24 Feb 2025 - (Ethnic language program-Matupi) by The Matupi Times

 

📌 (ချင်း တိုင်းရင်းသား - Matupi ) ထုတ်လွှင့်မှု အစီအစဥ် ၂၀၂၅ ဖေဖော်ဝါရီလ ( ၂၄ ) ရက်နေ့ ရပြည်တွင်းသတင်းများ

📌📌 1. မီဇိုရမ်၊ လောင်တလိုင်ခရိုင်၊ ခရိုင်အဆင့် ပန်းချီပြိုင်ပွဲတွင် (ချင်း)စစ်ရှောင်တစ်ဦး တတိယဆုရရှိ

The Matupi Times ၊ ဖေဖော်ဝါရီ ၂၁၊ ၂၀၂၅ မီဇိုရမ်၊ လောင်တလိုင်ခရိုင်တွင် ကျင်းပပြုလုပ်ခဲ့သည့် ခရိုင်အဆင့် အလယ်တန်း ပန်းချီပြိုင်ပွဲတွင် (ချင်း)စစ်ရှောင်တစ်ဦး တတိယဆုရရှိခဲ့ကြောင်း သိရသည်။

ဆုရရှိသူမှာ မတူပီ (ချင်း) စစ်ရှောင် ဆလိုင်း ဒေးဗစ်ဆန်းမွှေး (Salai David San Mawi) ဖြစ်ပြီး Don Bosco ကျောင်း (Class-8) တွင် ပညာသင်ယူနေသူဖြစ်သည်။ ပန်းချီပြိုင်ပွဲတွင် Don Bosco ကျောင်းကိုယ်စားပြုအနေဖြင့် ဝင်ရောက်ယှဉ်ပြိုင်ခဲ့သည်။

"David ကပန်းချီဆွဲတာ အရမ်းဝါသနာပါတယ်။ ပန်းချီကိရိယာ အပြည့်အစုံ မထောက်ပံ့ပေးနိုင်ပေမယ့် ရတဲ့နည်းနဲ့ သူကပုံတွေဆွဲလေ့ရှိတယ်။ ပြိုင်ပွဲအတွက်လည်း ကြိုတင်ပြင်ဆင်မှု ဘာမှ မရှိခဲ့ပါဘူး။ ပြိုင်ပွဲနီးကပ်မှ ဆရာမက ပြိုင်ပွဲဝင်ဖို့ ခေါ်လိုက်တာ။ တတိယဆုရတဲ့အတွက် ဂုဏ်ယူမိပါတယ်" ဟု မိခင်ဖြစ်သူက The Matupi Times ကို ပြောသည်။

အဆိုပါ ခရိုင်အဆင့် ပန်းချီပြိုင်ပွဲကို ပြီးခဲ့သည့် ဖေဖော်ဝါရီ ၆၊ ၂၀၂၅ ရက်နေ့တွင် ကျင်းပပြုလုပ်ခဲ့ပြီး ကျောင်းသားဦးရေ (၁၀၀) ကျော် ဝင်ရောက်ယှဉ်ပြိုင်ခဲ့ကြောင်း သိရသည်။

ဆလိုင်း ဒေးဗစ်ဆန်းသည် ဖခင် U Tlang Mawi နှင့် Daw Thim Voel တို့၏ သားဖြစ်ပြီး ၂၀၂၁ ခုနှစ်အတွင်း မတူပီမြို့မှ မီဇိုရမ်သို့ စစ်ဘေးတိမ်းရှောင်လာခဲ့သည်။

========================

📌📌 2. ချင်းပန်းချီဆရာများစုပေါင်း၍ ရန်ကုန်မြို့တွင် (၅) ရက်ကြာ ပန်းချီပြပွဲကျင်းပမည်

The Matupi Times ၊ ဖေဖော်ဝါရီ ၁၈၊ ၂၀၂၅ ချင်းပန်းချီဆရာများ စုပေါင်း၍ လာမည့် ဖေဖော်ဝါရီ ၂၀ ရက်နေ့မှစတင်၍ ရန်ကုန်မြို့၊ ပုဇွန်တောင်မြို့နယ်ရှိ Izana Gallery တွင် ပန်းချီပြပွဲ ကျင်းပပြုလုပ်သွားမည်ဖြစ်ကြောင်း သိရသည်။

ယခုကျင်းပမည့် ပန်းချီပြပွဲတွင် ချင်းလူမျိုးထဲမှ ပန်းချီရေးသူ ပထမမျိုးဆက်ဖြစ်သူ ပန်းချီဆရာကြီး Moe Yin Lushai Hills နှင့် Pu ZoZam တို့နှင့်အတူ လက်ရှိပန်းချီရေးသူမျိုးဆက်သစ်များပါဝင်ကြမည်။

ပန်းချီပြပွဲနှင့်ပတ်သက်၍ ဆလိုင်းနံရံက "ပထမပြပွဲကတော့ ၂၀၂၄ မေလတွင် ကျင်းပခဲ့သည်။ အဲဒီတုန်းက ပန်းချီဆရာ သုံးဦး၊ ချင်းမျိုးနွယ်စုစာပေနှင့် ယဉ်ကျေးမှုကော်မတီများနှင့်အတူ ပန်းချီပြပွဲအပြင် ရိုးရာယဉ်ကျေးမှုအကြောင်း Panel Discussion ပြုလုပ်ခဲ့ကြသည်။ အခုပြပွဲတွင် ချင်းလူမျိုး ပန်းချီရေးသူများ လက်လှမ်းမှီသလောက် စုစည်း၍ အုပ်စု ပန်းချီပြပွဲ ကျင်းပခြင်းဖြစ်သည်။ ထူးခြားချက်မှာ ချင်းလူမျိုးထဲမှ ပန်းချီရေးသူ ပထမမျိုးဆက်ဖြစ်သော ပန်းချီဆရာကြီး Moe Yin Lushai Hills နှင့် Pu ZoZam တို့မှစ၍ လက်ရှိ ပန်းချီရေးသူမျိုးဆက်သစ်များပါဝင်ကြသည်။ NCAC တည်ထောင်ခြင်းရည်ရွယ်ချက်မှာ ချင်းလူမျိုးတို့ကြား စာပေ၊ ယဉ်ကျေးမှုနှင့် အနုပညာရပ်ဝန်း တစ်ခု ပြုလုပ်နိုင်ရန် ဖြစ်သည်" ဟု The Matupi Times ကို ပြောသည်။

ပန်းချီပြပွဲသည် Native Chin Art Circle - NCAC မှ ပြုလုပ်သည့် ဒုတိယမြောက် ပန်းချီပြပွဲ ဖြစ်ပြီး လာမည့် ဖေဖော်ဝါရီ ၂၀ ရက်နေ့မှ ၂၄ ရက်နေ့အထိ (၅) ရက်ကြာ ကျင်းပမည်။

========================

📌📌 3. တီးတိန်မြို့နှင့် ဟားခါးမြို့က စကစတပ်သား (၃) ဦး ချင်းတော်လှန်ရေးတပ်ဖွဲ့ထံ အလင်းဝင်

The Matupi Times ၊ ဖေဖော်ဝါရီ ၂၀၊ ၂၀၂၅ ဟားခါး ၂၆၆ မှ စကစ ရဲဘော်တစ်ဦးနှင့် တီးတိန်မြို့က စကစဘက်မှ ရဲသား (၂) ဦးသည် ဒေသခံ ချင်းကာကွယ်ရေးတပ်ဖွဲ့ထံ အလင်းဝင်လာကြောင်း သိရသည်။

ဟားခါး ၂၆၆ မှ စကစ ရဲဘော်တစ်ဦးသည် ၂၀၂၅ ဖေဖော်ဝါရီ ၁၉ ရက်နေ့တွင် Senthang Revolution Force (SRF) ထံ MA1 တစ်လက်၊ ကျည်ကပ် နှစ်ခုနှင့် ပြည်သူထံ လာပူးပေါင်းလာခြင်းဖြစ်ပြီး SRF မှ ငွေကျပ်သား သိန်းလေးဆယ်တိတိ ချီးမြှင့်ပေးအပ်ခဲ့ကြောင်း သိရသည်။

တီးတိန်မြို့က စကစဘက်မှ ရဲသား (၂) ဦးသည် CDF-CDM SIYIN ထံ ၂၀၂၅ ခုနှစ် ဖေဖော်ဝါရီ ၁၇ ရက်နေ့၌ အလင်းဝင်လာကြောင်း သိရသည်။ အလင်းဝင်လာသူ (၂) ဦးသည် တီးတိန်မြို့ (၂၆၉) တပ်ရင်းမှ တပ်သား ကျော်စောနိုင်နှင့် တပ်သား ဇော်လင်း တို့ဖြစ်ကြောင်း သိရပြီး ခဲယမ်း တချို့ယူဆောင်ကာ အလင်းဝင်ခဲ့ကြောင်း သိရသည်။

========================

📌📌 4. ချင်းပြည်နယ် ဟားခါးမြို့မှာ ချင်းအမျိုးသားနေ့ကျင်းပ

The Matupi Times ၊ ဖေဖော်ဝါရီ ၂၀၊ ၂၀၂၅ ချင်းပြည်နယ် ဟားခါးမြို့ ၂၆၆ တပ်ရင်း၌ ဒီကနေ့ ဖေဖော်ဝါရီ ၂၀ ရက်နေ့ ကျရောက်သည့် (၇၇) နှစ်မြောက် ချင်းအမျိုးသားနေ့အခမ်းအနားကို ကျင်းပပြုလုပ်ခဲ့ကြောင်း နိုင်ငံပိုင်သတင်း MRTV ရုပ်သံလိုင်းကနေတဆင့် ဒီကနေ့ ညနေပိုင်းသတင်းမှာ ဖော်ပြခဲ့သည်။

(၇၇) နှစ်မြောက် ချင်းအမျိုးသားနေ့ မုချဦးကို ဗိုလ်ချုပ်ကြီး တင်အောင်စန်း၊ နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါက်တာမှုထန်နှင့် ဒေါက်တာဘရွှေ၊ ချင်းပြည်နယ်ဝန်ကြီးချုပ် ဒေါက်တာဝုန်ဆွန်းထန် တို့က ဖဲကြိုးဖြတ်ဖွင့်လှစ်ခဲ့ကြောင်း ဆိုသည်။

အခမ်းအနားကို စစ်ကောင်စီအဖွဲ့ဝင်၊ ဒုတိယဝန်ကြီးချုပ်နှင့် နိုင်ငံတော်ဝန်ကြီးချုပ်ရုံး ပြည်ထောင်စုဝန်ကြီး ဗိုလ်ချုပ်ကြီး တင်အောင်စန်း၊ နယ်စပ်ရေးရာ ပြည်ထောင်စုဝန်ကြီး ဒုဗိုလ်ချုပ်ကြီး ရာပြည့်၊ စစ်ကောင်စီ ခန့်အပ်ထားသည့် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါက်တာမှုထန်နှင့် ဒေါက်တာဘရွှေ၊ ပြည်ထောင်စုဝန်ကြီး တချို့တို့ တက်ရောက်ခဲ့ကြောင်း သိရသည်။

========================

📌📌 5. ငဖဲမြို့နယ်မှာ လက်နက်ခဲယမ်းတင်ဆောင်လာသော စကစ ယာဉ်တန်းကို CDF-Asho တိုက်ခိုက်၊ စကစ တပ်သား (၇) ဦး သေဆုံးပြီး ကား ၁ စီး မီးလောင်ပျက်စီး

The Matupi Times ၊ ဖေဖော်ဝါရီ ၂၃၊ ၂၀၂၅ မကွေးတိုင်း၊ ငဖဲမြို့နယ်ရှိ စစ်ကောင်စီ၏ နတ်ရေကန် လေကြောင်းရန်ကာကွယ်ရေးတပ်မှ လက်နက်ခဲယမ်းများ တင်ဆောင်လာသော ယာဉ်တန်းအား CDF-Asho က ပစ်ခတ်တိုက်ခိုက်ခဲ့ကြောင်း သိရသည်။

CDF-Asho ၏ တိုက်ခိုက်မှုကြောင့် စကစကား ၁ စီး ပျက်စီးပြီး ၁ စီး မီးလောင်သွားကြောင်း ချင်းကာကွယ်ရေးတပ် - အရှို (CDF-Asho) က သတင်းထုတ်ပြန်သည်။

ယမန်နေ့ နေ့လယ် ၁ နာရီခွဲခန့်တွင် လေကြောင်းရန်ကာကွယ်ရေးတပ်မှ လက်နက်ခဲယမ်းများ တင်ဆောင်၍ အင်အား ၁၀၀ ခန့် လိုက်ပါလာသော စစ်ကောင်စီ တပ်ယာဉ် ၄ စီးအား ပျဉ်းဝ စစ်ဆေးရေးဂိတ် အနောက်ဘက် မီတာ ၃၀၀၀ ခန့်အကွာ၌ တိုက်ခိုက်ခဲ့ကြောင်း ဆိုသည်။

တိုက်ခိုက်မှုအတွင်း စစ်ကောင်စီ တပ်သား ၇ ဦး ပွဲချင်းပြီး သေဆုံးကာ ဒဏ်ရာရသူလည်း အများအပြားရှိကြောင်း ဖော်ပြထားသည်။

အဆိုပါ ယာဉ်များအား ရှင်းလင်းရေး ဆောင်ရွက်စဉ် တော်လှန်ရေးရဲဘော် ၁ ဦး သေဆုံးခဲ့ကာ ၁ ဦး ထိခိုက် ဒဏ်ရာရခဲ့ပြီး စစ်သားများထံမှ သေနတ် ၄ လက်နှင့် ခဲယမ်းများ သိမ်းရခဲ့ကြောင်း CDF-Asho က အသိပေးထားသည်။

========================

📌📌 6. ဂျပန်နိုင်ငံ၊ BANKEI Fight ပြိုင်ပွဲအတွက် ချင်းလူငယ် ဘောက်ဆင်သမားတစ်ဦး ရွေးချယ်ခံရ

The Matupi Times ၊ ဖေဖော်ဝါရီ ၂၂၊ ၂၀၂၅ ဂျပန်နိုင်ငံ Osaka မြို့၌ လာမည့် ဖေဖော်ဝါရီ ၂၄၊ ၂၀၂၅ ရက်နေ့တွင် ကျင်းပမည့် BANKEI Fight ဘောက်ဆင်ပြိုင်ပွဲတွင် ဝင်ရောက်ယှဉ်ပြိုင်ရန်အတွက် ချင်းလူငယ် ဘောက်ဆင်သမား ဂင့်ရှမ်းမွောင် အပါအဝင် မြန်မာကစားသမား (၃) ဦး ရွေးချယ်ခံခဲ့ရကြောင်း သိရသည်။

ရွေးချယ်ခံရသူများမှာ နော်ဖုန်း၊ စောလင်းအောင်နှင့် ဂင့်ရှမ်းမွောင် တို့ဖြစ်ပြီး နိုင်ငံတကာ ပရော်ဖက်ရှင်နယ် လက်ဝှေ့ပွဲအတွက် Myanmar Boxing Commission (MBC) ကိုယ်စားပြုအနေဖြင့် ရွေးချယ်ခံခဲ့ရကြောင်း သိရသည်။

ပြိုင်ပွဲ ကျင်းပမည့် ဂျပန်နိုင်ငံ၊ အိုဆာကာသို့ ပြိုင်ပွဲဝင် ကစားသမား (၃) ဦး နှင့်အတူ MBC အုပ်ချုပ်သူ ဦးဝဏ္ဏ (Vice Commissioner)၊ နည်းပြ ဆရာရန်ဝင်းကြည်၊ ကိုသန်းစိုးအောင် (Secretary General)၊ Mr. Nakamura (International Relationship Officer) တို့ ဒီကနေ့ မနက်ပိုင်းတွင် ရန်ကုန်လေဆိပ်မှ ထွက်ခွာသွားပြီဖြစ်ကြောင်း သိရသည်။

BANKEI Fight ပြိုင်ပွဲ၏ မြန်မာကစားသမား ပွဲစဉ်များကို Japan စံတော်ချိန် နေ့လည် (၂:၀၀) နာရီတွင် Osaka မြို့ ABENO KUMIN Center တွင် ကျင်းပမည်။

အဆိုပါပြိုင်ပွဲကို မြန်မာပရိသတ်များအနေဖြင့် ဖေဖော်ဝါရီလ ၂၄၊၂၀၂၅ ရက်နေ့ မြန်မာစံတော်ချိန် နံနက် (၁၁း၃၀)အချိန်ခန့်၌ Abema Tv Channel တွင် တိုက်ရိုက် Live ကြည့်ရှုအားပေးနိုင်ကြောင်းသိရသည်။

#RadioNUGLocalNews

#SpringRevolution