငလိုင်ကျေးရွာမှာ ဇန်နဝါရီ ၁၅ ရက်နေ့စတင် ဖြစ်ပွားတဲ့ တိုက်ပွဲအတွင်း ရဲဘော်တစ်ဦးကျဆုံးတယ်လို့ CDF မတူပီက တရားဝင် သတင်းထုတ်ပြန်ပါတယ်။ ရဲဘော်တစ်ဦးနဲ့ အတူ M4 သေနတ် ၂ လက်၊ ခါးချိုး ၂ လက်၊ ဆိုင်ကယ် ၁၁ စီး၊ မိုဘိုင်းဖုန်း ၇ လုံး၊ ကျည်ဆံအများအပြားနဲ့ မြန်မာငွေကျပ် ၁၅ သိန်းဝန်းကျင် လက်လွှတ်ဆုံးရှုံးရတယ်လို့လည်း ဆိုပါတယ်။

 

စစ်ကြောင်းထိုးဝင်ရောက်ခံရတဲ့ ကျေးရွာတွင်း ပြည်သူပိုင်နေအိမ် ၃ လုံး စက်ကြီးနဲ့ ဖြိုခံရပြီး ၂ လုံးကို မီးတင်ရှို့ခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။ မတူပီ - ဟားခါးလမ်းမပေါ်မှာ စစ်ကောင်စီနဲ့ ကာကွယ်ရေးတပ် အချိန်မရွေးတိုက်ပွဲဖြစ်နိုင်တာကြောင့် ပြည်သူတွေ ခရီးသွားလာတာ မလုပ်ကြဖို့ CDF မတူပီက ဇန်နဝါရီ ၁၅ ရက်နေ့မှာ အသိပေးထားပါတယ်။

 

လက်ရှိ ပြည်သူတွေထွက်ပြေးတိမ်းရှောင်နေကြတဲ့ ငလိုင်ကျေးရွာဟာ ကျေးရွာကြီးဖြစ်ပြီး မတူပီအခြေချ စစ်ဗျူဟာ တပ်၊ ခလရ (၁၄၀) တပ်ရင်းနဲ့ အနီးကပ်ဆုံးမှာ ရှိပါတယ်။

 

ရွေးကောက်ပွဲလုပ်နိုင်ဖို့ စာရင်းကောက်ယူနေတဲ့ စစ်ကောင်စီဟာ မင်းတပ်၊ မတူပီမြို့နယ်တွေမှာ အင်အားသုံး စစ်ကြောင်းထိုးတာတွေ ဆက်တိုက်လုပ်နေပြီး ဇန်နဝါရီလဆန်းတည်းက ဆက်သွယ်ရေးဖုန်းလိုင်းတွေ ဖြတ်တောက် ထားတာလည်း ဖြစ်ပါတယ်။

 

========================

 

📌📌 ၂။ ဖလမ်းမှာ အလစ်ငိုက်ပစ်ခတ်ခံရတဲ့ စစ်ကောင်စီက ပြည်သူ ၃၀ နီးပါးဖမ်းဆီးထား

 

ချင်းအမျိုးသားတပ် (CNA) တပ်ဖွဲ့ဝင်တွေက ဖလမ်းမြို့ ဖါရ်ထောက်ရပ်ကွက်မှာ ကင်းလှည့်တဲ့ ရဲတပ်သားတွေကို ဇန်နဝါရီ ၁၈ ရက်နေ့ မွန်းလွဲ ၃ နာရီဝန်းကျင်က အလစ်ငိုက်ဖမ်း ဝင်ပစ်ခတ်ခဲ့တယ်လို့ ဒေသတွင်း သတင်းအရင်းမြစ် The Rihli Voice က ရေးပါတယ်။

 

ဖလမ်းမြို့ ဖါရ်ထောက်ရပ်ကွက်အတွင်း ပစ်ခတ်မှုမှာ စစ်ကောင်စီလက်အောက်ခံ ရဲတပ်သားတစ်ဦးသေဆုံးခဲ့ပြီး ၄ ဦးဒဏ်ရာရရှိခဲ့တယ်လို့ အနီးအနားက မျက်မြင်တွေကို ကိုးကားပြီး The Rihli Voice ကို ဆိုပါတယ်။

 

ဇန်နဝါရီ ၁၈ ရက် ပစ်ခတ်မှုမှာ ဒေသခံကလေးတစ်ဦးပေါင် ကျဉ်ထိမှန်ခဲ့ပြီး အခင်းဖြစ်ပွားတဲ့ ဖါရ်ထောက်ရပ်ကွက်က ပြည်သူ ၃၀ ဝန်းကျင်ကိုလည်း စစ်ကောင်စီက ဖမ်းဆီးထားတယ်လို့ ရေးသားထားပါတယ်။ ထိခိုက်သေဆုံးမှုရှိတဲ့ စစ်ကောင်စီဟာ ဖလမ်းမြို့တွင်းမှာ ည ၉ နာရီနောက်ပိုင်း ညမထွက်ရအမိန့်ကိုပါ တခါတည်း ထုတ်ပြန်ထားရပါတယ်။ 

 

========================

 

📌📌 ၃။ NUG က တောင်ပိုင်းစစ်ဒေသကို လက်နက်ထပ်မံတပ်ဆင်ပေး

 

တောင်ပိုင်းစစ်ဒေသ၊ အမှတ် (၃) စစ်ဒေသခွဲ ပြည်သူ့ကာကွယ်ရေးတပ် ဒေါနစစ်ကြောင်းရဲ့ မွမ်းမံသင်တန်းဆင်းပွဲကို ဇန်နဝါရီ ၁၇ ရက်နေ့  ပြုလုပ်ခဲ့တယ်လို့ အမျိုးသားညီညွတ်ရေးအစိုးရ (NUG) ရဲ့ ထုတ်ပြန်ချက်အရ သိရပါတယ်။ ဒီသင်တန်းဆင်းပွဲမှာ အမျိုးသားညီညွတ်ရေးအစိုးရ ပြည်ထောင်စုဝန်ကြီးချုပ် မန်းဝင်းခိုင်သန်းက တစ်ဦးချင်း သစ္စာရေ တိုက်ပြီး ဒေါနစစ်ကြောင်းအတွက် လက်နက်တပ်ဆင်ပေးတယ်လို့ ရုပ်ပုံမှတ်တမ်းတွေနဲ့အတူ ထုတ်ပြန်ထားပါတယ်။ သင်တန်းဆင်းပွဲမှာ ပြည်ထောင်စုဝန်ကြီးချုပ် မန်းဝင်းခိုင်သန်း၊ အမျိုးသမီး၊ လူငယ်နှင့် ကလေးသူငယ်ရေးရာဝန်ကြီးဌာန ဒုတိယဝန်ကြီး ဒေါ်အိသဉ္ဇာမောင်၊ တောင်ပိုင်းတိုင်းစစ်ဒေသ ဗိုလ်မှူးကြီးစောဖီးနစ်၊ တောင်ပိုင်းတိုင်းစစ်ဒေသ၊ အမှတ် (၃) စစ်ဒေသခွဲ၊ ဒု - စစ်ဒေသမှူး ဗိုလ်စောရှားနှင့် တာဝန်ရှိသူများတက်ရောက်ခဲ့တယ်လို့ သိရပါတယ်။

 

အမျိုးသားညီညွတ်ရေးအစိုးရက ပြီးခဲ့တဲ့ ဒီဇင်ဘာလကလည်း တောင်ပိုင်းစစ်ဒေသ ကော်ဘရာစစ်ကြောင်းအတွက် လက်နက်အလက် ၅၀ တပ်ဆင်ပေးခဲ့ပါတယ်။ တောင်ပိုင်းစစ်ဒေသ၊ အမှတ် (၃) စစ်ဒေသခွဲရှိ ပြည်သူ့ကာကွယ်ရေးတပ် ဒေါနစစ်ကြောင်းအတွက် တပ်ဆင်ပေးတဲ့ လက်နက်အရေအတွက်ကိုတော့ အတိအကျထုတ်ပြန်ထားတာမျိုး မတွေ့ရပါဘူး။

 

========================

 

📌📌 ၄။ စစ်ကောင်စီ လက်နက်ထုတ်လုပ်နိုင်ဖို့ နိုင်ငံတကာကုမ္ပဏီ ၄၅ ခုကျော်က ထောက်ပံ့ပေးနေ

 

မြန်မာစစ်တပ် လက်နက်ပစ္စည်းထုတ်လုပ်ဖို့ ဥရောပနိုင်ငံတွေနဲ့ နိုင်ငံတကာက ကုမ္ပဏီပေါင်း ၄၅ ခုကျော်က ထောက်ပံ့ ပေးနေတယ်လို့ ကုလသမဂ္ဂအရာရှိဟောင်းတွေနဲ့ စုဖွဲ့ထားတဲ့ မြန်မာနိုင်ငံဆိုင်ရာအကြံပေးကောင်စီ (SAC - M) ရဲ့ဇန်နဝါရီ ၁၆ ရက်နေ့ ထုတ်ပြန်ချက်ကို ကိုးကားပြီး RFA က ရေးသားပါတယ်။ 

 

အမေရိကန်၊ ပြင်သစ်၊ ဂျာမနီ၊ သြစတြေးလျ၊ ရုရှား၊ တရုတ်၊ အစ္စရေး၊ ယူကရိန်း၊ အိန္ဒိယ၊ တောင်ကိုးရီးယား၊ ဂျပန်၊ ထိုင်ဝမ်၊ စင်္ကါပူနိုင်ငံတွေမှာ အခြေစိုက်နေတဲ့ ကုမ္ပဏီတွေက မြန်မာစစ်တပ်ရဲ့ လက်နက်ပစ္စည်းတွေ ထုတ်လုပ်နိုင်ဖို့ ရောင်းချပေးနေတာလို့ ဆိုပါတယ်။

 

တရုတ်အစိုးရပိုင် NORINCO ကုမ္ပဏီဟာ မြန်မာစစ်တပ်ကို လက်နက်ထုတ်ကုန်ကြမ်းထောက်ပံ့တဲ့ အဓိကကုမ္ပဏီ ဖြစ်တယ်လို့ (SAC - M) က အထူးဖော်ပြထားပါတယ်။ စစ်ကောင်စီဟာ စစ်လက်နက်တွေသုံးပြီး အရပ်သားပြည်သူတွေ သတ်ဖြတ်၊ လူ့အခွင့်အရေး ချိုးဖောက်မှုတွေ ကျူးလွန်နေတာကြောင့် ဒီကုမ္ပဏီကြီးတွေအနေနဲ့ စစ်ကောင်စီနဲ့ စီးပွားရေးလုပ်နေတာတွေကို ချက်ချင်းရပ်တန့်ဖို့လည်း တောင်းဆိုထားပါတယ်။

 

ကုလသမဂ္ဂအဖွဲ့နိုင်ငံတွေအနေနဲ့ မြန်မာစစ်တပ်ရဲ့ ကာကွယ်ရေးပစ္စည်းထုတ်လုပ်ရေးစက်ရုံ (ကပစ) နဲ့ တာဝန်ရှိသူတွေ၊ လက်နက်ပွဲစားတွေကို ပစ်မှတ်ထား ဒဏ်ခတ်ပိတ်ဆို့ဖို့လိုတယ်လို့လည်း မြန်မာနိုင်ငံဆိုင်ရာ အကြံပေးကောင်စီက တောင်းဆိုပါတယ်။ 

 

ဒီအစီရင်ခံစာ ထုတ်ပြန်ချက်ထဲမှာပါတဲ့ ကုမ္ပဏီတွေဟာ စစ်တပ်ရဲ့ လက်နက်ထုတ်လုပ်ရေးအတွက် ကုန်ကြမ်းတင်မက ဘဲ နည်းပညာနဲ့ သင်တန်းတွေပါ ပို့ချပေးနေတယ်လို့ (SAC - M) က ဆိုပါတယ်။ မြန်မာစစ်တပ်ဟာ သူတို့ရဲ့စစ်သုံး လက်နက်ပစ္စည်းတွေကို မြန်မာနိုင်ငံက နေရာအနှံ့အပြားမှာ ကပစ စက်ရုံ ၂၅ ခုနဲ့ ထုတ် လုပ်နေတာလည်း ဖြစ်ပါတယ်။

#RadioNUGLocalNews

#SpringRevolution