16th DEC 2023 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၃ ဒီဇင်ဘာလ ( ၁၆ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ စစ်ကောင်စီ ဒုတပ်ကြပ်အပါအဝင် ရဲတပ်သား ၁၀ ဦး CDF ပလက်ဝထံ အလင်းဝင်

 

ချင်းပြည်၊ ပလက်ဝခရိုင် ရှင်းလက်ဝကျေးရွာအခြေစိုက် ဗျူဟာ ၃ ခလရ ၂၉၉ ရှိ ဒုတပ်ကြပ် ၁ ဦးနဲ့ စစ်ကောင်စီတပ်သား ၁ ဦး နိုဝင်ဘာ ၂၉ ရက်နေ့က အလင်းဝင်လာတယ်လို့ ချင်းလဲန်းကာကွယ်ရေးတပ်ဖွဲ့ (ပလက်ဝ) က ဒီဇင်ဘာ ၁၀ ရက်နေ့ ထုတ်ပြန်ပါတယ်။

ဒီဇင်ဘာ ၇ ရက်နေ့ကလည်း ရှင်းလက်ဝကျေးရွာက ဒေသခံရဲဝန်ထမ်း ၈ ဦး ထပ်မံအလင်းဝင်လာတယ်လို့ ထုတ်ပြန်ချက်မှာ ဖော်ပြပါတယ်။

ချင်းလဲန်းကာကွယ်ရေးတပ်ဖွဲ့ (ပလက်ဝ) က နိုဝင်ဘာ ၁၄ ရက်စွဲနဲ့ ပြည်သူ့ရင်ခွင် ဝင်ရောက်ခိုလှုံလာကြဖို့ အသိပေးကြေ ညာချက် ထုတ်ပြန်အပြီးမှာ စစ်ကောင်စီတပ်နဲ့ ရဲတပ်ဖွဲ့ဝင် ၁၀ ဦး အခုလို အလင်းဝင်လာကြတာပါ။ လက်နက်ခဲယမ်း ယူဆောင်လာခြင်း ရှိ၊ မရှိကိုတော့ တရားဝင် ထုတ်ပြန်မထားပါဘူး။

အလင်းဝင်လာသူတွေကို ဘေးကင်းလုံခြုံတဲ့နေရာ ပို့ဆောင်ပြီးဖြစ်တယ်လို့ ချင်းလဲန်းကာကွယ်ရေးတပ်ဖွဲ့ (ပလက်ဝ) က ဆိုပါတယ်။တကျော့ပြန်တိုက်ပွဲ ပြင်းထန်လာတဲ့ ချင်းပြည်၊ ပလက်ဝမှာ Non CDM တွေကို လက်ရှိလစာရဲ့ ၂ ဆ ပေးမယ်လို့ စစ်ကောင်စီက လောလောလတ်လတ် ထုတ်ပြန်ထားတာမျိုးလည်း ရှိပါတယ်။

 

========================

 

📌📌 ၂။ ဒေါက်တာမှုထန်အပါအဝင် စစ်အုပ်စုကို ဥရောပသမဂ္ဂ (EU) က ပိတ်ဆို့ အရေးယူ

 

စစ်ကောင်စီအဖွဲ့၀င် ဒေါက်တာမှုထန်နဲ့ စစ်အုပ်စုအဖွဲ့ဝင်တွေကို အရေးယူပိတ်ဆို့မှု ထပ်တိုးလုပ်တဲ့အကြောင်း ဥရောပသမဂ္ဂ (EU) က ကြေညာပါတယ်။

ဒီပိတ်ဆို့လိုက်တဲ့အထဲမှာ စစ်ကောင်စီ နိုင်ငံခြားရေးဝန်ကြီးဟောင်း ဦးဝဏ္ဏမောင်လွင်၊ စစ်ကောင်စီအဖွဲ့ဝင်တွေ ဖြစ်ကြတဲ့ ဒုတိယဗိုလ်ချုပ်ကြီး ညိုစော၊ ဒေါက်တာမှုထန်နဲ့ အရှေ့ပိုင်းတိုင်း စစ်ဌာနချုပ်တိုင်းမှူး ဗိုလ်ချုပ်လှမိုးတို့ ပါဝင်ပါတယ်။

မြန်မာ စစ်ကောင်စီကို စစ်သုံး လ၊က်နက်ဝယ်ယူပေးနေတဲ့ ကုမ္မဏီတချို့ကိုလည်း အရေးယူတဲ့အကြောင်း ဒီဇင်ဘာ ၁၁ ရက်နေ့ရက်စွဲနဲ့ ဥရောပသမဂ္ဂ (EU) က ထုတ်ပြန်ထားပါတယ်။

အရေးယူ ဒဏ်ခတ်သူတွေရဲ့ ငွေကြေးကို သိမ်းဆည်းထားပြီး သူတို့ခရီးသွားလာခွင့်ကိုပါ ပိတ်ပင်သွားမယ်လို့ ဆိုပါတယ်။

ချင်းပြည်၊ ကြံ့ဖွံ့ (ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ) ဥက္ကဌ ဖြစ်တဲ့ ဒေါက်တာမှုထန်ဟာ ၂၀၂၃ ဖေဖော်ဝါရီလက စစ်ကောင်စီအဖွဲ့ဝင်အဖြစ် စတင် ခန့်အပ်ခံထားရသူပါ။

ဒေါက်တာမှုထန်ကို ၂၀၂၃ စက်တင်ဘာလအတွင်းမှာ ချင်းပြည်၊ ဖလမ်း၊ တီးတိန်၊ မတူပီ၊ မင်းတပ်နဲ့ စစ်ကိုင်းတိုင်း ကလေးမြို့တွေမှာ ဒေါက်တာ ဝုန်ဆွန်းထန် (ချင်းပြည် စီမံအုပ်ချုပ်ရေးကောင်စီ ဥက္ကဌ) နဲ့အတူ ပူးပူးကပ်ကပ်သွားလာပြီး စည်းရုံးရေးဆင်းနေတာမျိုး တွေ့ရပါတယ်။

အာဏာသိမ်းကာလမှာ စစ်အုပ်စုနဲ့ ဆက်စပ်တဲ့ မြန်မာနိုင်ငံက လူပုဂ္ဂိုလ် ၁၀၃ ဦးနဲ့ အဖွဲ့အစည်း ၂၁ ခုကို ဥရောပသမဂ္ဂက ပိတ်ဆို့အရေးယူထားပြီး ဒီစာရင်းထဲ ပါဝင်သူတွေကို ခရီးသွားလာခွင့် ပိတ်ပင်တာ၊ ပိုင်ဆိုင်မှုတွေကို ဆိုင်းငံ့ထားတာနဲ့ ငွေကြေးလွှဲပြောင်းပေးအပ်မှုတွေ တားမြစ်ထားတယ်လို့ RFA သတင်းဌာနက ရေးသားပါတယ်။

စစ်ကောင်စီအဖွဲ့ဝင် ဦးမောင်းဟာကို ဥရောပသမဂ္ဂ (EU) က ဒဏ်ခတ်ပိတ်ဆို့စာရင်းထဲ ထည့်သွင်းထားတဲ့အကြောင်း ၂၀၂၁ အစောပိုင်းက ကြေညာဖူးပါတယ်။

 

========================

 

📌📌 ၃။ ဆမီးမြို့မှာ စစ်ကောင်စီနဲ့ ရက္ခိုင့်တပ်တော်(AA)တို့ ပစ်ခတ်မူဖြစ်

 

ချင်းပြည်နယ်၊ ပလက်ဝမြို့နယ် ဆမီးမြို့မှာ ရက္ခိုင့်တပ်တော် (AA)နဲ့ စစ်ကောင်စီတို့ ၁ နာရီကျော်ကြာ ပစ်ခတ်မူ ဖြစ်ပွားတယ်လို့ ဒေသခံတွေထံက သိရှိရပါတယ်။ ဒီဇင်ဘာ ၁၄ ရက် နံနက် ၆ နာရီခန့်က ဆမီးမြို့ အမှတ် ၂ ရက်ကွက်ရှိ စစ်ကောင်စီရဲ့ အင်အား ၂၀ ခန့် ရှိတဲ့ တပ်စခန်းကို ရက္ခိုင့်တပ်တော်(AA)ကသွားရောက် ပစ်ခတ်တိုက်ခိုက်ခဲ့တာ ဖြစ်တယ်လို့ ဒေသခံ တစ်ဦးက ပြောပါတယ်။

" ဒီမနက် ၆ နာရီလောက်က သေနတ်သံတွေ ကြားရတယ်။ ခဏကြာတော့ ကျွန်တော်တို့ ရပ်ကွက်နဲ့ ၂ မိုင်လောက်ဝေးတဲ့ တပ်စခန်းမှာ ဖြစ်တယ်ဆိုတာ သိရပါတယ်။ ထိခိုက်သေဆုံးမူက မသိရသေး။ တစ်နာရီကျော်လောက်က သေနတ်သံတွေ ဆက်တိုက်ကြားရတယ်။ အခုတော့ အသံတွေငြိမ်သွားပြီ"လို့ ဆမီးဒေသခံတစ်ဦးက ပြောကြောင်း Zalen Mediaက‌ ရေးသားထားပါတယ်။

အဲ့ဒီ တပ်စခန်းတိုက်ခိုက်ခံရတဲ့ ဘားဝရပ်ကွက်တွင် စစ်ကောင်စီရဲ့ ဆမီးဗျူဟာကုန်းလည်း ရှိတယ်လို့ သိရှိရပါတယ်။

ဆမီးမြို့မှာ ပြီးခဲ့တဲ့ နိုဝင်ဘာ ၄ ရက်နေ့က ဘားဝရပ်ကွက်ရှိ စစ်ကောင်စီရဲ့ တပ်စခန်းကုန်းကိုလည်း ချင်းအမျိုးသား တပ်မတော်(CNA)က တိုက်ခိုက်ခဲ့ပါတယ်။

 

========================

 

📌📌 ၄။ မီဇိုရမ်အစိုးရသစ်အနေဖြင့်စစ်ဘေးရှောင်များအရေးကို အကောင်းဆုံးလုပ်ဆောင်သွားရန် အစိုးရဟောင်း MNF ပါတီတိုက်တွန်း

 

၂၀၂၃ မီဇိုရမ်ပြည်နယ်အထွေထွေရွေးကောက်ပွဲမှာအနိုင်ရရှိတဲ့ ZPMပါတီဦးဆောင်အစိုးရသစ် အနေဖြင့် အစိုးရဟောင်းကို ဦးဆောင်ခဲ့တဲ့ MNFပါတီ က စစ်ဘေးရှောင်များအတွက် လုပ်ဆောင်ပေးခဲ့ သလို ဆက်လက်ပြီး ကြိုးစားလုပ်ဆောင်သွားရန် ဒီဇင်ဘာလ ၁၃ ရက်နေ့တွင်ထုတ်ပြန် တိုက်တွန်းထားပါတယ်။

မီဇိုရမ်ကို စစ်ရှောင်လာကြာတဲ့ မြန်မာနိုင်ငံကပြည်သူတွေ၊မဏိပူရ် ကပြည်သူတွေနဲ့ ဘင်္ဂလားဒေ့ရှ်ပြည်သူတွေဟာ သူတို့ လိုချင်လို့ဒီကိုစစ်လာရှောင်ကြတာမဟုတ်ဘဲ အခက်အခဲပေါင်းများစွာကြုံတွေ့နေကြရလို့ မလွဲမရှောင်သာ စစ်ရှောင် လာကြတာလို့ထုတ်ပြန်ချက်မှာထည့်သွင်းထားပါတယ်။

မြန်မာနဲ့ဘင်္ဂလားဒေ့ရှ် ကစစ်ဘေးရှောင် များဆိုလျှင် မီဇိုရမ်အစိုးရအနေဖြင့် လက်မခံရန်နှင့် လက်ခံပြီးသား များကို ပြန်ပို့ပေးရန် အိန္ဒိယ ဗဟိုအစိုးရ ကနေပြီးအပြင်းအထန်ဖိအားပေးခဲ့တဲ့ ကြားကနေ ညီအကိုများ ဖြစ်ကြတဲ့ သူတို့တွေကို မီဇိုရမ်ပြည်သူများနဲ့အတူ လက်တွဲကာ စားရေးသောက်ရေး၊ အဝတ်အစားနဲ့ ပညာသင်ကြားရေးအထိ ကူညီစောင့်ရှောက်ခဲ့ တယ်လို့ဖော် ပြ ပါတယ်။

MNF ဦးဆောင်ခဲ့သောအစိုးရအနေဖြင့် သူတို့အပေါ်ကျရောက်တဲ့ ဝန်ကိုအကောင်းဆုံးထမ်းခဲ့သလို အခုအ သစ်ဖွဲ့စည်း လိုက်တဲ့ အစိုးရအနေဖြင့်လည်း မီဇိုရမ်ရှိ စစ်ဘေးရှောင်များအနေဖြင့် ၎င်းတို့ရဲ့ မွေးရပ်ဇာတိ မပြန် နိုင်ခင်အချိန်အထိ မီဇိုရမ်ပြည်နယ်တွင် လုံလုံခြုံခြုံနဲ့ဆက်လက်ခိုလှုံနိုင်ကြဖို့ အကောင်းဆုံးလုပ်ဆောင်ပေး သွားကြပါ လို့ထုတ်ပြန် ကြေညာလိုက်တာ ဖြစ်ပါတယ်။

#RadioNUGLocalNews

#SpringRevolution