12 Apr 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ ဧပြီလ ( ၁၂ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်မြို့နယ်၊ ဖွီကျေးရွာ လေကြောင်းတိုက်ခိုက်မှုတွင် ကလေးငယ် ၂ ဦးအပါအဝင် စုစုပေါင်း ၆ ဦး အသက်ဆုံးရှုံး၊ ၉ ဦး ဒဏ်ရာရ

ဧပြီလ ၉ ရက်နေ့ ည ၉ နာရီဝန်းကျင်မှာ မင်းတပ်မြို့နယ် ဖွီကျေးရွာကို စစ်ကောင်စီက လေကြောင်းတိုက်ခိုက်မှု ပြုလုပ်ခဲ့ပါတယ်။
Assembly of God (AG) အသင်းတော်က ဓမ္မအမှုတော်ဆောင်ဆရာ တစ်ဦး၊ မသန်စွမ်း (၁) ဦး၊ ၇ နှစ်အရွယ် ကလေး (၁) ဦး၊ ၈ လသားကလေး (၁) ဦး၊ သက်ကြီးရွယ်အို (၂) ဦး စုစုပေါင်း ၆ ဦး အသက်ဆုံးရှုံးခဲ့ရတယ်လို့ ဒေသခံတွေက ပြောပါတယ်။
ဒီလေကြောင်းတိုက်ခိုက်မှုမှာ ထိခိုက်ဒဏ်ရာရသူ စုစုပေါင်း ၉ ဦး ရှိပြီး၊ သက်ကြီးရွယ်အိုနဲ့ ကလေးသူငယ်တွေလည်း ပါဝင်တယ်လို့ ဆိုပါတယ်။
စစ်ကောင်စီက မင်းတပ်မြို့နယ် တိုက်နယ်အမှတ် (၄) က ဖွီကျေးရွာကို တစ်ညတည်းမှာ ၂ ကြိမ်တိတိ လေကြောင်းကတိုက်ခိုက်ခဲ့တာပါ။
ည ၈:၄၄ နာရီအချိန်မှာ တစ်ကြိမ်၊ နောက်ထပ် (၁၄) မိနစ်ခန့်အကြာ ည ၈:၅၈ နာရီအချိန်မှာ နောက်တစ်ကြိမ် စုစုပေါင်း ၂ ကြိမ် တိုက်ခိုက်ခဲ့တာလို့ ဒေသခံတွေက ပြောပါတယ်။
၂ ကြိမ်စလုံးမှာ ပေါင် (၅၀၀) ဗုံးနဲ့ တိုက်ခိုက်ခဲ့တာလို့ HKL Mindat က ၎င်းရဲ့ လူမှုကွန်ရက်မှာ ဖော်ပြထားပါတယ်။
ကျေးရွာတွင်း နေအိမ်ပေါင်း (၁၀) ကျော် ပျက်စီးသွားတယ်လို့ ဒေသခံတွေက ပြောပါတယ်။
အခုလိုတိုက်ခိုက်မှုနဲ့ ပတ်သက်ပြီး “စစ်ရှုံးနေတဲ့ စစ်ကောင်စီက အရပ်သားပြည်သူ လူထုကို ဦးတည်ပြီး ရည်ရွယ်ချက်ရှိရှိ တိုက်ခိုက်တာဖြစ်တယ်” လို့ ဒေသခံတစ်ဦးက ၎င်းရဲ့ လူမှုကွန်ရက်မှာ ဖော်ပြထားပါတယ်။

========================

📌📌 ၂။ ဖလမ်းအောင်မြင်မှုဟာ အဖိနှိပ်ခံ မြန်မာပြည်သူတစ်ရပ်လုံးရဲ့ အောင်မြင်မှုဖြစ်တယ်လို့ CNO ပြော

ဖလမ်းမြို့ကို အပြည့်အဝ ထိန်းချုပ်ခဲ့တဲ့အောင်မြင်မှုဟာ အဖိနှိပ်ခံ မြန်မာပြည်သူတစ်ရပ်လုံးရဲ့ အောင်မြင်မှုဖြစ်တယ်လို့ CNO ရဲ့ အထွေထွေအတွင်းရေးမှူး Salai William Chin က ပြောကြားပါတယ်။
ဧပြီလ ၉ ရက်ညနေ ပြုလုပ်တဲ့ ဖလမ်းမြို့သိမ်းတိုက်ပွဲနဲ့ ပတ်သက်လို့ အထူးကြေညာသည့် သတင်းစာရှင်းလင်းပွဲမှာ အခုလို ပြောခဲ့တာပါ။

“ဖလမ်းအောင်မြင်မှုဟာ ချင်းညီနောင်တစ်ခုတည်းရဲ့ အောင်မြင်မှုမဟုတ်ဘူး။ ချင်းပြည်သူတစ်ခုလုံးလည်း မဟုတ်သလို ဒါက တစ်နိုင်ငံလုံးက အဖိနှိပ်ခံ ပြည်သူတရပ်လုံးရဲ့ အောင်မြင်မှုဖြစ်တယ်။
ဒါ့အပြင် စစ်ဆင်ရေးမှာ ပူးပေါင်းပါဝင်တဲ့ မကွေး၊ စစ်ကိုင်းရှိ တော်လှန်ရေးအင်အားစုတွေကို လှိုက်လှဲစွာ ကျေးဇူးတင်တယ်” လို့ ပြောပါတယ်။

ဖလမ်းမြို့သိမ်းတိုက်ပွဲအတွင်း 96 Soldier PDF, Anti-Fascist Internationalist Front (AIF), Burma National Revolutionary Army (BNRA), Burmese Revolutionary Technical Front (BRTF - ယမ်းအဖွဲ့), Generation Z Army (GZA), Giant Revolution Force (GRF), Harmonious Northern Brother (HNB), Kalay Revolution Force (KRF), Kalay Urban Guerrilla (Kalay UG), Myingyan Black Tiger (MBT), National Liberation Army (NLA), Revolution Ambulance Wolf (RAW Medical Team), Sagaing Federal Troop (SFT - စစ်ကိုင်းဖက်ဒရယ် တပ်ပေါင်းစု), Yaw Defense Force (YDF), Zo Army (ZA) ကလေးခရိုင် Pa Ka Pha နဲ့ ဒရုန်းအဖွဲ့ဝင်များ ပါဝင်ခဲ့တယ်လို့ ချင်းညီနောင်က ဆိုပါတယ်။
စစ်ကောင်စီဟာ ဖလမ်းမြို့ မကျအောင်မြင်ရေးအတွက် မြေပြင်စစ်ကူအင်အားအများအပြားအပြင်၊ လေကြောင်းတိုက်ခိုက်မှု အကြိမ် (၁,၀၀၀) ကျော်နဲ့ အပြင်းအထန် ခုခံခဲ့ပေမယ့် သိမ်းပိုက်နိုင်ခဲ့တာလို့လည်း ဖော်ပြထားပါတယ်။
၂၀၂၄ ခုနှစ်၊ နိုဝင်ဘာလ ၉ ရက်နေ့က စတင်ခဲ့တဲ့ ဖလမ်းမြို့သိမ်း ‘ချင်းညီနောင်’ စစ်ဆင်ရေးဟာ ၅ လအတိအကျ ကြာမြင့်ခဲ့ပါတယ်။

စစ်ဆင်ရေးအတွင်း အသက်ပေးလှူကြသူများ၊ ကိုယ်လက်အင်္ဂါပေးဆပ်သူများ၊ ရွှပ်ရွှပ်ချွံချွံ ချီတက်တိုက်ပွဲဝင်ပေးသူ တပ်မှူး၊ တပ်သားများ၊ ထောက်ပို့ပေးသူ မိဘပြည်သူများ၊ ခဲယမ်း စစ်လက်နက်ပစ္စည်းများအပြင် စစ်ရေးဆိုင်ရာ အကြံဥာဏ်အကူအညီပေးတဲ့ အာရက္ခတပ်တော် - AA ကိုလည်း ဂုဏ်ပြုမှတ်တမ်းတင်တယ်လို့ ချင်းညီနောင်က ထုတ်ပြန်ပါတယ်။

========================

📌📌 ၃။ ရခိုင်နဲ့ အိမ်နီးချင်းကောင်း ပီပြင်စွာ ရေရှည်လက်တွဲမယ်လို့ ‘ချင်းညီနောင်’ ပြော

စစ်အာဏာရှင်စနစ် အလုံးစုံချုပ်ငြိမ်းပြီး၊ အမျိုးသားတန်းတူရေး၊ ကိုယ့်ကြမ္မာ ကိုယ်ဖန်တီးရေးအတွက် အာရက္ခဒေသနေနိုင်ငံသားများနဲ့ ချင်းပြည်သူတွေ အပြန်အလှန် စောင့်ရှောက်ကာ အိမ်နီးချင်းကောင်း ပီပြင်စွာ ရေရှည်လက်တွဲပြီး ပန်းတိုင်အထိ ဆက်လက် ချီတက်မယ်လို့ ‘ချင်းညီနောင်’ က ပြောပါတယ်။
၂၀၂၅ ခုနှစ်၊ ဧပြီ ၁၀ ရက်နေ့ ကျရောက်သည့် အာရက္ခတပ်တော် - AA ရဲ့ ၁၆ နှစ်မြောက် တပ်တည်ထောင်နေ့အတွက် ပေးပို့တဲ့ သဝဏ်လွှာမှာ အခုလို ဖော်ပြထားတာပါ။

ULA/AA အနေနဲ့ နိုင်ငံရေး၊ စစ်ရေး ရည်မှန်းချက်တွေ အကောင်အထည်ဖော်ရာမှာ အာရက္ခပြည်သူ တစ်ရပ်လုံးရဲ့ ပူးပေါင်းပါဝင်မှုနဲ့ တပ်ခေါင်းဆောင်တွေရဲ့ ရဲရင့်မှုကို တော်လှန်ရေးအဖွဲ့အစည်းတွေက လေးစားအတုယူနေတာကို ‘ချင်းညီနောင်’ အနေနဲ့ ဂုဏ်ယူကြောင်းလည်း ဖော်ပြပါတယ်။
ဒါ့အပြင် အာရက္ခပြည်သူတစ်ရပ်လုံး လိုလားတဲ့ နိုင်ငံရေး၊ စစ်ရေး ရည်မှန်းချက်တွေ အမြန်ဆုံး အကောင်အထည်ဖော်နိုင်ကြဖို့ ဆန္ဒပြုကြောင်းလည်း သိရှိရပါတယ်။

၂၀၂၃ ခုနှစ်၊ ဒီဇင်ဘာ ၃၀ ရက်နေ့ စတင်တည်ထောင်ခဲ့တဲ့ ‘ချင်းညီနောင်’ ဟာ အာရက္ခတပ်တော် - AA နဲ့ မဟာမိတ်ဖွဲ့ထားပြီး ချင်းပြည်နယ်ရှိ ကန်လက်လက်၊ မတူပီ၊ မင်းတပ်နဲ့ ဖလမ်းမြို့တို့ကို သိမ်းပိုက် ထိန်းချုပ်ထားပါတယ်။

#RadioNUGLocalNews

#SpringRevolution