19th AUG 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ သြဂုတ်လ ( ၁၉ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ မင်းတပ်မှာ ၃ လအတွင်း ထိတွေ့ ပစ်ခတ်မှု ၁၀ ကြိမ်ထက်မနည်း ဖြစ်ပွား

 

မင်းတပ်မြို့နယ်အတွင်းမှာ ပြီးခဲ့တဲ့ ၃ လအတွင်း ပစ်ခတ်မှုပေါင်း ၁၀ ကြိမ်ထက်မနည်း ဖြစ်ပွားခဲ့တယ်လို့ သိရပါတယ်။

ချင်းကာကွယ်ရေးတပ်ဖွဲ့ (မင်းတပ်) ရဲ့ ၂၀၂၃ ဧပြီလကုန်ပိုင်းကနေ ဇူလိုင်လကုန်အထိ ထုတ်ပြန်တဲ့ တိုက်ပွဲသတင်း ထုတ်ပြန်ချက်မှာ အခုလို ဖော်ပြထားတာပါ။

 

စစ်ကောင်စီစစ်ကြောင်းကို မိုင်းဆွဲတိုက်ခိုက်တာ၊ မင်းတပ်မြို့ပေါ် အထိုင်ဂိတ်ကို အနီးကပ်ပစ်ခတ်တာ၊ လက်နက်ကြီး ပစ်ခတ်တာနဲ့ ၂ ဘက်အပြန်အလှန် ပစ်ခတ်တဲ့ တိုက်ပွဲတွေ ပါဝင်တယ်လို့ အဲဒီထုတ်ပြန်ချက်မှာ ဖော်ပြပါတယ်။

 

ဒီ ၃ လအတွင်း စစ်ကောင်စီလက်အောက်ခံ ရဲအရာရှိသေဆုံးတဲ့ တပ်ချိန်းကားတစီး အနီးကပ်ပစ်ခတ်မှုဖြစ်စဉ် အပါအဝင် လက်နက်တချို့ သိမ်းဆည်းရတဲ့ ဖြစ်စဉ်တွေ မင်းတပ်မှာ ဖြစ်ပွားခဲ့ပါတယ်။

 

ချင်းကာကွယ်ရေးတပ်ဖွဲ့ (မင်းတပ်) ရဲ့ ထုတ်ပြန်ချက်အရ စစ်ကောင်စီတပ်ဖွဲ့ဝင် ထိခိုက်သေဆုံးတာ ၄၀ ကျော်ရှိနေပြီး ဒေသကာကွယ်ရေးပူးပေါင်းတပ်ဖွဲ့ဝင်တချို့ ပြင်းထန်ဒဏ်ရာကြောင့် ဆေးကုသမှု ခံယူနေရတယ်လို့လည်း သိရပါတယ်။

 

အာဏာသိမ်းကာလ မင်းတပ်မှာ တိုက်ပွဲပေါင်း ၂၁၈ ကြိမ်ဝန်းကျင် ဖြစ်ပွားပြီး ကာကွယ်ရေး ရဲဘော် ၅၅ ဦး ကျဆုံးတယ်လို့ ၂၀၂၂ ဧပြီ ၂၄ ရက်နေ့ ထုတ်ပြန်တဲ့ ချင်းကာကွယ်ရေးတပ်ဖွဲ့ (မင်းတပ်) တော်လှန်ရေး (၂) နှစ်ပြည့် သဘောထားထုတ်ပြန်ချက်မှာ ဖော်ပြပါတယ်။

 

========================

 

📌📌 ၂။ ချင်းပြည် မြောက်ပိုင်းမှာ လေကြောင်းတိုက်ခိုက်မှု ဆက်တိုက်ခံ‌နေရ

 

ဟားခါး - ထန်တလန် - ဖလမ်းနယ်တွေမှာ ၂၀၂၃ သြဂုတ်လ ပထမအပတ်ထဲ လေကြောင်းတိုက်ခိုက်မှုတွေ ဆက်တိုက်ခံနေရတယ်လို့ ကြားသိရပါတယ်။

 

သြဂုတ် ၁၄ရက်နေ့ အစောပိုင်းက ထန်တလန်မြို့ထဲ ၂ ဖက် ပစ်ခတ်မှုဖြစ်ပွားခဲ့ပြီး တိုက်ပွဲဖြစ်ရာနေရာနဲ့ ၅ မိုင် ဝန်းကျင်ဝေးတဲ့ ခွါဖိုကျေးရွာကို စစ်ကောင်စီက နေ့လယ် ၁၂ နာရီကျော်မှာ လေကြောင်းနဲ့ ဗုံးကြဲခံရတယ်လို့ ချင်းဂျာနယ်က ဆိုပါတယ်။

 

လေကြောင်းတိုက်ခိုက်ခံရတဲ့ ခွါဖိုကျေးရွာမှာ ခရစ်ယာန်ဘုရားရှိခိုးကျောင်းနဲ့ နေအိမ်ထိခိုက်မှုရှိနေပြီး ပြည်သူထိခိုက်မှု ရှိ၊ မရှိကို‌တော့ မသိရသေးပါဘူး။

 

========================

 

📌📌 ၃။ CNA, CDF – KKG ပူးပေါင်းတပ်ဖွဲ့က ဖလမ်းမြို့ ခလရ ၂၆၈ တပ်ရင်းတိုက်ခိုက်၊ ပွိုင့်-5 အပါအဝင် လက်နက်အများစု သိမ်းပိုက်

 

ဖလမ်းမြို့အခြေစိုက် အမှတ် ၂၆၈ ခြေလျင်တပ်ရင်းကို ချင်းအမျိုးသားတပ်မတော်နဲ့ ချင်းကာကွယ်ရေးတပ်ဖွဲ့ ကလေး၊ ကဘော်၊ ဂန့်ဂေါ ပူးပေါင်းတပ်ဖွဲ့က တိုက်ခိုက်ခဲ့တယ်လို့ သိရပါတယ်။

 

သြဂုတ် ၁၂ရက် မနက် ၁ နာရီကျော်က စတင်တိုက်ခိုက်ခဲ့တာလို့ ချင်းဂျာနယ်က ဖော်ပြပါတယ်။

 

တိုက်ခိုက်မှုအတွင်း စစ်ကောင်စီဘက် ၆ ဦးသေဆုံး၊ ထိခိုက်ဒဏ်ရာရသူ ၈ ဦးရှိပြီး ချင်းကာကွယ်ရေးတပ်ဖွဲ့ ကလေး၊ ကဘော်၊ ဂန့်ဂေါ ရဲဘော် ၁ ဦး တိုက်ပွဲကျကြောင်း အတည်ပြုပါတယ်။ 

 

၂ နာရီကျော်ကြာတဲ့ တိုက်ပွဲမှာ စစ်ကောင်စီရဲ့ ပွိုင့်-5, MA3, RPG နဲ့ ကျည်အမြောက်အမြားကိုလည်း ပူးပေါင်းတပ်ဖွဲ့က သိမ်းဆည်း နိုင်ခဲ့တယ်လို့ ဖော်ပြပါတယ်။

 

တိုက်ပွဲဖြစ်ပွားပြီးတဲ့နောက် ဖလမ်း - ဟားခါးလမ်းမပေါ် ရှိတဲ့ Ramthlo ကျေးရွာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်လို့ ပြည်သူ ၇ ဦး ထိခိုက်ဒဏ်ရာရပြီး နေအိမ်အဆောက်အအုံတချို့ ပျက်စီးတယ်လို့ Chin National Defense Force က သြဂုတ် ၁၂ နေ့လယ်ပိုင်းမှာ သတင်းထုတ်ပြန်ထားပါတယ်။

 

========================

 

📌📌 ၄။ ဖလမ်းမှာ လေကြောင်းနဲ့ ဗုံးကြဲခံနေရ၊ ထိခိုက်ဒဏ်ရာရသူပေါင်း ၇ ဦးထက်မနည်းရှိနိုင် 

 

ဖလမ်းမြို့နယ်၊ Ramthlo ကျေးရွာမှာ သြဂုတ် ၁၂ရက်နေ့ ဒေသစံတော်ချိန် နေ့လယ် ၁၁ နာရီ ဝန်းကျင်က လေကြောင်းကနေ ဗုံးကြဲခံထားရတယ်လို့ သိရပါတယ်။

 

စစ်ကောင်စီရဲ့ လေကြောင်း၊ လက်နက်ကြီးတွေနဲ့ တိုက်ခိုက်ခံရတာကြောင့် ထိခိုက်ဒဏ်ရာရသူ ၇ ဦး ရှိတယ်လို့ The Rihli Voice က ဖော်ပြပါတယ်။ 

 

ကျေးရွာတွင်းက နေအိမ်၊ ခရစ်ယာန်ဘုရားရှိခိုးကျောင်း၊ အဆောက်အအုံ ၁၀ လုံးဝန်းကျင် ပျက်စီးနိုင်တယ်လို့ လေကြောင်းတိုက်ခိုက်ခံရမှုအပြီးဖော်ပြတဲ့ မှတ်တမ်းဓာတ်ပုံတွေအရ သိရပါတယ်။

 

သြဂုတ် ၁၂ ရက်နေ့ မနက်အစောပိုင်းက ဖလမ်းမြို့အခြေစိုက် ခလရ ၂၆၈ တပ်ရင်းအနီးမှာ ပစ်ခတ်မှုအပြီး ဖလမ်း - ဟားခါး လမ်းမ ပေါ်ရှိတဲ့ ကျေးရွာထဲ လေကြောင်းတိုက်ခိုက်မှုခံရတာလို့ သတင်းတွေက ဖော်ပြပါတယ်။

 

ပြီးခဲ့တဲ့ ၂၀၂၃ ဧပြီလဆန်းတုန်းကလည်း ဖလမ်းမြို့နယ်၊ Ramthlo ကျေးရွာမှာ စစ်ကောင်စီက လေကြောင်းနဲ့ ဗုံးကြဲတာကြောင့် နေအိမ်၊ အဆောက်အအုံ ထိခိုက်ပျက်စီးမှု များခဲ့ပါတယ်။

#RadioNUGLocalNews

#SpringRevolution