07 SEP 2024 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၄ စက်တင်ဘာလ ( ၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ သုံးရက်ကြာပြုလုပ်တဲ့ ကန်ပက်လက်မြို့နယ်လုံးဆိုင်ရာ ပြည်သူ့ညီလာခံ ဆုံးဖြတ်ချက်ထွက်ပေါ်လာ။

 

မြို့နယ် ပြည်သူ့အုပ်ချုပ်ရေး၊ ချင်းကာကွယ်ရေးတပ်ဖွဲ့ (ကန်ပက်လက်) တာဝန်ရှိသူ ၈၉ ဦး တက်ရောက်တဲ့ တတိယအကြိမ်မြောက် ကန်ပက်လက်မြို့နယ်လုံးဆိုင်ရာ ပြည်သူ့ညီလာခံကို ဩဂုတ် ၂၉ ရက်ကနေ ၃၁ ရက်နေ့အထိ ၃ ရက်ကြာ ကျင်းပခဲ့တယ်လို့ သိရပါတယ်။

ဒီညီလာခံဆုံးဖြတ်ချက်အရ ကန်ပက်လက်မြို့နယ်အနေနဲ့ တော်လှန်ရေးဆိုင်ရာကိစ္စရပ်တွေကို ‘ချင်းညီနောင်’ နဲ့ အပြည့်အဝပူးပေါင်းပြီး နိုင်ငံရေးကိစ္စရပ်တွေကို ကြားကာလချင်းအမျိုးသား အတိုင်ပင်ခံကောင်စီ (ICNCC) နဲ့ ပူးပေါင်းသွားမယ်လို့ ကြေညာပါတယ်။

‘ချင်းညီနောင်’ (ICNCC) နဲ့ ပူးပေါင်းဆောင်ရွက်ခြင်းမရှိတဲ့ ဘယ်လိုနိုင်ငံရေး၊ လက်နက်ကိုင်အဖွဲ့အစည်းကိုမျှ ကန်ပက်လက်မြို့နယ်အတွင်း လက်ခံမှာမဟုတ်ဘူးလို့ ဆိုပါတယ်။ ဆုံးဖြတ်ချက် ကျူးလွန်သူရှိလာရင် လိုအပ်တဲ့အရေးယူမှု ဆောင်ရွက်ဖို့ ကန်ပက်လက်မြို့နယ်လုံးဆိုင်ရာ ပြည်သူ့ညီလာခံက ဆိုပါတယ်။

ချင်းကာကွယ်ရေးတပ်ဖွဲ့ (ကန်ပက်လက်) ကို စစ်ဦးစီးချုပ်စနစ်ဖြင့် ပြောင်းလဲဖွဲ့စည်းပြီး တော်လှန်ရေးအရှိန်မြှင့်သွားမယ်လို့လည်း ကြေညာထားပါတယ်။

‘ချင်းညီနောင်’ ကို ချင်းပြည် စစ်ရေး၊ နိုင်ငံရေးကိစ္စအဝဝ ပူးပေါင်းကိုင်တွယ်ဖို့ ZFU/PDF Zoland, CNC - Mindat/CDF - Mindat နဲ့ CNO/CNDF တို့က ၂၀၂၃ ဒီဇင်ဘာလမှာ စတင်ဖွဲ့စည်းတည်ထောင်ကြတာပါ။

အဲဒီနောက် ချင်းကာကွယ်ရေးတပ်ဖွဲ့ (ကန်ပက်လက်) ရဲ့ Tumee တပ်ရင်း၊ Khonu တပ်ရင်း၊ Vakok တပ်ရင်း၊ Victoria တပ်ရင်း၊ Mahuyar တပ်ရင်း ၅ ခုနဲ့ Maraland Territorial Council (MTC/MDF) တို့ကလည်း ‘ချင်းညီနောင်’ မှာ ပူးပေါင်းပါဝင်တဲ့ ပူးတွဲ ကြေညာချက် ၂၀၂၄ ဇန်နဝါရီ ၃၁ ရက်မှာ ထုတ်ပြန်ပါတယ်။

၂၀၂၄ ဧပြီလ ၉ ရက်နေ့မှာတော့ ချင်းကာကွယ်ရေးတပ်ဖွဲ့ (မတူပီ) တပ်မဟာ ၁ က ‘ချင်းညီနောင်’ မှာ ပူးပေါင်းတဲ့အကြောင်း အတည်ပြု ထုတ်ပြန်ပါတယ်။

 

========================

 

📌📌 ၂။ မင်းတပ်မြို့နယ်မှာ စစ်ကောင်စီက လေကြောင်းတိုက်ခိုက်မှု ထပ်လုပ်၊ တလအတွင်း အကြိမ် ၃၀ ကျော် ဗုံးကြဲခံရ။

 

မင်းတပ်မြို့နယ်ထဲ ဩဂုတ်လ ၃၁ရက်နေ့၊ မနက် ၃ နာရီဝန်းကျင် လူအိပ်မောကျချိန်မှာ စစ်ကောင်စီလေတပ်က လေကြောင်းဗုံးကြဲတိုက်ခိုက်မှု ထပ်လုပ်ခဲ့ပါတယ်။

အဆိုပါ ဗုံးကြဲတိုက်ခိုက်ခံရမှုကြောင့် အရပ်သားနေအိမ်တချို့ ထိခိုက်ပျက်စီးမှုရှိပြီး လူထိခိုက်မှု ရှိ၊ မရှိကိုတော့ အခုထိအတည်မပြုနိုင် သေးပါဘူး။

ပြီးခဲ့တဲ့ဩဂုတ်လအတွင်း စစ်ကောင်စီလေကြောင်း တိုက်ခိုက်မှုဟာ သိသိသာသာတိုးလာနေပြီး တစ်လအတွင်း အကြိမ် ၃၀ ကျော်ရှိနေပါတယ်။

ဩဂုတ်လ ၇၊ ၉၊ ၁၉၊ ၂၀ နဲ့ ၂၆ ရက်နေ့တွေမှာ မင်းတပ်မြို့နယ်အတွင်း လေကြောင်းတိုက်ခိုက်မှုရှိတယ်လို့ The Mindat Postပြုစုထားတဲ့ စာရင်းအရ သိရပါတယ်။

ဩဂုတ်လ ၉၊ ၂၂ ရက်နေ့မှာလည်း ခလရ ၂၇၄ စစ်ကောင်စီတပ်ရင်းက ပစ်တဲ့ လက်နက်ကြီးကျည်ကျကွဲလို့ အမျိုးသမီးတစ်ဦး အသက်ဆုံးရှုံးပြီး ကလေးငယ်တဦး လက်တဖက်ပြတ်တဲ့ ဖြစ်စဉ် ဖြစ်ပွားခဲ့သလို မြို့ပေါ်ရှိ နေအိမ် ၆ လုံးဝန်းကျင်မီးလောင်ခဲ့ပါတယ်။

ဒါ့အပြင် ဩဂုတ်လ ၂၇ ရက်နေ့ကလည်း  မင်းတပ်မြို့ စံပြရပ်ကွက်မှာ စစ်ကောင်စီထောင်တဲ့ မြေမြုပ်မိုင်းပေါက်ကွဲလို့ အသက် ၆၀ ဝန်းကျင် အမျိုးသမီးတစ်ဦး ခြေတဖက်ဆုံးရှုံးခဲ့ပါတယ်။

 

========================

 

📌📌 ၃။ ချင်းပြည်အတွင်း စစ်ဆင်ရေးတွေမှာ ခရီးသည်တင် ATR လေယာဉ်တွေကို စစ်ကောင်စီ အသုံးပြု။

 

ပြင်သစ်နိုင်ငံထုတ် ခရီးသည်တင် ATR လေယာဉ်တွေကို စစ်ကောင်စီက စစ်ဆင်ရေးတွေမှာ စစ်သည်၊ လက်နက်နဲ့ ထောက်ပံ့ရေးပစ္စည်းသယ်ယူပို့ဆောင်ဖို့ အဓိကအသုံးပြုနေတယ်လို့ Justic for Myanmar ရဲ့ ၂၀၂၄ ခုနှစ် ဩဂုတ်လ ၂၉ ရက်နေ့ အစီရင်ခံစာမှာ ဖော်ပြပါတယ်။

ပြင်သစ် - အီတလီ ဖက်စပ်ထုတ်လုပ်တဲ့ ATR လေယာဉ်တွေကို စစ်ရေးအတွက် ပြောင်းလဲ အသုံးပြုနေပြီး မြန်မာ၊ အီးယူ၊ အမေရိကန်ပြည်ထောင်စု၊ အစ္စရေးနဲ့ စင်ကာပူနိုင်ငံရှိ ကုမ္ပဏီတွေဟာ လေယာဉ်အပိုပစ္စည်း ရောင်းချပေးခြင်း၊ ပြုပြင်ထိန်းသိမ်းရေးဝန်ဆောင်မှု ပေးအပ်ခြင်းတွေနဲ့ စစ်ကောင်စီကို ကူညီနေခဲ့တယ်လို့ ဆိုပါတယ်။

Justic for Myanmar ရဲ့ တွေ့ရှိချက်မှာ ၂၀၂၄ ခုနှစ်အတွင်း စစ်သားတယောက်က TikTok ပေါ်မှာ တင်ခဲ့တဲ့ ဗီဒီယိုဖိုင်တခုမှာ ချင်းပြည်ကို ATR စစ်တပ်လေယာဉ်ဖြင့် စစ်သည်ပို့ဆောင်ခဲ့မှု၊ ၂၀၂၄ ခုနှစ် ဇန်နဝါရီလ ၂၄ ရက်နေ့ အိန္ဒိယနိုင်ငံ၊ မီဇိုရမ်ပြည်နယ်ဘက်သို့ ထွက်ပြေးတဲ့ စစ်ကောင်စီတပ်ဖွဲ့ဝင် ၉၂ ဦးကို ATR လေယာဉ်နဲ့ ပြန်ခေါ်ဆောင်တဲ့ ဖြစ်စဉ်တွေေ ပါဝင်ပါတယ်။

ATR လေယာဉ်တွေကို စစ်ကောင်စီက ဆက်လက်အသုံးပြုနေမှု တားဆီးဖို့အတွက် အရေးယူဆောင်ရွက်ချက်တွေ အရေးတကြီး လိုအပ်နေတာကြောင့် မြန်မာ့လေတပ်အနေနဲ့ အပိုပစ္စည်းတွေနဲ့ အစားထိုးပစ္စည်းတွေ လက်လှမ်းမှီဝယ်ယူရရှိနေမှု၊ လေယာဉ်အမှုထမ်းတွေနဲ့ ပြုပြင်ထိန်းသိမ်းရေးဝန်ထမ်းတွေအတွက် လေ့ကျင့်သင်ကြားမှုတွေ ရရှိနေမှု၊ ATR လေယာဉ်တွေ ဆက်လက်ပျံသန်းနိုင်မှုအတွက် လိုအပ်တဲ့ လမ်းညွှန်ချက်တွေ ရရှိနေမှုကို ပိတ်ပင်တားဆီးဖို့ နိုင်ငံတကာအစိုးရနဲ့ ပစ္စည်းတင်သွင်းရောင်းချသူတွေကို Justice For Myanmar က တောင်းဆိုကြောင်းလည်း ထုတ်ပြန်တာ တွေ့ရပါတယ်။

#RadioNUGLocalNews

#SpringRevolution