12th AUG 2023 - (Ethnic language program-CHO_DAAI) by Radio NUG

 

📌 (ချင်း တိုင်းရင်းသား - Daai ဒိုင်ရ်း ဘာသာစကား) ထုတ်လွှင့်မှု အစီအစဥ် ၂၀၂၃ သြဂုတ်လ ( ၁၂ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ကန်ပက်လက်မှာ စစ်ကောင်စီတပ် ဝင်သောင်းကျန်းလို့ နေအိမ်၊ အဆောက်အအုံ ပျက်စီးမှု များပြား

 

ကန်ပက်လက်မြို့နယ်၊ မဆာတွီကျေးရွာမှာ လေကြောင်းတိုက်ခိုက်ခံရတဲ့ Believer's Church Myanmar အပါအဝင် သြဂုတ်လဆန်းပိုင်း ဖျက်ဆီးခံရတဲ့ ပြည်သူပိုင်အဆောက်အအုံတွေ အများအပြားရှိတယ်လို့ ချင်းကာကွယ်ရေးတပ်ဖွဲ့ (ကန်ပက်လက်) ခေါနူးတပ်ရင်းက သတင်းထုတ်ပြန်ပါတယ်။

 

ကျင်ဒွေးလမ်းမတလျှောက်မှာရှိတဲ့ မဆာတွီ၊ မောချောင်း၊ လှိုင်ဒုတ်ရွာဟောင်း၊ လှိုင်ဒုတ်ရွာသစ်၊ ထန်းကုန်းစတဲ့ ကျေးရွာတွေက အိမ်တွင်းပရိဘောဂ၊ အများပိုင်ပစ္စည်း၊ ကျောင်းပိုင်ပစ္စည်းနဲ့ ဘာသာရေး အဆောက်အအုံအတွင်းရှိ ပစ္စည်းတွေပါ ခိုးယူခံရတယ်လို့ ပြောပါတယ်။

 

၂၀၂၃ ဇူလိုင် ၁၉ ရက်နေ့ကစလို့ ကျင်‌ဒွေးကို ရိက္ခာပို့ယာဉ်တန်းနောက်လိုက်လာတဲ့ စစ်ကြောင်းဟာ မဆာတွီကျေးရွာ စာသင်ကျောင်းနဲ့ ပြည်သူပိုင်နေအိမ်တွေမှာ တပ်စွဲပြီး စတင်သောင်းကျန်းတာလို့ သိရပါတယ်။

 

အိမ်မွေးတိရစ္ဆာန်တွေ ခိုးယူစားသောက်ကြသလို လမ်းမီးတိုင်၊ ဘက်ထရီ၊ ဆော်လာ၊ သေတ္တာ၊ ဗီရိုနဲ့ ပျဉ်တွေပါ တခုမကျန် ယူဆောင်သွားပေမယ့် အရေအတွက် အတိအကျကိုတော့ မသိရသေးဘူးလို့ ချင်းကာကွယ်ရေးတပ်ဖွဲ့ (ကန်ပက်လက်) ခေါနူးတပ်ရင်းက သတင်းထုတ်ပြန်ပါတယ်။

 

========================

 

📌📌 ၂။ ချင်းအမျိုးသားကောင်စီ (မင်းတပ်) စတင် ဖွဲ့စည်းကြောင်း ကြေညာ

 

ချင်းအမျိုးသားကောင်စီ (မင်းတပ်) Chin National Council (Mindat) ကို စတင်ဖွဲ့စည်းတယ်လို့ ဩဂုတ် ၆ ရက်နေ့က ကြေညာလိုက်ပါတယ်။

 

အနာဂါတ် ချင်းလူမျိုးတွေအတွက် နိုင်ငံရေးလမ်းစဉ် ချမှတ်ရေး၊ ဖက်ဒရယ်ဒီမိုကရေစီအရေး၊ ကိုယ့်ကြမ္မာကိုယ် ဖန်တီးရေး၊ တန်းတူရေးနဲ့ အခြေခံလူ့အခွင့်အရေးတွေ အာမခံချက်ပေးတဲ့ မူဝါဒလမ်းစဉ်တွေကို အကောင်အထည် ဖော်ဆောင်ဖို့ ဖွဲ့စည်းတာလို့ ပြောပါတယ်။

 

ချင်းအမျိုးသားကောင်စီ (မင်းတပ်) အနေနဲ့ အထက်ပါမူဝါဒလမ်းစဉ်တွေအကောင်ထည်ဖော်နိုင်ဖို့ ဒေသအတွင်း အမြင့်ဆုံးအာဏာကို ကျင့်သုံးနိုင်တဲ့ နိုင်ငံရေးဦးဆောင်အဖွဲ့အစည်းအဖြစ် ဖွဲ့စည်းလိုက်တာပါ။

 

မင်းတပ်မြို့နယ်အတွင်းမှာ အုပ်ချုပ်ရေး၊ ကာကွယ်ရေး၊ တရားစီရင်‌ရေး၊ လုံခြုံရေးနဲ့ လူသားချင်းစာနာထောက်ထားရေးစတဲ့ လုပ်ငန်းစဉ်တွေကို အကောင်အထည်ဖော် ဆောင်ရွက်နိုင်တာဟာ ပြည်တွင်း၊ ပြည်ပ တော်လှန်‌ရေးအင်အားစုတွေရဲ့ အင်တိုက်အားတိုက်ပါဝင်မှုကြောင့် ဖြစ်တယ်လို့လည်း ဒီနေ့ ကြေညာချက်မှာ ဖော်ပြထားပါတယ်။ 

 

တဖက်မှာ ချင်းပြည်နယ်တခုလုံးအနေနဲ့ မတူညီတဲ့ နေရာဒေသအလိုက် အုပ်ချုပ်‌ရေးစနစ် ပိုမိုပီပြင်‌အောင် ချင်းပြည်ထောင် (Nation Building) တည်ဆောက်ဖို့၊ ချင်းလဲန်ကောင်စီ (Chinland Council) ဖွဲ့စည်းဖို့ ပြင်ဆင်ဆောင်ရွက်နေတယ်လို့ ၂၀၂၃ ဇွန်လအတွင်း ချင်းဂျာနယ်မေးမြန်းတဲ့ အင်တာဗျူးမှာ ချင်းအမျိုးသားတပ်မတော် ဗိုလ်မှူးကြီး ဆောလမွန်က ပြောကြားဖူးပါတယ်။

 

========================

 

📌📌 ၃။ မကြာမီ ထိုးစစ်ကာလ ရောက်လာမယ်လို့ NUG က ထပ်မံ အသိပေး

 

စစ်ကောင်စီကို ထိုးစစ်ဆင်တိုက်ခိုက်ဖို့ အချိန်ရောက်‌လာတော့မယ်လို့ အမျိုးသားညီညွတ်ရေးအစိုးရ (NUG) ကာကွယ်ရေး ဒုတိယအတွင်းဝန် ဦးမောင်မောင်ဆွေက ပြောကြားတဲ့အကြောင်း မဇ္စျိမရဲ့ သြဂုတ် ၇ ရက်နေ့ သတင်းမှာ ဖော်ပြပါတယ်။ 

 

“ပြည်သူ့ကာကွယ်ရေး တပ်မတော်သားတွေနဲ့ မဟာမိတ်အင်အားစုတွေအနေနဲ့ကလည်း မကြာမီသောကာလမှာ ထိုးစစ်ကာလကို ရောက်ရှိလာတော့မှာ ရှိပါတယ်။ အဲဒီထိုးစစ် ရောက်ရင် စစ်ကောင်စီတပ်သားတွေအနေနဲ့ ဒီ့ထက်ပိုကျရှူံးတော့မှာ အမှန်ပဲဆိုတာကို ကျနော် ပြည်သူလူထုကို ထပ်မံတင်ပြချင်ပါတယ်။” လို့ ပြောသွားတာပါ။

 

ကယားပြည် (ကရင်နီဒေသ)၊ ကရင်၊ ကချင်၊ စစ်ကိုင်း၊ ချင်း၊ မကွေးတိုင်းက ဒေသတွေမှာ စစ်ကောင်စီအထိုင်ချ ကင်းစခန်း၊ ရဲစခန်းတွေကို ဒေသကာကွယ်‌ရေးတပ်ဖွဲ့က ပစ်မှတ်ထားတိုက်ခိုက်ပြီး သိမ်းယူနိုင်တဲ့အထိဖြစ်တဲ့ ဖြစ်စဉ်မျိုး ၂၀၂၃ ခြောက်လအတွင်းမှာ ခပ်စိပ်စိပ်ဖြစ်ပွားနေတာ ဖြစ်ပါတယ်။

 

တဖက်မှာ စစ်ကောင်စီတပ်ကလည်း ‌ပြည်သူ့ကာကွယ်ရေးတပ်ဖွဲ့နဲ့ ဒေသကာကွယ်ရေးတပ်ဖွဲ့ဝင်တွေ ရှိတယ်လို့ ယူဆတဲ့နေရာတွေကို လေကြောင်း၊ လက်နက်ကြီးနဲ့ တိုက်ခိုက်မှုမျိုး အရင်ထက် ပိုမိုလုပ်ဆောင်လာတာ တွေ့ရပါတယ်။

 

ကရင်နီ၊ စစ်ကိုင်းနဲ့ တောင်ပိုင်းစစ်ဒေသတွေမှာ စစ်ကောင်စီတပ်စခန်းသိမ်းတိုက်ခိုက်နိုင်တဲ့ အကြိမ် ၃၀ ရှိပြီး ရဲစခန်း ၁၅ ခု၊ နယ်ခြားစောင့်တပ် ၁၀ ခု၊ ပျူစောထီးစခန်း ၁၄ ခုကိုလည်း သိမ်းနိုင်ခဲ့တဲ့အကြောင်း မဇ္စျိမရဲ့ သြဂုတ် ၇ ရက်နေ့ သတင်းမှာ ဖော်ပြပါတယ်။

 

၂၀၂၃ ခုနှစ်ကို “အဆုံးသတ်တိုက်ပွဲ၏ အဆုံးအဖြတ်နှစ်” အဖြစ် သတ်မှတ်ကြေညာထားတဲ့ အမျိုးသားညီညွတ်ရေးအစိုးရ (NUG) အနေနဲ့ လက်တွေ့အကောင်အထည်ဖော်ဖို့အတွက် ဒီနေ့ကျရောက်တဲ့ ရှစ်လေးလုံး (၈၈၈၈) အထိမ်းအမှတ် ဘာသာပေါင်းစုံ အဖွဲ့အစည်း ၆ ဖွဲ့က တောင်းဆိုထားတာလည်း ရှိနေပါတယ်။

 

========================

 

📌📌 ၄။ ဦးဟင်နရီဗန်ထီးယူကို NLD ထုတ်ပယ်

 

အရပ်သားအစိုးရ ဒုတိယသမ္မတ ဦးဟင်နရီဗန်ထီးယူကို ပါတီဝင်ကနေ ထုတ်ပယ်တယ်လို့ အမျိုးသားဒီမိုကရေစီအဖွဲ့ချုပ် (NLD) က သြဂုတ် ၉ရက်နေ့ ကြေညာလိုက်ပါတယ်။

 

၂၀၂၃ ဇူလိုင် ၃၁ ရက်နေ့ ကျင်းပတဲ့ ကာလုံ (အမျိုးသားကာကွယ်ရေးနဲ့ လုံခြုံရေးကောင်စီ) အစည်းအဝေးကို တက်ရောက်ခဲ့ပြီး ပြည်သူတွေကို ဖမ်းဆီးသ၊တ်ဖြ၊တ်နေတဲ့ စစ်ကောင်စီကို ထောက်ခံတယ်ဆိုတဲ့ အကြောင်းပြချက်နဲ့ ထုတ်ပယ်တာလို့ ပြောပါတယ်။

 

အာဏာသိမ်းနောက်ပိုင်း စစ်ကောင်စီရဲ့ ကာလုံ (အမျိုးသားကာကွယ်ရေးနဲ့ လုံခြုံရေးကောင်စီ) အစည်းအဝေး ၅ ကြိမ်မှာ ပထမဆုံးအကြိမ်တက်ရောက်ခဲ့တဲ့ ဦးဟင်နရီဗန်ထီးယူကို (NLD) က ထုတ်ပယ်ကြောင်း ချက်ချင်း ကြေညာလာတာပါ။

 

စစ်တပ်အငြိမ်းစားအရာရှိဟောင်း ဦးဟင်နရီဗန်ထီးယူဟာ ၂၀၁၅ ပါတီစုံဒီမိုကရေစီ ရွေးကောက်ပွဲအပြီးမှာ ဒုတိယသမ္မတအဖြစ် အမျိုးသားဒီမိုကရေစီအဖွဲ့ချုပ် (NLD) က ခန့်အပ်ထားသူလည်း ဖြစ်ပါတယ်။

#RadioNUGLocalNews

#SpringRevolution