12th AUG 2022 - (Ethnic language program-CHO_KAANG) by Radio NUG

📌 (ချင်း တိုင်းရင်းသား - Kaang ကာဏ်း ဘာသာစကား) ထုတ်လွှင့်မှု အစီအစဥ် ၂၀၂၂ သြဂုတ်လ ( ၁၂ ) ရက်နေ့နောက်ဆုံးရပြည်တွင်းသတင်းများ 

📌📌 ၁။ ရိခေါဒါရ်တိုက်ပွဲ စစ်ကောင်စီ ဒုဗိုလ်မှူးကြီး အပါအ၀င် ၅ ဦးသေဆုံး၊ ချင်းပြည်နယ် မြောက်ပိုင်း မြို့တော်ဟားခါးတွင် စစ်ရေးအခြေအနေ တင်းမာနေ 

၂၀၂၂၊ သြဂုတ်လ ( ၁၀ ) ရက်နေ့တွင် အိန္ဒိယ-မြန်မာနယ်စပ် ဖလမ်းမြို့နယ် ရိခေါဒါရ်မြို့ရှိ စစ်ကောင်စီတပ်စခန်းအား CNDF၊ PDF-Zoland၊ CDM-Siyin နှင့် MEDF ပူးပေါင်းကာကွယ်ရေးတပ်ဖွဲ့တို့မှ အနီးကပ် သွားရောက်တိုက်ခိုက်ခဲ့ရာ စစ်ကောင်စီ ဒုဗိုလ်မှူးကြီးဝေမျိုးပိုင် အပါအဝင် ၅ ဦး သေဆုံးပြီး ဒဏ်ရာရရှိသူများပြားကြောင်း CNO/ CNDF က သတင်းထုတ်ပြန်သည်။ အဆိုပါတိုက်ပွဲတွင် တော်လှန်ရေးတပ်ဖွဲ့ဝင် ရဲဘော်တစ်ဦး အသေးစားဒဏ်ရာရရှိကြောင်းလည်း ၎င်းထုတ်ပြန်ချက်တွင် ဖော်ပြသည်။ 

ထို့ပြင် ဟားခါးမြို့ပေါ်၌ စစ်ကောင်စီတပ်နှင့် ဒေသခံကာကွယ်ရေးတပ်တို့ သြဂုတ် ( ၁၀ ) ရက်နေ့တွင် ထိတွေ့ပစ်ခတ်မှုဖြစ်ပွားခဲ့ပြီး စစ်ကောင်စီ၏ လက်နက်ကြီးပစ်ခတ်မှုကြောင့် နှီာယာလောန်ကျေးရွာနေ အမျိုးသမီးတစ်ဦး အသက်ဆုံးရှုံးခဲ့ပြီး အမျိုးသားတစ်ဦး ဒဏ်ရာရရှိထားကြောင်း ဒေသတွင်းသတင်းဌာန The Chin Journal ကရေးသားသည်။ လက်ရှိတွင် စစ်ကောင်စီတပ်နှင့် ဒေသခံကာကွယ်ရေးတပ်တို့ ဟားခါး-ထန်တလန်အကြား သီမြစ်ချောင်းတဝိုက်၌ စစ်ရေးအခြေအနေတင်းမာနေပြီး CDF ဟားခါးက စစ်ကောင်စီတပ်ကို မြို့ပြင်ထွက်တိုက်ပွဲဆင်နွှဲရန် စိန်ခေါ်ကြောင်း သြဂုတ် ( ၁၀ ) ရက်နေ့ မွန်းလွဲပိုင်းတွင် အတိအလင်း ထုတ်ပြန်ထားသည်။ 

📌📌 ၂။ ဖမ်းခံရသည့် မြန်မာလုပ်သားများအရေး မလေးရှားအစိုးရထံ အမျိုးသားညီညွှတ်ရေး အစိုးရ NUG မေတ္တာရပ်ခံစာပေးပို့ 

၂၀၂၂၊ သြဂုတ် ( ၁၀ ) ရက်နေ့တွင် မလေးရှားလူဝင်မှုကြီးကြပ်ရေးက ဖမ်းဆီးသွားတဲ့ မြန်မာနိုင်ငံသားတွေအရေး ဆောင်ရွက်ပေးဖို့ မလေးရှားနိုင်ငံခြားရေးဝန်ကြီးဌာနကို မေတ္တာရပ်ခံစာပေးပို့ထားကြောင်း အမျိုးသားညီညွှတ်ရေး အစိုးရ NUG နိုင်ငံခြားရေးဝန်ကြီးဌာနက ဒီကနေ့ အသိပေးထုတ်ပြန်လိုက်ပါတယ်။ ၂၀၂၂ သြဂုတ်လ ၉ ရက်နေ့ မလေးရှားနိုင်ငံ ဆယ်လန်ဂေါပြည်နယ် ကာဂျမ်းမြို့မှာရှိတဲ့ တရားမဝင်နေနိုင်သူတွေ ရှိရာ တိုက်ခန်းတွေကို မလေးရှားလဝက ဦးဆောင် ဝင်ရောက်စီးနင်းရှာဖွေပြီး တရားမဝင်ရွှေ့ပြောင်းလုပ်သား ၁၇၅ ဦးဖမ်းမိခဲ့တာပါ။ 

ဖမ်းဆီးခံရတဲ့ မြန်မာနိုင်ငံသားတွေအရေးအတွက် မလေးရှားနိုင်ငံခြားရေးဝန်ကြီးဌာနထံ မေတ္တာရပ်ခံစာပေးပို့ထားပြီး အချိန်နဲ့တပြေးညီ ဆက်လက်ညှိနှိုင်းဆောင်ရွက်သွားမယ်လို့ အမျိုးသားညီညွှတ်ရေး အစိုးရ NUG နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ တွေ့ရပါတယ်။ မလေးရှားအစိုးရဟာ အာဏာသိမ်းစစ်ကောင်စီကို အသိအမှတ်မပြုဖို့နဲ့ NUG နဲ့ထိတွေ့ဆက်ဆံဖို့ တိုက်တွန်းဆော်သြနေတဲ့ အာဆီယံအဖွဲ့ဝင်နိုင်ငံလည်း ဖြစ်ပါတယ်။  

📌📌 ၃။ IMCO က ဦးစီးပြီး မင်းတပ်မြို့နယ်အတွက် ကံစမ်းမဲလက်မှတ်များရောင်းချနေ၊ ပထမဆု USD 5000 သတ်မှတ်  

၂၀၂၂၊ ဩဂုတ် ( ၉ ) ရက်နေ့တွင် နိုင်ငံတကာရောက် မင်းတပ်ချိုးအဖွဲ့ (IMCO) က ဦးဆောင်၍ မင်းတပ်မြို့နယ်တွင် အသုံးပြုရန် ကံစမ်းမဲလက်မှတ်များ ရောင်းချနေကြောင်းသိရသည်။ "CDF( Mindat ) အတွက်အရေးကြီး ပရောဂျက်များ နှင့် မိုးတွင်းရိက္ခာ၊ ဆေးဝါး အတွက် အလှူငွေ အကူငွေတွေ ငွေတော်တော်များများလိုအပ်နေပါသည်" ဟူ၍ IMCO အဖွဲ့က ၎င်းတို့၏ လူမှုကွန်ရက်စာမျက်နှာတွင် ရေးသားဖော်ပြထားသည်။

 "မင်းတပ် တော်လှန်ရေးအတွက် နည်းမျိုးစုံနဲ့ရန်ပုံငွေရှာနေကြရတာပါ။ ယခုကံစမ်းမဲထီလက်မှတ်များကို ထိုးလည်းထိုး၊ ရောင်းလည်းရောင်းပေးကြဖို့မေတ္တာရပ်ခံပါတယ်" ဟူ၍ IMCO အဖွဲ့က ဆိုသည်။ အဆိုပါ ကံစမ်းမဲ ရောင်းချမှုတွင် ပထမဆု အနေဖြင့် အမေရိကန်ဒေါ်လာ ၅၀၀၀ ၊ဒုတိယ ဆု ဒေါ်လာ ၃၀၀၀ ၊ တတိယဆု ဒေါ်လာ ၂၀၀၀ ဖြစ်ပြီး နှစ်သိမ့်ဆု ၄ ဆုတွင် ဒေါ်လာ ၄၀၀ စီ သတ်မှတ်ထားကြောင်းသိရသည်။ 

 📌📌 ၄။ မြိုင်-ပခုက္ကူကားလမ်းအသုံးပြုမှု ခေတ္တရပ်နားရန် မြိုင် PDF သတိပေး

၂၀၂၂ ဩဂုတ် ( ၉ ) ရက်နေ့တွင် စစ်ကောင်စီတပ်ဖွဲ့ဝင်များ ကင်းပုန်းဝပ်နေခြင်းကြောင့် မြိုင်-ပခုက္ကူကားလမ်းကို အသုံးမပြုကြရန် မြိုင် PDF က သြဂုတ် ၉ ရက်နေ့တွင် အတိအလင်းထုတ်ပြန်သည်။ ဤကဲ့သို့ သတိပေးချက်များ ထုတ်ပြန်ထားသော်လည်း မော်တော်ယာဥ်အချို့ သွားလာလျက်ရှိသည်ကို တွေ့ရသည်ဟူ၍လည်း မြိုင် PDF ကဆိုသည်။ 

သတိပေးထုတ်ပြန်သည့်နောက် ထိုကဲ့သို့ သွားလာမှုများ ဆက်တိုက်ပြုလုပ်နေမည်ဆိုပါက နောက်ဆက်တွဲအကျိုးဆက်များကို လုံးဝ (လုံးဝ) တာဝန်ယူမည်မဟုတ်ကြောင်း ၎င်းထုတ်ပြန်ချက်တွင် တပါတည်းဖော်ပြသည်။  

📌📌 ၅။ မြိုင်တွင် စစ်ကောင်စီနှင့် ပျူစောထီးများ အထိုင်ချထားသည့် စခန်းအား ဒေသခံကာကွယ်ရေးတပ်များ ဝင်ရောက်ပစ်ခတ်ရာ စစ်ကောင်စီတပ်ဖွဲ့ဝင် ၃၈ ဦးသေဆုံး၊ ကာကွယ်ရေး ရဲဘော် ၃ ဦးကျ

၂၀၂၂ သြဂုတ် ( ၇ ) ရက်နေ့တွင် မြိုင်ပြည်သူ့ကာကွယ်ရေးတပ်ဖွဲ့မှ ဦးဆောင်၍ မကွေးပြည်သူ့ကာကွယ်ရေးတပ်မတော်နှင့် မဟာမိတ် ၁၀ ဖွဲ့ ပူးပေါင်းကာ မြိုင်မြို့နယ် တွင်းမကျေးရွာစာသင်ကျောင်းရှိ စစ်ကောင်စီစခန်းနှင့် ပျူစောထီးသင်တန်းစခန်းအား သြဂုတ် ၆ ရက်နေ့တွင် အလစ်ဝင်ရောက်တိုက်ခဲ့သည်ဟု PDF မကွေးက ထုတ်ပြန်သည်။ 

ယင်းစစ်ဆင်ရေးတွင် စစ်ကောင်စီတပ်သားနှင့် ပျူစောထီး ၃၈ ဦး ပွဲချင်းပီးသေဆုံးကာ ဒဏ်ရာရ ၂၇ ဦး ပခုက္ကူဆေးရုံသို့ ပို့ဆောင်ထားရကြောင်း ၎င်းထုတ်ပြန်ချက်အရ သိရသည်။ ပြည်သူ့ကာကွယ်ရေးတပ် ရဲဘော် ၃ ဦး ကျဆုံးခဲ့ရပြီး ၅ ဦး (မစိုးရိမ်ရ) ဒဏ်ရာရရှိခဲ့ကြောင်း မြေပြင်စစ်ကူ၊ လေကြောင်းစစ်ကူ ရောက်ရှိလာမှုကြောင့် နံနက် ၆ နာရီ ၄၁ မိနစ်အချိန်တွင် ကာကွယ်ရေးတပ်ဖွဲ့ဝင်များ ပြန်လည်ဆုတ်ခွာခဲ့ရသည်ဟု ဆိုသည်။

#RadioNUGLocalNews

#SpringRevolution