15th JUL 2023 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇူလိုင်လ ( ၁၅ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ဟားခါး - ထန်တလန်နယ်မှာ တိုက်ပွဲ ပြင်းထန်နေဆဲ

 

စစ်ကောင်စီတပ်သား သေဆုံးမှုများပြီး လက်နက်၊ ခဲယမ်းတွေ သိမ်းဆည်းရမိထားပါတယ်။

 

ဟားခါး - ထန်တလန်အကြား သီတာအနီးမှာ စစ်ကောင်စီတပ်နဲ့ ချင်းအမျိုးသားတပ်မတော် (CNA) တို့အကြား တိုက်ပွဲ ဆက်လက် ပြင်းထန်နေဆဲ ဖြစ်တယ်လို့ ဒေသတွင်း သတင်းဌာနတွေက ရေးသားပါတယ်။

 

ဇူလိုင် ၇ နဲ့ ၈ ရက်တွေမှာ တိုက်ပွဲပြင်းထန်ခဲ့ပြီး စစ်ကောင်စီတပ်ဘက် ၆ ဦးသေဆုံးကြောင်းနဲ့ လက်နက် ၄ လက်အပါအဝင် ကျည်အများအပြား သိမ်းဆည်းရမိထားတယ်လို့ ချင်းဂျာနယ်က ဇူလိုင် ၉ ရက်နေ့ ဖော်ပြလာပါတယ်။

စစ်ကောင်စီတပ်ဘက်က ကုန်းကြောင်း၊ လေကြောင်းတိုက်ခိုက်မှုအပြင် ဟားခါးအခြေစိုက် တပ်ကုန်းကနေပါ လက်နက်ကြီးပစ်ကူပြီး ထိုးစစ်ဆင်နေတာလို့ သိရပါတယ်။

 

ဟားခါးကနေ ထန်တလန်ဘက်ကို စစ်ကြောင်းထိုးနေတဲ့ စစ်ကောင်စီတပ်နဲ့ ချင်းအမျိုးသားတပ်မတော် (CNA) တို့အကြား သီတာအနီး တိုက်ပွဲဟာ ၂၀၂၃ မေလကတည်းက နေ့စဉ်နဲ့အမျှ ပြင်းထန်နေတာပါ။

 

စစ်ကောင်စီတပ်ဟာ တိုက်ပွဲတွင်း အထိနာတာကြောင့် နောက်ကြောင်းပြန်လှည့်သွားတယ်လို့လည်း ချင်းဂျာနယ်က ရေးသားထားပါတယ်။

 

========================

 

📌📌 ၂။ မင်းတပ်မြို့တွင်း ပစ်ခတ်မှု ထပ်ဖြစ်၊ ချင်း - မ‌ကွေး မော်တော်ကားလမ်း ယာယီပိတ်လိုက်တယ်လို့ ဒုတိယအကြိမ် ထုတ်ပြန် 

 

မင်းတပ်မြို့ထဲမှာ ၂ ဘက်အပြန်အလှန် ပစ်ခတ်မှုတွေ ဖြစ်ပွားနေတယ်လို့ သိရပါတယ်။

 

ဇူလိုင် ၁၃ ရက် မနက်ပိုင်းအစောကနေ ချင်းကာကွယ်ရေးတပ်ဖွဲ့ (မင်းတပ်) နဲ့ စစ်ကောင်စီတပ်တို့ ပစ်ခတ်နေတာလို့ ယူဆရတဲ့အကြောင်း အရှေ့ပြင်ရပ်ကွက်မှာ နေထိုင်နေသူတဦးက ပြောပါတယ်။

 

“အပြန်အလှန် ပစ်တဲ့အသံလိုတော့ တောက်လျှောက်ကြားရတယ်။ ဘယ်မှ မသွားရဲတော့ နောက်ဆက်တွဲ မသိရဘူး။” လို့ ပြောပါတယ်။

 

ပစ်ခတ်သံတွေကို မနက် အစောပိုင်းကနေ ၁၁ နာရီဝန်းကျင်အထိ ကြားနေရတာလို့လည်း သူက ပြောပါတယ်။

 

မြို့တွင်း ပစ်ခတ်မှုဖြစ်စဉ်နဲ့ နောက်ဆက်တွဲ အထိအခိုက်ကိုတော့ အတည်မပြုနိုင်သလို ချင်းကာကွယ်ရေးတပ်ဖွဲ့ (မင်းတပ်) ကလည်း တစုံတရာ ထုတ်ပြန်တာ မရှိသေးပါဘူး။

 

ပြီးခဲ့တဲ့ မေလလောက်ကစပြီး ချင်းကာကွယ်ရေးတပ်ဖွဲ့ (မင်းတပ်) နဲ့ ပူးပေါင်းတပ်ဖွဲ့ဝင်တွေက စစ်ဆင်ရေးတွေ ဆက်တိုက် ဖော်ဆောင်နေတာပါ။

 

စစ်ကောင်စီတပ်နဲ့ ကာကွယ်ရေးတပ်ဖွဲ့တို့ ထိတွေ့ပစ်ခတ်မှု အချိန်မရွေး ဖြစ်ပွားနိုင်တာကြောင့် ချင်း - မကွေး မော်တော်ကားလမ်းပိုင်းကို ယာယီပိတ်ထားတယ်လို့ ချင်းကာကွယ်ရေးတပ်ဖွဲ့ (မင်းတပ်) နဲ့ ဂန့်ဂေါခရိုင်အမှတ် ၁၃ တပ်ရင်းက ထုတ်ပြန်ထားပါတယ်။

 

========================

 

📌📌 ၃။ သိုင်းငင် စစ်ကောင်စီကင်းစခန်း တိုက်ခိုက်

 

စခန်းသိမ်းတိုက်ပွဲအတွင်း ကာကွယ်ရေးတပ်ဖွဲ့ဝင် ၄ ဦး ကျဆုံးပြီး စစ်ကောင်စီဘက် ထိခိုက်သေဆုံးတာ သိမ်းဆည်းရမိတာ များတယ်လို့ CDF CDM SIYIN က သတင်းထုတ်ပြန်လာပါတယ်။

 

တီးတိန်မြို့နယ်၊ သိုင်းငင် စစ်ကောင်စီ ကင်းစခန်းကို ချင်းကာကွယ်ရေးတပ်ပေါင်းစုက တိုက်ခိုက်နိုင်ခဲ့တယ်လို့ CDF Civic Defense Militia Siyin က ဒီကနေ့ သတင်းထုတ်ပြန်ပါတယ်။

 

ဇူလိုင် ၁၁ ရက် မနက် ၅ နာရီကျော်မှာ ချင်းဒေသကာကွယ်ရေးတပ်ပေါင်းစု (CDF CDM SIYIN, PDF Zoland + B5 ME, CNDF, TCDF, KKG B7, PDA နဲ့ PDF Kalay, S2 အဖွဲ့) က ဝင်ရောက် စီးနင်းခဲ့တာပါ။ 

 

၇ နာရီနီးပါးကြာတဲ့ စခန်းသိမ်းတိုက်ပွဲမှာ စစ်ကောင်စီတပ်ဖွဲ့ဝင် အများအပြား၊သေ၊ဆုံးခဲ့သလို လက်၊နက်၊ခဲ၊ယမ်းတွေပါ သိမ်းဆည်းရမိတယ်လို့ ထုတ်ပြန်ပါတယ်။သိုင်းငင်စခန်းသိမ်းတိုက်ပွဲမှာ ချင်းကာကွယ်ရေးတပ်ပေါင်းစုရဲဘော် ၄ ဦးကျပြီး ၂ ဦး (မစိုးရိမ်) ဒဏ်ရာရတယ်လို့လည်း သိရပါတယ်။

 

တိုက်ပွဲပြင်းထန်နေတဲ့ သိုင်းငင်ကျေးရွာထဲကို စစ်ကောင်စီက လေကြောင်းတိုက်ခိုက်မှုတွေ ဆက်တိုက်ပြုလုပ်နေပြီး ပူးပေါင်းတပ်ဖွဲ့ဝင်တွေ အောင်အောင်မြင်မြင်ဆုတ်ခွာနိုင်ခဲ့တယ်လို့ CDF Civic Defense Militia Siyin ရဲ့ ထုတ်ပြန်ချက်မှာ ‌ဖော်ပြပါတယ်။

 

ဇူလိုင် ၁၁ ရက် တီးတိန်မြို့နယ်၊ သိုင်းငင် စစ်ကောင်စီစခန်းသိမ်းတိုက်ပွဲအတွင်း စစ်‌ကောင်စီတပ်ဖွဲ့ဝင် ထိခိုက်သေဆုံးမှုအရေအတွက်ကိုတော့ The Mindat Post အနေနဲ့ သီးခြား အတည်မပြုနိုင်သေးပါဘူး။

 

အပြစ်မဲ့ ပြည်သူတွေကို စွပ်စွဲ ဖမ်းဆီးနေတဲ့ သိုင်းငင် စစ်ကောင်စီစခန်းကို လက်ပိုက်ကြည့်နေတော့မှာ မဟုတ်တဲ့အကြောင်း CDF Civic Defense Militia Siyin က ပြီးခဲ့တဲ့ ၁၀ ရက်ကျော်မှာ သတိပေး ထုတ်ပြန်ထားပါတယ်။

#RadioNUGLocalNews

#SpringRevolution