12 Oct 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ အောက်တိုဘာလ ( ၁၂ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ Mindat University Students Union က CDF မင်းတပ်ထံ ကျပ် ၁၀၈ သိန်းတိတိ ထောက်ပို့။

 

Mindat University Students Union - MUSU အနေနဲ့ CDF မင်းတပ်ထံ ကျပ် ၁၀,၈၀၀,၀၀၀ (တစ်ရာ့ရှစ်သိန်း) တိတိ ပေးပို့ပါဝင်နိုင်ခဲ့တယ်လို့ သိရပါတယ်။

၂၀၂၄ ခုနှစ် ၇လတာ (မတ် - စက်တင် ဘာ)အတွင်း ထောက်ပို့ထီရောင်းချမှုမှတဆင့် အခုလို ပါဝင်နိုင်ခဲ့တာလို့ MUSU က ဆိုပါတယ်။

ထီလက်မှတ်ဝယ်ယူ ကံစမ်းသူအားလုံးကို ကျေးဇူးတင်ကြောင်းနဲ့ ဆက်လက်ဝန်းရံအားပေးကြဖို့လည်း အသိပေးပါတယ်။

ချင်းကာကွယ်ရေးတပ်ဖွဲ့ (မင်းတပ်)ထံ ရောက်ရှိမယ့် ထောက်ပို့ငွေအတွက် Mindat University Students Union Facebook Pageထံ ထီလက်မှတ် ဝယ်ယူနိုင်တယ်လို့ ချင်းကာကွယ်ရေးတပ်ဖွဲ့ (မင်းတပ်) ထောက်ပို့ထီအရောင်းကိုယ်စားလှယ်တွေက ပြောပါတယ်။

အာဏာမသိမ်းမီ ဖွဲ့စည်းထားတဲ့ Mindat University Students Union – MUSU မှာ ပါဝင်သူ ကျောင်းသူ/ကျောင်းသားအများစုဟာ စစ်အာဏာသိမ်းမှုကို ဆန့်ကျင်ပြီး အကြမ်းမဖက်အာဏာဖီဆန်တဲ့ CDMမှာ တက်တက်ကြွကြွပါဝင်နေကြသလို တချို့က လက်နက်ကိုင် တော်လှန်နေကြပါတယ်။

 

========================

 

📌📌 ၂။ ဟားခါးမြို့ပေါ်ကရဲတပ်ဖွဲ့ဝင်တစ်ဦး လက်နက်ခဲယမ်းနဲ့အတူ CDF-Hakha ထံအလင်းဝင်။

 

ချင်းပြည်နယ်၊ ဟားခါးမြို့ပေါ်ကအကြမ်းဖက် စစ်ကောင်စီလက်အောက်ခံ ရဲတပ်ဖွဲ့ဝင်တစ်ဦးဟာ အောက်တိုဘာလ ၈ရက်နေ့မှာ လက်နက်ခဲယမ်းများ နဲ့အတူအလင်းဝင်လာခဲ့တယ်လို့ CDF-Hakha က သတင်းထုတ်ပြန်ပါတယ်။

အကြမ်းဖက်စစ်ကောင်စီလက်အောက်မှာ တာဝန်မထမ်းဆောင်လိုတော့ဘဲ လက်နက်ခဲယမ်းနဲ့အတူအလင်းဝင်လာသူကို နွေးနွေးထွေးထွေးကြိုဆိုတဲ့အပြင် ဆုငွေချီးမြှင့်ပြီး လုံခြုံတဲ့နေရာရောက်တဲ့အထိ တာဝန်ယူထားတယ်လို့ CDF-Hakhaက ဆိုပါတယ်။

စစ်ကောင်စီလက်အောက်မှာ တာဝန်မထမ်းဆောင်လိုတော့ဘဲ အလင်းဝင်ခြင်းဖြင့် နွေဦးတော်လှန်ရေးမှာ ပူးပေါင်းပါဝင်ချင်သူတိုင်း ချင်းပြည်ကာကွယ်ရေးတပ်ဖွဲ့ -ဟားခါးကိုအချိန်မရွေး ဆက်သွယ်နိုင်ကြောင်းနဲ့ အလင်းဝင်လာသူများကို လုံခြုံတဲ့နေရာ ပို့ပေးမှာဖြစ်ကြောင်း CDF-Hakhaက အသိပေးထားပါတယ်။

CDF-Hakhaဟာ စစ်ကောင်စီလက်အောက်မှာ တာဝန်မထမ်းဆောင်ချင်တော့တဲ့သူများကို အလင်းဝင်ဖို့ အမြဲဖိတ်ခေါ်လျက်ရှိပြီး ပြီးခဲ့တဲ့ စက်တင်ဘာလ အတွင်း ဟားခါးမြို့ပေါ်က တစ်ပွင့်ဗိုလ်ရဲတစ်ဦးအပါအဝင် ရဲတပ်ဖွဲ့ဝင် ၄ ဦးအထိCDF-Hakha ထံအလင်းဝင်ခဲ့တယ် လို့ သိရပါတယ်။

 

========================

 

📌📌 ၃။ Y-12လေယာဉ်က ကန်ပက်လက်မြို့ပေါ်နှင့် အနီးအနားကို အကြိမ်ကြိမ်လှည့်ပတ် ကင်းထောက်။

 

ချင်းပြည်နယ် ၊ကန်ပက်လက်မြို့နှင့် အနီးအနားနေရာတွေကိုအောက်တိုဘာ ၁၀ ရက်နေ့၊ နေ့လယ်ပိုင်းမှာY-12လေယာဉ်က အကြိမ်ကြိမ်လှည့်ပတ် ကင်းထောက်လာတယ်လို့ သတင်းရရှိပါတယ်။

စားနပ်ရိက္ခာလာရောက်ချပေးတယ်လို့ဒေသခံတချို့က ပြောဆိုကြပေမယ့် ဖုန်းလိုင်းများပြတ်တောက်နေမှုကြောင့် အတည်ရန် အခက်အခဲဖြစ်နေပါတယ်။ 

ချင်းကာကွယ်ရေးတပ်ဖွဲ့(ကန်ပက်လက်)၊ မြို့ပေါ်အခြေစိုက် တူမီးတပ်ရင်း၊ တာဝန်ရှိတစ်ဦးကတော့ "Y-12ကင်းထောက်လေယာဉ် အကြိမ်ကြိမ်လာပတ်တာ မှန်ပါတယ်၊ လာရောက်

ထောက်လှမ်းတယ်နဲ့တူပါတယ်၊ ရိက္ခာလာချပေးတယ်ဆိုတာ မဟုတ်ပါဘူး၊ အဲလို အရင်လာပြီးမှ နောက်မှာ ဘာဆက်လာလုပ်မလဲတော့ မပြောတတ်ပါဘူး"လို့ ပြောပါတယ်။

ယခုတလော ဆောနယ်၊ ယောနယ်တချို့နေရာတွေမှာ စစ်ကောင်စီက လေကြောင်းတိုက်ခိုက်မှု ပိုလုပ်လာပြီး ချင်းပြည်နယ်မှာလည်း တောက်လျှောက်ဆိုသလို ဗုံးကြဲတိုက်ခိုက်‌နေတာပါ။ ချင်းကာကွယ်ရေးတပ်ဖွဲ့များကလည်း လေကြောင်းတိုက်ခိုက်မှုကို သတိထားပြီးနေထိုင်ဖို့ အမြဲတိုက်တွန်းထားကြပါတယ်။

#RadioNUGLocalNews

#SpringRevolution