25 Jan 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဇန်နဝါရီလ ( ၂၅ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ ခလရ ၂၇၄ ကနေ ထွက်ပြေးလို့ ပြန်လည်ဖမ်းမိတဲ့ စစ်ကောင်စီတပ်ဖွဲ့နဲ့ မိသားစုဝင် ၁၆ ဦးအထိ ရှိလာ။

 

ချင်းပြည်နယ်၊ မင်းတပ်မြို့ ခလရ (၂၇၄) က ထွက်ပြေးတဲ့ တပ်ကြပ်တစ်ဦးကို ယောနယ်တစ်နေရာမှာ ထပ်မံဖမ်းဆီးရမိတယ်လို့ ဗျူဟာအမှတ် - ၈၁ ယောဗျူဟာက ဇန်နဝါရီ ၁၇ ရက်နေ့ ထုတ်ပြန်ပါတယ်။

၂၀၂၄ နိုဝင်ဘာ ၉ ရက်နေ့စတင်တဲ့ ချင်းညီနောင်စစ်ဆင်ရေးကြောင့် စခန်းစွန့်ခွာထွက်ပြေးသူ စစ်ကောင်စီတပ်သားနဲ့ သူတို့မိသားစုဝင် စုစုပေါင်း ၁၆ ဦးအထိ ယောနယ်တနေရာမှာ စစ်ဥပဒေနဲ့အညီ ဖမ်းဆီးထိန်းသိမ်းထားဆဲလို့လည်း အသိပေးထားပါတယ်။

ဗျူဟာအမှတ် ၈၁ - ယောဗျူဟာသည် ဂန့်ဂေါခရိုင်အမှတ် (၁၃၊ ၁၅၊ ၁၆၊ ၁၇၊ ၁၈) တပ်ရင်းတွေနဲ့ စုပေါင်း ဖွဲ့စည်းထားတာဖြစ်ပြီး ယောနယ်အတွင်း အခြေစိုက်ပါတယ်။

တဖက်မှာ ကန်ပက်လက်မြို့ကနေ စွန့်ခွာထွက်ပြေးတဲ့ စစ်ကောင်စီတပ်ဖွဲ့ဝင်တချို့ကိုလည်း မကွေးတိုင်း၊ ဆောမြို့နယ်မှာ ပြန်လည်ဖမ်းဆီးရမိတာရှိတယ်လို့ ဒေသတွင်းအခြေစိုက် တော်လှန်ရေးအင်အားစုတွေက ထုတ်ပြန်ပါတယ်။

 

========================

 

📌📌 ၂။ NUGက ICNCC နဲ့ Chinland Council ကို တော်လှန်ရေးရန်ပုံငွေ ပေးအပ်။

 

အမျိုးသားညီညွတ်ရေးအစိုးရ - NUG က ရရှိထားတဲ့ တော်လှန်ရေး ရန်ပုံငွေတွေကို မဟာမိတ်တွေထံ မျှဝေတဲ့ အခမ်းအနားကို ဇန်နဝါရီ ၁၈ ရက်နေ့က ပြုလုပ်ခဲ့တယ်လို့ ထုတ်ပြန်လာပါတယ်။

အဲဒီအခမ်းအနားမှာ နိုင်ငံတော်ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ်နဲ့ အမျိုးသားညီညွတ်ရေးအစိုးရ တာဝန်ရှိသူများ၊ ကြားကာလ ချင်းအမျိုးသားအတိုင်ပင်ခံကောင်စီ (ICNCC)၊ Chinland Council (CC) က တာဝန်ရှိသူတွေ တက်ရောက်တာ တွေ့ရပါတယ်။

ချင်းအမျိုးသားရေးအတွက် အင်အားစု၊ အဖွဲ့အစည်းအကြား စည်းလုံးညီညွတ်ရေး နှစ်ဘက်ခေါင်းဆောင်အကြား အတူတကွ နည်းလမ်းရှာ ကြိုးပမ်းဆောင်ရွက်သွားကြဖို့လည်း ဆွေးနွေးခဲ့ကြတယ်လို့ ထုတ်ပြန်ထားပါတယ်။

 

========================

 

📌📌 ၃။ ဟားခါးမှာ စစ်ကောင်စီတပ်ဖွဲ့ဝင် ၄ဦး လက်နက်ခဲယမ်းနဲ့အတူ အလင်းဝင်။

 

ချင်းပြည်နယ်၊ ဟားခါးမြို့မှာ စစ်ကောင်စီ ပြည်သူ့စစ် ခေါ် ပျူစောထီး ၄ ဦး လက်နက်ခဲယမ်းနဲ့အတူ အလင်းဝင်ရောက်လာခဲ့တယ်လို့ ချင်းကာကွယ်ရေးတပ်ဖွဲ့ (ဟားခါး)က ဇန်နဝါရီလ ၂၁ ရက်နေ့က သတင်းထုတ်ပြန်ထားပါတယ်။

စစ်ကောင်စီ ပြည်သူ့စစ် ၄ ဦးဟာ စစ်ကောင်စီတပ် လက်အောက်မှာ တာဝန်ထမ်းဆောင်လိုခြင်းမရှိတဲ့အတွက် ဇန်နဝါရီလ ၈ ရက်နဲ့ ၁၄ ရက်နေ့က CDF-Hakha ဆီ ဆက်သွယ်အလင်းဝင်ရောက်လာကြတာဖြစ်ပါတယ်။

CDF-Hakha က အလင်းဝင်ရောက်လာတဲ့ စစ်ကောင်စီ ပြည်သူ့စစ် ၄ ဦးကို ကြိုဆိုပြီး ဆုငွေတွေချီးမြှင့်တဲ့အပြင် လုံခြုံတဲ့နေရာ အရောက်ထိ ပို့ဆောင်ပေးတယ်လို့ ထုတ်ပြန်ချက်မှာ ပါရှိပါတယ်။

နောက်ထပ် စစ်ကောင်စီတပ်ဖွဲ့တွေအနေနဲ့ အလင်းဝင်ရောက်လိုရင် CDF-Hakhaဆီ ဆက်သွယ်ပြီး အလင်းဝင်ရောက်လာနိုင်တယ်လို့ ဆိုပါတယ်။

 

========================

 

📌📌 ၄။ (CNO/CNDF) ထိန်းချုပ်နယ်မြေအတွင်းရှိ ဘိန်းစိုက်ခင်းများကို CNDF ဖျက်ဆီး။

 

ချင်းအမျိုးသားအဖွဲ့ချုပ် (CNO/CNDF) ထိန်းချုပ်နယ်မြေအတွင်းရှိ ဘိန်းစိုက်ခင်းများကို ၂၀၂၅ ခုနှစ် ဇန်နဝါရီလ (၈)ရက်နေ့ကစပြီး CNO/CNDF ပြည်ထဲရေးဌာန လက်အောက်ရှိ ဖလမ်းမြို့နယ် ပြည်သူ့ရဲတပ်ဖွဲ့က ဖျက်ဆီးလိုက်တယ်လို့ (CNO/CNDF)မှ သတင်းထုတ်ပြန်ထားပါတယ်။

ချင်းအမျိုးသားအဖွဲ့ချုပ် ထိန်းချုပ်နယ်မြေအတွင်းရှိ အခြားဘိန်းစိုက်ခင်းများ ရှိ၊ မရှိ ထပ်မံစစ်ဆေးနေပြီး ပြည်သူများအနေဖြင့် နောက်နောင်တွင် ယခုကဲ့သို ဘိန်းစိုက်ပျိုးခြင်းများ မပြုလုပ်ရန်နှင့် စစ်ဆေးတွေ့ရှိပါက တည်ဆဲဥပဒေအရ ငွေဒဏ်အပါအဝင် အရေးယူမှုများ လုပ်ဆောင်သွားမယ်လို့ အသိပေးထားပါတယ်။

#RadioNUGLocalNews

#SpringRevolution