3rd JUN 2023 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇွန်လ ( ၃ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ စစ်ကောင်စီက ဟားခါး - ထန်တလန်နယ်ကို ကုန်းကြောင်း၊ လေကြောင်းနဲ့ ထိုးစစ်ဆင် တိုက်ခိုက်နေ

 

ဟားခါး - ထန်တလန်နယ်ကို စစ်ကောင်စီတပ်က အင်အားအလုံးအရင်းနဲ့ ထိုးစစ်ဆင်နေတယ်လို့ ဒေသတွင်း သတင်းဌာန တွေက ‌ဖော်ပြပါတယ်။

အင်အား ၁၅၀ ၀န်းကျင်ရှိတဲ့ စစ်ကောင်စီတပ်ဟာ ဟားခါး - ထန်တလန်အကြား သီမစ်ဖက်ကို ပြီးခဲ့တဲ့ရက်ပိုင်းက ရောက်ရှိနေတာဖြစ်ပြီး မေလ ၂၅ ရက်နေ့ကနေ လေကြောင်းတိုက်ခိုက်မှုတွေ အပြင်းအထန်ပြုလုပ်နေတာလို့ ချင်းဂျာနယ်က ဆိုပါတယ်။

သီမစ်အနီး လုံခါရ် (Lungkhar) နဲ့ သီမစ်အောက်ပိုင်း‌ဖက်ကို စစ်ကောင်စီက လေကြောင်းအပါဝင် ကုန်းကြောင်းနဲ့ပါ ထိုးစစ်ဆင် တိုက်ခိုက်နေတာဖြစ်ပြီး တော်လှန်ရေးပူးပေါင်းတပ်ဖက်က ထိခိုက်ကျဆုံးမှု တချို့ရှိတယ်လို့လည်း ဖော်ပြပါတယ်။

“ဆက်ပြီး တိုက်ပွဲပြင်းထန်မယ့် အခြေအနေမှာ ရှိတယ်၊ ထန်တလန်ကိုဦးတည်ပြီး စစ်ကြောင်းထိုးတယ်၊ ဟားခါး-ထန်တလန်ကြားမှာ ခြေကုပ်ယူနိုင်ဖို့ ကြိုးစားကြတာဖြစ်တယ်”လို့ CNAရဲဘော်တစ်ဦးက ဆိုပါတယ်။

 

========================

 

📌📌 ၂။ မင်းတပ်မှာ ခလရ ၂၇၄ ဒုတပ်ရင်းမှူး စနိုက်ပါထိမှန် သေ၊ဆုံး 

 

မင်းတပ်အခြေစိုက် ခလရ ၂၇၄ ဒုတပ်ရင်းမှူး ဗိုလ်မှူး စိုးထက်ပိုင်တိုး စနိုက်ပါထိမှန် သေ၊ဆုံးသွားတယ်လို့ သိရပါတယ်။

မေလ ၃၁ ရက်နေ့က မ‌ကွေးတိုင်းတနေရာမှာဖြစ်ပွားတဲ့ တိုက်ပွဲအတွင်း ပစ်၊ခတ်ခံရလို့ သေ၊ဆုံးတာဖြစ်နိုင်တယ်လို့ သတင်း အရင်းမြစ်တွေက ပြောပါတယ်။

“ဒီသတင်း သူတို့တပ်တွင်းကနေ ပေါက်ကြားသွားတာ နေမှာ။” လို့ ချင်းကာကွယ်ရေးတပ်ဖွဲ့ (မင်းတပ်) စစ်ဒေသမှူးက The Mindat Post ကို ပြောပါတယ်။ 

မင်းတပ် - မ‌ကွေးနယ်စပ်မှာ မေလ စတုတ္ထအပတ်ထဲ အင်အား ၂၀၀ ဝန်းကျင်စစ်ကောင်စီတပ်နဲ့ ဒေသကာကွယ်ရေး ပူးပေါင်းတပ်အကြား စစ်ရေးတင်းမာနေပြီး အနီးကပ်ပစ်ခတ်တာတွေ နေ့စဥ် ဖြစ်ပွားနေတာပါ။

ဒီလို အနီးကပ်ပစ်ခတ် တိုက်ပွဲမှာ စစ်ကောင်စီဘက် ၃ ဦးထက်မနည်း ထိခိုက်သေဆုံးတာရှိသလို ဒေသကာကွယ်ရေး ပူးပေါင်းတပ်ဖွဲ့က တဦး စိုးရိမ်ရတဲ့ ဒဏ်ရာ ရထားပါတယ်။

တိုက်ပွဲတွေ ရက်ဆက်နေတဲ့ မင်းတပ်မှာ မေလ ၃၁ ရက်နေ့ စစ်ကောင်စီ ရမ်းသမ်းပစ်တဲ့ လက်နက်ကြီးကြောင့် လျှပ်စစ်တာဝါတိုင် လဲကျပြီး မင်းတပ်မြို့တွင်းနဲ့ မတူပီမြို့တွေမှာ လျှပ်စစ်မီးတလကျော်ကြာ ပြတ်‌တောက်နိုင်တယ်လို့လည်း သိရပါတယ်။

 

========================

 

📌📌 ၃။ ချင်းကာကွယ်ရေးတပ်ဖွဲ့ (မင်းတပ်) ရဲ့ ‘အားယူထပျံ အောက်ချင်းအားမာန်’ ရံပုံငွေရှာဖွေရေးကမ်ပိန်းမှာ ပံ့ပိုးပါဝင်မှု အားနည်းနေ

 

ချင်းကာကွယ်ရေးတပ်ဖွဲ့ (မင်းတပ်) ရဲ့ ‘အားယူထပျံ အောက်ချင်းအားမာန်’ ကမ်ပိန်းမှာ ပံ့ပိုးပါဝင်မှု အားနည်းနေသေးတယ်လို့ သိရပါတယ်။

မေလ ၁၉ ရက်က စတင်တဲ့ ဒီရံပုံငွေရှာဖွေရေးကမ်ပိန်းကနေ တလအတွင်း သိန်း ၅၀၀၀ ရရှိနိုင်ဖို့ မျှော်မှန်းထားတာပါ။

ကမ်ပိန်းစတင်တဲ့ တပတ်ကျော်အကြာ လက်ရှိချိန်မှာတော့ မျှော်မှန်းပမာဏရဲ့ ၅ ရာခိုင်နှုန်းသာ ရရှိထားသေးတယ်လို့ ရံပုံငွေ ရှာဖွေရေး တာဝန်ခံတွေက ပြောပါတယ်။

၂၀၂၃ နှစ်ဦးပိုင်းကနေ ကာကွယ်ရေးတပ်ဖွဲ့ကို စည်းကမ်းပြည့်ဝပြီး ပိုမိုကျစ်လစ်ခိုင်မာတဲ့ တပ်ဖွဲ့တခုအဖြစ် ပြုပြင်ပြောင်းလဲနေတယ်လို့ကြေညာထားတဲ့ ချင်းကာကွယ်ရေးတပ်ဖွဲ့ (မင်းတပ်) အနေနဲ့ အသစ်ဖွဲ့စည်းထားတဲ့ ဘဏ္ဍာရေးကော်မတီတခုတည်းကနေသာ ဆက်သွယ်ပါဝင်ကြဖို့လည်း မေလ ၂၇ ရက်နေ့က ထုတ်ပြန်ထားပါတယ်။

 

========================

 

📌📌 ၄။ ကျည် ၅၀၀၀ ဖြည့်တင်းရေး တော်လှန်သူ့ကင်မရာ ကင်ပိန်းတွင် ပါဝင်ပေးရန် CDF-Kanpetletတိုက်တွန်း

 

တော်လှန်သူ့ကင်မရာဆိုတာ ချင်းပြည်နယ်၊ ကန်ပက်လက် မြိုနယ်အခြေစိုက် CDF-Kanpetlet တပ်မဟာအတွက် ကျည် ၅၀၀၀ ခန့် ဝယ်ယူနိုင်ရန် ကန်ပက်လက်မြိုနယ်၊ စီမံကိန်းနှင့် ဘဏ္ဍာရေးဌာနမှ ဦးစီးဆောင်ရွက်တဲ့ မဲ Campaign ဖြစ်တယ်လို့ Chin Defense Force - Kanpetletက ဆိုပါတယ်။ 

မြေပြင်က တိုက်ပွဲဝင်နေတဲ့ ရဲဘော်တွေအတွက် မရှိမဖြစ်လိုအပ်တဲ့ ကျည်ကို အလျင်မီအောင် တပ်ဆင်ပေးနိုင်ဖို့အတွက် Fundraising Team ကနေ  ဧပြီ (၂၅) ရက်နေ့ကစပြီး မဲအစောင်ရေ(၅၀၀၀) ရောင်းချပြီး မြန်မာကျပ်ငွေ သိန်း(၅၀၀) ရှာဖွေပံ့ပိုး ပေးနိုင်မယ့် အစီအစဉ်ဖြစ်ပါတယ်။

တော်လှန်ရေးကာလအတွင်း အခက်ခဲတွေ၊ အကြပ်အတည်းတွေကြားထဲက ယနေ့ထိ Chin Defense Force - Kanpetlet ကို အမြဲ ပါဝင်အားဖြည့်ပေးနေတဲ့ ပြည်တွင်း၊ ပြည်ပမှ မိဘပြည်သူများအားလုံးကို လေးစားစွာဖြင့် ကျေးဇူးတင်ရင်း ယခုပြုလုပ်တဲ့ ရန်ပုံငွေရှာဖွေရေး Campaign မှာ အားသွန်ခွန်စိုက် ပါဝင်ပေးကြဖို့ Chin Defense Force- Kanpetletက တိုက်တွန်းထားပါတယ်။

ဒီCampaignမှာ ပါဝင်အားဖြည့်ပေးတဲ့ မိဘပြည်သူများကို ကျေးဇူးတုံ့ပြန်သောအားဖြင့် စုစုပေါင်း ကာလတန်ကြေး သိန်း ၄၀ ကျော်ခန့် တန်ဖိုးရှိတဲ့ ဆုမဲ (၃)မျိုးကိုလည်း ထည့်သွင်းထားတယ်လို့ ဆိုပါတယ်။

 

#RadioNUGLocalNews

#SpringRevolution