13th AUG 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ သြဂုတ်လ ( ၁၃ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။  ၆ လအတွင်း တိုက်ပွဲပေါင်း ၂၂၀ ကျော်ဖြစ်ပွားခဲ့ ကြောင်း CJDC ထုတ်ပြန်၊ မင်းတပ်မြို့နယ်အတွင်း ၃၅ ကြိမ်ဖြစ်ပွားခဲ့

၂၀၂၂ ဖေဖော်ဝါရီမှ ဇူလိုင်လကုန်အထိ Chinland Joint Defense Committee (CJDC) အဖွဲ့၀င် ချင်းတော်လှန်ရေး တပ်ဖွဲ့များနှင့် စစ်ကောင်စီတပ်ဖွဲ့အကြား တိုက်ပွဲပေါင်း ၂၂၀ ဖြစ်ပွားခဲ့ပြီး စစ် ကောင်စီတပ်သား ၉၂၇ ဦးသေဆုံးပြီး CJDC အဖွဲ့၀င် ချင်းကာကွယ်ရေး ရဲဘော် ၅၃ ဦးကျဆုံးခဲ့ကြောင်း CJDC က ဩဂုတ် ၁၁ ရက်တွင် ထုတ်ပြန်သည်။ မင်းတပ်မြို့နယ်တွင် စစ်ကောင်စီတပ်နှင့် CDF မင်းတပ်တို့ ထိတွေ့ပစ်ခတ်မှုပေါင်း ၃၅ ကြိမ်ရှိခဲ့ပြီး ဟားခါးမြို့နယ်နှင့် ဖလမ်းမြို့နယ်နောက် တိုက်ပွဲဖြစ်ပွားမှု အများဆုံးဖြစ်သည်ဟု ၎င်းထုတ်ပြန်ချက်အရ သိရသည်။

 

ကလေးမြို့နယ်နှင့် ဂန့်ဂေါ်မြို့နယ်တွင် အဓိကလှုပ်ရှားသော CDF-KKG သည် ချင်းပြည်နယ်အတွင်း စစ်ရေးလှုပ်ရှားမှု မပြုလုပ်သော်လည်း CJCD အဖွဲ့၀င်ဖြစ်သောကြောင့် စာရင်းတွင်ထည့်သွင်းဖော်ပြထားခြင်းဖြစ်ကြောင်း၊ စစ်ကောင်စီတပ် နှင့် အသေးစားထိတွေ့ပစ်ခတ်မှုများကို ယခုစာရင်း၌ဖော်ပြထားခြင်းမရှိကြောင်းလည်း တွေ့ရသည်။

 

📌📌 ၂။ ရိခေါဒါရ်တိုက်ပွဲတွင် ဒုဗိုလ်မှူးကြီး အပါအ၀င် စစ်ကောင်စီ ၅ ဦးသေဆုံး၊ ချင်းပြည်နယ် မြောက်ပိုင်း မြို့တော် ဟားခါးတွင် စစ်ရေးအခြေအနေ တင်းမာနေ

အိန္ဒိယ-မြန်မာနယ်စပ် ဖလမ်းမြို့နယ် ရိခေါဒါရ်မြို့ရှိ စစ်ကောင်စီတပ်စခန်းအား CNDF၊ PDF-Zoland၊ CDM-Siyin နှင့် MEDF ပူးပေါင်းကာကွယ်ရေးတပ်ဖွဲ့တို့မှ အနီးကပ် သွားရောက်တိုက်ခိုက်ခဲ့ရာ စစ်ကောင်စီ ဒုဗိုလ်မှူးကြီးဝေမျိုးပိုင် အပါအဝင် ၅ ဦး သေဆုံးပြီး ဒဏ်ရာရရှိသူများပြားကြောင်း CNO/ CNDF က သြဂုတ်လ ၁၀ သတင်းထုတ်ပြန်သည်။ ယခုတိုက်ပွဲတွင် တော်လှန်ရေးတပ်ဖွဲ့ဝင် ရဲဘော်တစ်ဦး အသေးစားဒဏ်ရာရရှိကြောင်းလည်း ၎င်းထုတ်ပြန်ချက်တွင် ဖော်ပြသည်။

 

ထို့ ပြင် ဟားခါးမြို့ပေါ်၌ စစ်ကောင်စီတပ်နှင့် ဒေသခံကာကွယ်ရေးတပ်တို့ သြဂုတ် ၁၀ ထိတွေ့ပစ်ခတ်မှုဖြစ်ပွားခဲ့ပြီး စစ်ကောင်စီ၏ လက်နက်ကြီးပစ်ခတ်မှုကြောင့် နှီာယာလောန်ကျေးရွာနေ အမျိုးသမီးတစ်ဦး အသက်ဆုံးရှုံးခဲ့ပြီး အမျိုးသားတစ်ဦး ဒဏ်ရာရရှိထားကြောင်း ဒေသတွင်းသတင်းဌာန The Chin Journal ကရေးသားသည်။ လက်ရှိတွင် စစ်ကောင်စီတပ်နှင့် ဒေသခံကာကွယ်ရေးတပ်တို့ ဟားခါး-ထန်တလန်အကြား သီမြစ်ချောင်းတဝိုက်၌ စစ်ရေးအခြေအနေတင်းမာနေပြီး CDF ဟားခါးက စစ်ကောင်စီတပ်ကို မြို့ပြင်ထွက်တိုက်ပွဲဆင်နွှဲရန် စိန်ခေါ်ကြောင်း သြဂုတ် ၁၀ မွန်းလွဲပိုင်းတွင် အတိအလင်း ထုတ်ပြန်ထားသည်။

 

📌📌 ၃။ ပြည်သူ့လုံခြုံရေးအဖွဲ့များ ဖွဲ့စည်းသွားမယ်လို့ စစ်ကောင်စီထပ်ပြော

 

ပြည်သူ့လုံခြုံရေးအဖွဲ့များ ဖွဲ့စည်းပြီး ဒေသအလိုက်တည်ငြိမ်အေးချမ်းရေးကို အလေးထားဆောင်ရွက်သွားမယ်လို့ စစ်ကောင်စီဘက်က ကြေညာလာပါတယ်။ သြဂုတ်လ ၁၀ ရက်နေ့က ပြုလုပ်တဲ့ ပြည်ထောင်စု အစိုးရအဖွဲ့လုပ်ငန်း ညှိိနှိုင်းအစည်းအဝေးမှာ စစ်ကောင်စီပြည်ထောင်စု အစိုးရ ဒုတိယဝန်ကြီးချုပ် ဒုတိယဗိုလ်ချုပ်မှူးကြီးစိုးဝင်းက ခုလိုပြောသွားတာပါ။ ပြီးခဲ့တဲ့ စစ်ကောင်စီရဲ့ ၁၃ ကြိမ်မြောက် သတင်းစာရှင်းလင်းပွဲမှာ ပြည်သူ့လုံခြုံရေးအဖွဲ့ ဖွဲ့စည်းဖို့ပြောကြားတာရှိခဲ့ပြီး အခုလိုနောက်တစ်ကြိမ် ထပ်မံပြောဆိုလိုက်တာလည်းဖြစ်ပါတယ်။ 

 

📌📌 ၄။ IMCO က ဦးစီးပြီး မင်းတပ်မြို့နယ်အတွက် ကံစမ်းမဲလက်မှတ်များ ရောင်းချ နေ၊ ပထမဆု USD 5000 သတ်မှတ်

 

နိုင်ငံတကာ ရောက် မင်းတပ်ချိုအဖွဲ့ (IMCO) International Mindat K'Cho Organization က ဦး ဆောင်၍ မင်းတပ်မြို့နယ် တွင် အသုံးပြုရန် ကံစမ်းမဲလက်မှတ်များ ရောင်းချ နေ ကြောင်းသိရသည်။

 

"CDF (Mindat) အတွက် အရေးကြီးပရောဂျက်များ နှင့် မိုးတွင်းရိက္ခာ၊ ဆေးဝါး အတွက် အလှူငွေ အကူငွေတွေ ငွေတော်တော်များများလိုအပ်နေပါသည်" ဟူ၍ IMCO အဖွဲ့က ၎င်းတို့၏ လူမှုကွန်ရက်စာမျက်နှာတွင် ရေးသားဖော်ပြ ထားသည်။

 

"မင်းတပ် တော်လှန် ရေးအတွက် နည်းမျိုးစုံနဲ့ရန်ပုံငွေရှာနေကြရတာပါ။ ယခု ကံစမ်းမဲထီလက်မှတ်များကို ထိုးလည်းထိုး၊ ရောင်းလည်းရောင်းပေးကြဖို့မေတ္တာရပ်ခံပါတယ်" ဟူ၍ IMCO အဖွဲ့က ဆိုသည်။ အဆိုပါ ကံစမ်းမဲ ရောင်းချမှုတွင် ပထမဆု အ နေဖြင့် အ မေရိကန် ဒေါ်လာ ၅၀၀၀ ၊ဒုတိယ ဆု ဒေါ်လာ ၃၀၀၀ ၊ တတိယဆု ဒေါ်လာ ၂၀၀၀ ဖြစ်ပြီး နှစ်သိမ့်ဆု ၄ ဆုတွင် ဒေါ်လာ ၄၀၀ ကျစီ သတ်မှတ်ထား ကြောင်းသိရသည်။

 

📌📌 ၅။ CRFP က နိုင်ငံတကာရှိ ချင်းမျိုးနွယ်စု/ဒေသစုများ အလိုက်အပတ်စဥ်တွေ့ဆုံပွဲများ ကျင်းပပြုလုပ်နေ

 

ချင်းရန်ပုံ ငွေအဖွဲ့ CRFP က နိုင်ငံတကာရှိ ချင်းမျိုးနွယ်စု/ဒေသစုများ အလိုက်အပတ်စဥ် တွေ့ဆုံပွဲများ ကျင်းပပြုလုပ်နေကြောင်း ဒီနေ့ ဩဂုတ် ၉ ရက် နေ့မှာ သတင်းထုတ်ပြန်လာပါတယ်။ CRFP သည် ၂၀၂၂ ခုနှစ်၊ ဇူလိုင်လ (၂၉ ) ရက်နေ့မှစတင်ပြီး နိုင်ငံတကာရှိ ချင်းမျိုးနွယ်စု/ ဒေသစုအလိုက် တွေ့ဆုံခြင်းကို အပတ်စဥ်ပြုလုပ်လျက်ရှိပြီး Lautu ၊ Dai/Daai တို့နှင့် တွေ့ဆုံမှု ပြုလုပ်ပြီးဖြစ်ကြောင်း သိရပါတယ်။ လာမည့်အပတ် တွေမှာလည်း Hualngo ချင်းမျိုးနွယ်စု တွေ နှင့် တွေ့ဆုံဆွေးနွေးနိုင်ရန် ပြင်ဆင်လျက်ရှိပြီး ချင်းမျိုးနွယ်စု/ ဒေသစု အားလုံးနှင့် ၂၀၂၂ ခုနှစ်အတွင်း တွေ့ဆုံမှုပြီးစီးနိုင်ရန် ရည်မှန်းထား ကြောင်း သိရပါတယ်။

 

တွေ့ဆုံပွဲ၏ အဓိကရည်မှန်းချက်သည် CRFP က လုပ်ဆောင်နေသည့် တူမီးထီ၊ NUG Bond for Chin၊ အဖွဲ့၏လုပ်ငန်းစဉ်များ အကြောင်း မိတ်ဆက်ခြင်း နှင့် နိုင်ငံတကာရှိ ချင်းမျိုးနွယ်စု/ဒေသစုများ အားလုံး နှင့် CRFP တို့အကြား တော်လှန်ရေးအတွက် အချိတ်အဆက်မိမိ လက်တွဲလုပ်ဆောင်နိုင်ရန် ဖြစ် ကြောင်း CRFP က ဆိုပါတယ်။ သို့ဖြစ်ပါ၍ ချင်းမျိုးနွယ်စုများအားလုံး စည်းလုံးညီညွတ်စွာဖြင့် တော်လှန်ရေးအရှိန်မြှင့်တင်နိုင်ရေးအတွက် CRFP ၏ ဖိတ်ကြားချက်များတွင် တက်ကြွစွာ ပါဝင် ပေးနိုင်ကြပါရန် CRFP က ကြိုတင် ဖိတ်ကြားထားပါတယ်။ CRFP နှင့် အချိန်ပေး၍ တွေ့ဆုံဆွေးနွေးပေးခဲ့ကြသော Lautu နှင့် Dai/Daai မိသားစုအားလုံးကို CRFP အနေဖြင့် လှိုက်လှဲစွာ ကျေးဇူးတင်ရှိပါကြောင်း CRFP က ပြောပါတယ်။ 

#RadioNUGLocalNews

#SpringRevolution