10th JUN 2023 - (Ethnic language program-CHO_DAAI) by Radio NUG ~ Newsletter by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဇွန်လ ( ၁၀ ) ရက်နေ့ နောက်ဆုံးရပြည်တွင်းသတင်းများ

📌📌 ၁။ ဟားခါး - ထန်တလန်အကြားတိုက်ပွဲ ဆက်လက်ပြင်းထန်

၂ ရက်တာ တိုက်ပွဲတွင်း CNA, CDF ရဲဘော် ၄ ဦးကျ၊ စစ်ကောင်စီဘက် ထိခိုက်သေဆုံးတာနဲ့ သိမ်းဆည်းရမိတာတွေ ရှိတယ်လို့လည်း ဆိုပါတယ်။

တိုက်ပွဲတွေ ဆက်တိုက်ပြင်းထန်နေတဲ့ ဟားခါး - ထန်တလန်အကြား သီမစ်လွင်ပြင်အနီးမှာ ချင်းအမျိုးသားတပ်မတော် (CNA) မှ ရဲဘော် ၃ ဦးနဲ့ CDF - Zophei မှ ရဲဘော် ၁ ဦး တိုင်းပြည်နဲ့ လူမျိုးအတွက် အသက်ပေး ကျဆုံးသွားတယ်လို့ ချင်းဂျာနယ်က ဖော်ပြပါတယ်။

ရဲဘော် ၄ ဦးဟာ ဇွန်လ ၅ ရက်နဲ့ ဇွန်လ ၆ ရက်နေ့ တိုက်ပွဲတွေမှာ ကျဆုံးတာလို့ ဆိုပါတယ်။ စစ်ကောင်စီတပ်ဟာ ကုန်းကြောင်း၊ လေကြောင်း၊ ဟားခါးမြို့ကနေ လက်နက်ကြီးပစ်ကူတွေနဲ့ ဟားခါး - ထန်တလန်အကြားကို အင်အားအကုန်နဲ့ စစ်ကြောင်းထိုး နေတာပါ။

ဇွန်လ ၆ ရက်နေ့ တိုက်ပွဲမှာ ကျဆုံး ချင်းအမျိုးသားတပ်မတော် ရဲဘော် ဆလိုင်းနိုင်းမနားထန်းဟာ ကန်ပက်လက်မြို့နယ် ဇာတိဖြစ်ပြီး ကျဆုံးချိန်မှာ အသက် ၂၀၊ ၂၁ နှစ်ဝန်းကျင်သာရှိသေးတယ်လို့ သူနဲ့ ဆွေမျိုးတော်စပ်သူက The Mindat Post ကို ပြောပါတယ်။

၂၀၂၃ နှစ်ဦးပိုင်းကတည်းက ဟားခါး - ထန်တလန်နယ်တွေမှာ ချင်းအမျိုးသားတပ်မတော်၊ ချင်းကာကွယ်ရေးတပ်ဖွဲ့ ပူးပေါင်း တွေနဲ့ စစ်ကောင်စီတပ်အကြား တိုက်ပွဲပြင်းထန်နေပြီး နှစ်ဘက်ထိခိုက် ဆုံးရှုံးတာတွေ ရှိနေပါတယ်။

ဇွန်လ ၅ ရက်နေ့တိုက်ပွဲအတွင်း စစ်ကောင်စီတပ်သား ၇ ဦး သေဆုံးတယ်လို့ မြေပြင်သတင်းအရင်းအမြစ်တွေထံမှ သိရတဲ့အကြောင်းလည်း ချင်းဂျာနယ်က ဖော်ပြထားပါတယ်။

တိုက်ပွဲတွေ ဆက်တိုက်ပြင်းထန်နေတဲ့ ချင်းပြည်မြောက်ပိုင်းမှာ စစ်ကောင်စီက ကုန်းကြောင်း၊ လေကြောင်းနဲ့ အပြင်းအထန် ထိုးစစ်ဆင်နေပါတယ်။

========================

📌📌 ၂။ မတူပီမှာ ဒေသကာကွယ်‌ရေးတပ်ဖွဲ့နဲ့ စစ်ကောင်စီတပ်အကြား စစ်‌ရေးတင်းမာနေ

မင်းတပ် - မတူပီ မော်တော်ကားလမ်းပိုင်းဘေးပတ်လည် မတူပီနယ်တွေမှာ အင်အားသုံးစစ်ကြောင်းထိုးနေတဲ့ စစ်ကောင်စီ တပ်နဲ့ ဒေသကာကွယ်‌ရေးတပ်အကြား စစ်ရေးတင်းမာနေတယ်လို့ ချင်းကာကွယ်ရေးတပ်ဖွဲ့ (မတူပီ) က ဇွန်လ ၇ ရက်နေ့ သတင်းထုတ်ပြန်ပါတယ်။

၂၀၂၃ ဇွန်လ ၆ ရက်နေ့က မတူပီနယ် ရမ်တိန်းကျေးရွာဟောင်းကို ဝင်ရောက်လာတဲ့ စစ်ကောင်စီတပ်သား ၁၂၀ ဝန်းကျင်နဲ့ ဒေသကာကွယ်ရေးတပ်တို့ အပြန်အလှန် ပစ်ခတ်မှုဖြစ်ပွားပြီးတဲ့နောက် ခုလိုစစ်ရေးတင်းမာနေတာပါ။

ဇွန်လ ၆ ရက်နေ့ ထိတွေ့ပစ်ခတ်မှုမှာ နှစ်ဘက်ထိခိုက်သေဆုံးတာမရှိပေမယ့် ရမ်တိန်းကျေးရွာဟောင်းရဲ့ ၂ မိုင်ဝန်းကျင် အကွာမှာ စစ်ကောင်စီတပ်ဖွဲ့ဝင်တွေ ဇွန်လ ၇ ရက်နေ့အထိ နေရာယူထားဆဲလို့ ချင်းကာကွယ်ရေးတပ်ဖွဲ့ (မတူပီ) က ထုတ်ပြန်ထားပါတယ်။

ဒေသကာကွယ်ရေးတပ်ဖွဲ့နဲ့ စစ်ကောင်စီတပ်အကြား ပစ်ခတ်တိုက်ပွဲတွေ ဆက်ရှိလာနိုင်တာကြောင့် မတူပီ - မင်းတပ် လမ်းမပေါ် ခရီးထွက်သွားလာတာကို Chinland Defense Force - Matupi က‌ လောလောဆယ် တားမြစ်ထားပါတယ်။

========================

📌📌 ၃။ မိုခါ မုန်တိုင်းဒါဏ်သင့် ချင်းပြည်သူများအတွက် KIO က CNF မှ တဆင့် ကျပ်သိန်း နှစ်ထောင် လှူဒါန်း

ကချင်လွတ်လပ်ရေးအဖွဲ့ချုပ် KIO က မိုခါမုန်တိုင်းဒဏ်သင့် ချင်းပြည်သူတွေအတွက် လူသားချင်းစာနာထောက်ထားရေး အကူအညီအဖြစ် မြန်မာကျပ်ငွေ (သိန်းနှစ်ထောင်) ကို ပေးပို့ လှူဒါန်းခဲ့တယ်လို့ သိရပါတယ်။

ဒီလှူဒါန်းမှုကို ချင်းအမျိုးသားတပ်ဦး CNF အနေနဲ့ ကောင်းမွန်စွာ လက်ခံရရှိတယ်လို့ CNF က ဇွန်လ ၅ ရက်နေ့မှာ KIO ကို လိပ်မူပေးပို့တဲ့ ကျေးဇူးတင်လွှာ ဖော်ပြချက်အရ သိရပါတယ်။

မုန်တိုင်းဒဏ်သင့်ချင်းပြည်သူများ ပြန်လည်ထူထောင်ရေးလုပ်ငန်းအတွက် KIOရဲ့ ညီအစ်ကိုရင်း စိတ်ဓါတ်ဖြင့် ပါဝင်လှူဒါန်း ပေးမှု အပေါ်အထူးကျေးဇူးတင်ကြောင်းနှင့် မှတ်တမ်းတင်ဂုဏ်ပြုကြောင်းလည်း CNF ရဲ့ ကျေးဇူးတင်လွှာမှာ ဖော်ပြထား ပါတယ်။ ပြီးခဲ့တဲ့ မေလ ၁၄ ရက်နေ့ မှာ ချင်းပြည်အတွင်း ဖြတ်ကျော်ဝင်ရောက်ခဲ့တဲ့ ဖျက်အားပြင်း ဆိုင်ကလုန်း မုန်တိုင်း မိုခါကြောင့် လူနေအိမ်ပေါင်း ၃ ထောင်နီးပါး ပျက်စီးဆုံးရှုံးခဲ့ရတာပါ။

ကြားကာလ ချင်းအမျိုးသား အတိုင်ပင်ခံကောင်စီရဲ့ ထုတ်ပြန်ချက်မှာတော့ ချင်းပြည်နယ်အနှံ့က နေအိမ်ပေါင်း ၂၇၇၄၊ စာသင်ကျောင်း ၁၈၅ ကျောင်း၊ ဘာသာရေး အဆောက်အဦ ၁၀၂ လုံး၊ တိရစ္ဆာန် အရေအတွက် ၁၀၀ ဝန်းကျင် မိုခါကြောင့် ပျက်စီးဆုံးရှုံးခဲ့ရတယ်လို့ ဆိုပါတယ်။

မတူပီမြို့နယ်မှာ နေအိမ်ပေါင်း ၁၂၀၀ ထက်မနည်း ပျက်စီးခဲ့ပြီး ချင်းပြည်တွင်းမှာ မုန်းတိုင်းကြောင့် ပျက်စီးဆုံးရှုံးမှု အများဆုံးမြို့နယ် ဖြစ်တယ်လို့ သိရပါတယ်။ မင်းတပ်မြို့နယ်အတွင်းမှာတော့ နေအိမ်ပေါင်း ၆၅၄ လုံး ပျက်စီးဆုံးရှုံးခဲ့ရတယ်လို့ မင်းတပ်မြို့နယ်ပြည်သူ့ အုပ်ချုပ်ရေးအဖွဲ့က ထုတ်ပြန်ထားပါတယ်။ KIO ရဲ့ လူသားချင်းစာနာ ထောက်ထားမှုဆိုင်ရာ အကူအညီတွေနဲ့ပတ်သက်ပြီး တိုက်ရိုက်ချိတ်ဆက်ဆောင်ရွက်သွားဖို့ ရှိတယ်လို့ CNF က ဆိုပါတယ်။

“မိုခါ ဒါဏ်သင့် အချက်အလက်တွေ အတိုင်းတိုက်ရိုက် ချိတ်ဆက်စီမံသွားဖို့ဖြစ်ပါလိမ့်မယ်” လို့ CNF ပြောရေးဆိုခွင့်ရှိသူ ဆလိုင်းထက်နီက The Mindat Post ကို ပြောပါတယ်။

ကချင်အမျိုးသားလွတ်လပ်ရေးအဖွဲ့ချုပ် KIO ဟာ မိုခါမုန်တိုင်းဒဏ်အပြင်းထန်ဆုံး ခံစားခဲ့ရတဲ့ ရက္ခိုင်ဒေသအတွက် မြန်မာကျပ်ငွေ သိန်းသုံးထောင်ကို ရက္ခိုင်အမျိုးသားအဖွဲ့ချုပ် (ULA) ထံကနေတဆင့် ပေးပို့ခဲ့တယ်လို့လည်း ULA/AA ဘက်က ၂၀၂၃ မေလ ၁၇ ရက်နေ့မှာ သတင်းထုတ်ပြန်ထားပါတယ်။

========================

📌📌 ၄။ မင်းတပ် - မ‌ကွေးနယ်စပ်မှာ ယောကာကွယ်‌ရေးတပ်နဲ့ စစ်ကောင်စီတပ် တိုက်ပွဲ ဆက်ဖြစ်

မင်းတပ်နယ်နဲ့ မကွေးတိုင်း၊ ကျောက်ထုနယ် စံကျေးရွာအနီးတဝိုက်မှာ ဒေသကာကွယ်‌ရေးတပ်နဲ့ စစ်ကောင်စီတပ် အကြားတိုက်ပွဲတွေ ဆက်ဖြစ်နေတယ်လို့ ယောကာကွယ်‌ရေးတပ်က ဇွန်လ ၄ ရက်နေ့ သတင်းထုတ်ပြန်ပါတယ်။

ဇွန်လ ၃ ရက်နေ့က ကျောက်ထုမြို့နယ်၊ စံတောင်အနီး စစ်ကောင်စီစစ်ကြောင်းနဲ့ (YDF) ဦးဆောင်တဲ့ ယောနကစစ်ကြောင်း၊ ဂန့်ဂေါခရိုင် တပ်ရင်း (၉) တပ်ခွဲ (၁) ယောချောင်းတပ်ခွဲ - ကျောက်ထု PDF ပူးပေါင်းစစ်ကြောင်းတို့အကြား ထိတွေ့တိုက်ပွဲ ဖြစ်ပွားခဲ့တာလို့ ပြောပါတယ်။

စစ်ကောင်စီတပ် အင်အား ၁၈၀ ဝန်းကျင်ဟာ ကျောက်ထုမြို့နယ် စံတောင်ဘက်သို့ စစ်ကြောင်းထိုးလာခဲ့တာကြောင့် အခုလို ထိတွေ့တိုက်ပွဲ ဖြစ်ပွားခဲ့တာလို့ ယောကာကွယ်‌ရေးတပ်က ထုတ်ပြန်ထားပါတယ်။

တိုက်ပွဲတွင်းမှာ စစ်‌ကောင်စီတပ်သား ထိခိုက်ဒဏ်ရာရ သေဆုံးသူ ၆ ဦးရှိပြီး စစ်ကောင်စီတပ်ရဲ့ ခဲယမ်း၊ ကျည် သိမ်းဆည်းရမိတာတွေကိုလည်း ထုတ်ပြန်ထားပါတယ်။စစ်ရေးအရ အရေးပါတဲ့ စံတောင်နဲ့ ပတ်ဝန်းကျင်ကို စစ်ကောင်စီက ထိန်းချုပ်ဖို့ ကြိုးပမ်းလာတာကြောင့် အခုလို ထိတွေ့တိုက်ပွဲဖြစ်ပွားတာလို့ ယောကာကွယ်‌ရေးတပ်က ဆိုပါတယ်။

မင်းတပ်နယ်နဲ့ မကွေးတိုင်း၊ ကျောက်ထုနယ်စပ်မှာ ပြီးခဲ့တဲ့ မေလကုန်ပိုင်းကတည်းက ချင်းကာကွယ်ရေးတပ်၊ ယောဒေသကာကွယ်ရေး ပူးပေါင်းတပ်နဲ့ စစ်ကောင်စီတပ်အကြား အနီးကပ်တိုက်ပွဲတွေ ဆက်တိုက်ဖြစ်ပွားနေတာဖြစ်ပြီး စစ်ကောင်စီဘက် ထိခိုက်သေဆုံးတာ ရှိတယ်လို့ ချင်းကာကွယ်ရေးတပ်ဖွဲ့ (မင်းတပ်) က ဇွန်လ ၄ ရက်နေ့ တရားဝင် သတင်းထုတ်ပြန်ထားပါတယ်။