6th MAY 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ မေလ ( ၆ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မိုင်းမတော်တဆကြောင့် တူးမီးတပ်ရင်း ရဲဘော် ၂ ဦး အသက်ဆုံးရှုံး

တူမီးတပ်ရင်းက ရဲဘော် ၂ ဦး မိုင်းမတော်တဆကြောင့် အသက်ဆုံးရှုံးရတယ်လို့ ချင်းကာကွယ်‌ရေးတပ်ဖွဲ့ (ကန်ပက်လက်) က ဒီနေ့ သတင်းထုတ်ပြန်ပါတယ်။

 

ဧပြီ ၂၈ ရက်နေ့က လက်လုပ်မိုင်းပြုလုပ်ရင်း မတော်တဆကြောင့် ၂ ဦးလုံး အသက်ဆုံးရှုံးရတာလို့ ချင်းကာကွယ်‌ရေးတပ်ဖွဲ့ (ကန်ပက်လက်) က ထုတ်ပြန်ထားပါတယ်။

 

ကျဆုံးသူတွေဟာ ဆလိုင်းရွှီလောနဲ့ ကိုအောင်ရဲလင်းတို့ ဖြစ်ပါတယ်။

 

ကျဆုံးရဲ‌ဘော်တွေရဲ့ ကျန်ရစ်မိသားစုနဲ့အတူ ထပ်တူဝမ်းနည်းရပြီး ညှိုးငယ်တဲ့စိတ်နဲ့ ချင်းကာကွယ်ရေးတပ်ဖွဲ့ (ကန်ပက်လက်) က မှတ်တမ်းတင် ဂုဏ်ပြုတယ်လို့ ထုတ်ပြန်ချက်မှာ ဖော်ပြထားပါတယ်။

 

မိုင်းမတော်တဆကြောင့် ဒဏ်ရာရတဲ့ ရဲဘော်တွေ ရှိနေတယ်လို့လည်း ချင်းကာကွယ်ရေးတပ်ဖွဲ့ (ကန်ပက်လက်) က အစော ပိုင်းမှာ ထုတ်ပြန်ထားပါတယ်။

 

ထိခိုက်ဒဏ်ရာရသူတွေနဲ့ ပတ်သက်ပြီး အသေးစိပ် မသိရသေးသလို ချင်းကာကွယ်ရေးတပ်ဖွဲ့ (ကန်ပက်လက်) တူမီးတပ် ရင်းမှူးကို ဆက်သွယ်ခဲ့ပေမယ့် အင်တာနက်လိုင်း အခက်ခဲကြောင့် အခုထိ အဆက်သွယ်မရသေးပါဘူး။

 

========================

 

၂။ မင်းတပ်မှာ မေလကနေ ဇူလိုင်လအထိ အမဲလိုက်၊ ငှက်ပစ်တာမလုပ်ဖို့ တားမြစ် 

 

ကျေးငှက်တွေ အသိုက်အတွင်း ဥချပြီး သားပေါက်ချိန်ဖြစ်တဲ့ အခုချိန်မှာ မင်းတပ်မြို့နယ်ထဲ ငှက်ပစ်၊ အမဲလိုက်တာမျိုး မလုပ်ကြဖို့ မြို့နယ် (ပအဖ) က ဧပြီလ ၂၉ ရက်နေ့က စတင်ပြီး တားမြစ်ပိတ်ပင် လိုက်ပါတယ်။

 

တားမြစ်ကာလကိုတော့ မေလကနေ ဇူလိုင်လအထိ ၃ လတာ သတ်မှတ်ထားပါတယ်။

 

အဖိုးတန် သဘာဝ သားရဲတိရစ္ဆာန်တွေကို ဝိုင်းဝန်းထိန်းသိမ်းကြဖို့ ကြေညာသလို အနာဂတ်မှာ ဒေသခံပြည်သူတွေအတွက် ပြည်တွင်း၊ ပြည်ပ ခရီးသွားကဏ္ဍကနေ ဝင်ငွေတွေ ရရှိစေနိုင်တာကြောင့် ဒီတားမြစ်ချက်တွေကို လိုက်နာပေးကြဖို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ဆော်ဩထားပါတယ်။

 

တဖက်မှာတော့ ကျေးငှက်မျိုးစိတ်တွေအပြင် ငါးမျိုးစိတ်၊ သဘာဝတောတောင်နဲ့ ရှားပါးသစ်ခွမျိုးစိတ်တွေကိုပါ ဝိုင်းဝန်းထိန်းသိမ်းဖို့လည်း အသိပေးတိုက်တွန်းနေတာမျိုးတွေ ရှိနေပါတယ်။ 

 

အလားတူ ကန်ပက်လက်မြို့နယ် ပြည်သူ့အုပ်ချုပ်ရေးအဖွဲ့ကလည်း ခေါ်နူးစုမ်အမျိုးသားဥယျာဉ်အပါအဝင် သစ်တောကြိုးဝိုင်း၊ ကြိုးပြင်ကာကွယ်တောနဲ့ အဖိုးတန်သစ်တော ထိန်းသိမ်းတောများကို ထိန်းသိမ်းစောင့်ရှောက်ရန်၊ ညွှန်ကြားချက်အမိန့်မလိုက်နာပါက သစ်တောဥပဒေအရ သော်လည်း ကောင်း၊ တော်လှန်‌ရေးကာလ သစ်တောစည်းမျဉ်းစည်းကမ်းအရသော်လည်းကောင်း အရေးယူမှုတွေ လုပ်ဆောင်သွားမယ်လို့ မေလ ၁ရက်နေ့က ထုတ်ပြန်ထားပါတယ်။

 

========================

 

၃။ ချင်းကာကွယ်ရေးတပ်ဖွဲ့ (ကန်ပက်လက်) နဲ့ စစ်ကောင်စီတို့ ထပ်မံပစ်ခတ်မှုရှိ

 

ကန်ပက်လက်မှာ ကာကွယ်‌ရေးတပ်ဖွဲ့နဲ့ စစ်ကောင်စီတပ် အနီးကပ်ပစ်ခတ်မှုတွေ ဆက်တိုက်ရှိလာနေပါတယ်။ ကာကွယ်‌ရေးတပ်ဖွဲ့နဲ့ စစ်ကောင်စီတို့ ထပ်မံပစ်ခတ်မှုရှိတယ်လို့ ချင်းကာကွယ်ရေးတပ်ဖွဲ့ (ကန်ပက်လက်)က  သတင်းထုတ် ပြန်လာပါတယ်။ ဧပြီလ ၂၉ ရက်နေ့က ကျင်‌ဒွေးအထိုင်ချတဲ့ စစ်ကောင်စီတပ်နဲ့ ချင်းကာကွယ်ရေးတပ်ဖွဲ့ (ကန်ပက်လက်) တို့ ကျင်ဒွေး - ငါးအော်ကျင်းကျေးရွာအကြားမှာ ထိပ်တိုက် ပစ်ခတ်မှုဖြစ်တာလို့ ဆိုပါတယ်။

 

ပစ်ခတ်မှုအပြီး စစ်ကောင်စီတပ်သား ၂ ဦးသေတယ်လို့ ထုတ်ပြန်ထားပြီး ကာကွယ်‌ရေးတပ် အထိခိုက်မရှိ ဆုတ်ခွာလာ နိုင်ခဲ့တယ်လို့ ထုတ်ပြန်ပါတယ်။

 

အခုဧပြီလနောက်ဆုံးအပတ်ထဲမှာတင် ချင်းကာကွယ်ရေးတပ်ဖွဲ့ (ကန်ပက်လက်) နဲ့ စစ်ကောင်စီတပ်တို့ ထိတွေ့ပစ်ခတ်မှု ၃ ကြိမ်အထိ ရှိခဲ့ပါတယ်။အင်အားစုတွေကတော့ ကန်ပက်လက်နယ်မှာ ပြည်သူအားလုံး သက်ဆိုင်ရာကာကွယ်ရေးအဖွဲ့ရဲ့ ထုတ်ပြန်ချက်တွေ အချိန်နဲ့တပြေးညီ နားစွင့်ပေးကြဖို့ အသိပေးထားပါတယ်။

 

========================

 

၄။ ဗျူဟာမြောက် စစ်လက်နက်တွေ ရှာဖွေတပ်ဆင်တာကို အားစိုက်လုပ်နေတယ်လို့ NUG ဆို

 

စစ်ကောင်စီတပ်ကို ခုခံတွန်းလှန်နိုင်တဲ့ ဗျူဟာမြောက် လက်နက်ပစ္စည်းတွေ အလုံအလောက် ရရှိနိုင်ဖို့ အားစိုက်ကြိုးပမ်း နေတယ်လို့ အမျိုးသားညီညွတ်ရေးအစိုးရ NUG က ကြေညာပါတယ်။

 

မေလ ၃ ရက်နေ့ ကျရောက်တဲ့ NUG ဖွဲ့စည်းခြင်း ၂ နှစ်ပြည့် ပြည်သူကိုတင်ပြတဲ့ အစီရင်ခံစာကနေ အခုလိုတရားဝင်ထုတ်ဖော် ပြောဆိုလာတာပါ။

 

“ရန်သူနှင့် ကောင်းစွာနှိုင်းယှဉ်နိုင်သည့်၊ ပွဲသိမ်းအဆင့် တိုက်ခိုက်နိုင်သည့် လက်နက်အင်အား အခြေအနေသို့ရောက်ရန်၊ လေကြောင်းရန်ကို တန်ပြန် တိုက်ခိုက်နိုင်ရန်၊ ခုခံနိုင်ရန်အတွက် ဗျူဟာမြောက် လက်နက်ပစ္စည်းများ အလုံအလောက် ရရှိနိုင်ရန်လည်း ဆက်လက် ကြိုးပမ်းလျက်ရှိသည်။” လို့ အဲဒီ အစီရင်ခံစာ အပိုဒ် ၃ ‘စစ်ရေးနှင့် ပြည်သူ့ရင်ခွင် ခိုလှုံမှု အခြေအနေ’ မှာ ဖော်ပြထားပါတယ်။

 

အစိုးရသက်တမ်း ၂ နှစ်တာ ကာလအတွင်း မဟာမိတ် ERO တွေနဲ့ ခုခံတော်လှန်စစ် ပူးပေါင်းဆောင်ရွက်မှုတွေကနေတဆင့် စနစ်ကျတဲ့ ထိန်းချုပ်ကွပ်ကဲမှု စနစ်တစ်ခုအောက်မှာ စစ်ဆင်ရေးနယ်မြေအလိုက် Chain of Command တည်ဆောက်ပြီး လက်နက်တပ်ဆင်တာ အတိုင်းအတာတခုအထိ လုပ်ဆောင်နိုင်ခဲ့တယ်လို့ ဆိုပါတယ်။

 

တနိုင်ငံလုံးမှာ PDF တပ်ရင်း ၃၀၀ ကျော်နဲ့ ဒေသအလိုက် ကာကွယ်ရေးတပ်ဖွဲ့ကို မြို့နယ် ၂၅၀ ကျော်မှာ ဖွဲ့စည်းနိုင်တဲ့ အကြောင်းလည်း ဖော်ပြပါတယ်။

 

MoD NUG အနေနဲ့ ၂၀၂၂ နှစ်ကုန်ပိုင်းလောက်ကနေ လက်နက်တပ်ဆင်တာကို တရားဝင်ထုတ်ဖော်ပြသလာပြီး တောင်ပိုင်း စစ်ဒေသက စစ်ကြောင်း ၇ ကြောင်းနဲ့ မကွေးတိုင်း၊ မန္တလေးတိုင်း၊ မိုးကုတ်အခြေစိုက် PDF တွေဆီ လက်နက်တပ်ဆင်ပေး ထားတယ်လို့ သိရပါတယ်။

 

ဒီလိုမျိုး ကာကွယ်ရေးအင်အားတွေဆီ လက်နက်တပ်ဆင်ပေးတာကို ကြိုဆိုပြီး ချင်းပြည်နယ်ဘက် အမြန်ဆုံး တပ်ဆင် ပေးနိုင်ဖို့ မျှော်လင့်နေနေအကြောင်း ချင်းပြည်သူ့ကာကွယ်ရေးတပ်ဖွဲ့ (မင်းတပ်) နဲ့ ချင်းပြည်သူ့ကာကွယ်ရေးတပ်ဖွဲ့ (ကန်ပက်လက်) တာဝန်ရှိသူတွေက ၂၀၂၃ ဧပြီလလယ်ပိုင်းက တောင်းဆိုထားဖူးပါတယ်။

 

နိုင်ငံတဝန်းမှာ လက်နက်တပ်ဆင်တာ အရှိန်မြှင့်သွားဖို့ရှိတယ်လို့ MoD NUG က အသိပေးထားပေမယ့် ဘယ်နေရာ၊ ဒေသဆို တာကိုတော့ ပြောမထားပါဘူး။

 

ချင်းပြည်နယ်၊ စစ်ကိုင်းတိုင်းဒေသတွေမှာ MoD NUG အနေနဲ့ လက်နက်တပ်ဆင်တာ အမြန်ဆုံးလုပ်ဆောင်ပေးဖို့ ဒေသကာကွယ်‌ရေးတပ်ဖွဲ့နဲ့ ပြည်သူတွေအကြား ပြောဆိုတောင်းဆိုကြတာတွေ ရှိနေပါတယ်။

 

(မေလ ၃ ရက်) ကျရောက်တဲ့ NUG ဖွဲ့စည်းခြင်း ၂ နှစ်ပြည့်မှာ တော်လှန်ရေးအဖွဲ့အစည်းတွေနဲ့ လက်နက်ကိုင်အင်အားစုတွေက အထိမ်းအမှတ် သဝဏ်လွှာပေးပို့တာမျိုးတော့ မတွေ့ရပါဘူး။

#RadioNUGLocalNews

#SpringRevolution