24 May 2025 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၅ မေလ ( ၂၄ ) ရက်နေ့နောက်ဆုံးရပြည်တွင်းသတင်းများ

📌📌 ၁။ မင်းတပ်မှာ ဆက်တိုက် လေကြောင်းဗုံးကြဲခံရ၊ ၁ လအတွင်း အမျိုးသမီး၊ ကလေး ၁၁ ဦး သေဆုံး၊ ၂၀ ကျော် ဒဏ်ရာရ၊ လူသားချင်းစာနာမှုဆိုင်ရာ အကူအညီ လိုအပ်နေ။

 

မင်းတပ်မြို့နယ် တိုက်နယ် ၁ ထဲ စစ်ကောင်စီလေတပ်က မေလ ၁၅ ရက်နေ့ မနက် ၉ နာရီ မိနစ် ၄၀ ကျော်မှာ လေကြောင်းကနေ ဗုံးထပ်ကြဲလို့ ကလေးငယ် ၁ ဦး၊ အမျိုးသမီး ၁ ဦးသေဆုံးပြီး ၁၁ ဦး အပြင်းအထန်ဒဏ်ရာ ရတယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

ပြီးခဲ့တဲ့ ဧပြီလ ၉ ရက်နေ့ကနေ မေ ၁၅ ရက်နေ့အထိ ၁ လကျော်ကာလအတွင်း မင်းတပ်မြို့နယ်ထဲ အကြိမ် ၂၀ ဝန်းကျင် လေကြောင်းဗုံးကြဲတိုက်ခိုက်ခံရလို့ ပြည်သူသေဆုံးမှု ၁၁ ဦးရှိခဲ့ပြီး ထိခိုက်ဒဏ်ရာရသူလည်း ၂၀ ဦးထက်မနည်း ရှိတယ်လို့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့ရဲ့ ထုတ်ပြန်ချက်တွေအရ သိရပါတယ်။

ဧပြီလ ၉ ရက်နေ့ည မင်းတပ်မြို့နယ် တိုက်နယ် ၄ မှာ လေကြောင်းဗုံးကြဲခံရလို့ Assembly of God (AG) အသင်းတော်က ဓမ္မအမှုတော်ဆောင်ဆရာ တပါး၊ မသန်စွမ်း ၁ ဦး၊ ၇ နှစ်အရွယ် ကလေး ၁ ဦး၊ ၈ လသား အရွယ်ကလေး ၁ ဦး၊ သက်ကြီးရွယ်အို လင်မယား ၂ ဦး အသက်ဆုံးရှုံးခဲ့ပြီး ၁၀ ဦးဝန်းကျင် ဒဏ်ရာရခဲ့တာပါ။

မေလ ၇ ရက်နေ့မှာလည်း မင်းတပ်မြို့ပေါ်  ဗုံးကြဲခံရတာကြောင့် အမျိုးသား ၃ ဦး အသက်ဆုံးရှုံးခဲ့ရသလို အဆောက်အအုံအများအပြား ထိခိုက်ပျက်စီးမှုရှိတယ်လို့ မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ထားပါတယ်။

လေကြောင်းဗုံးကြဲမှု ဆက်တိုက်ခံနေရတဲ့ မင်းတပ်မှာ ပြည်သူတွေအနေနဲ့ လူသားချင်းစာနာ ထောက်ပံ့မှုများ လိုအပ်လျက်ရှိတယ်လို့လည်း မြို့နယ်ပြည်သူ့အုပ်ချုပ်ရေးက အသိပေးပန်ကြားထားပါတယ်။

၂၀၂၅ ဧပြီနှောင်းပိုင်း လှုပ်ခတ်ခဲ့တဲ့ စစ်ကိုင်းငလျင်နောက်ဆက်တွဲ အပစ်ရပ်ကြောင်း ကြေညာထားတဲ့ စစ်ကောင်စီဟာ နိုင်ငံအနှံ့ လေကြောင်းဗုံးကြဲတိုက်ခိုက်မှု ဆက်တိုက်ကျူးလွန်နေပြီး အခု ၂ လနီးပါးအတွင်း လူ ၂၀၀ နီးပါးသေဆုံးပြီလို့ National League for Democracyက မေလ ၁၅ရက်က ထုတ်ပြန်ပါတယ်။

 

========================

 

📌📌 ၂။ ဗန်းမော်မှာ စစ်ကူလာတဲ့ စစ်ရဟတ်ယာဉ် ၂ စင်းကို ပစ်ခတ်နိုင်ခဲ့ကြောင်း KIA အတည်ပြု။

 

မြို့သိမ်းတိုက်ပွဲ ပြင်းထန်နေတဲ့ ကချင်ပြည်နယ်၊ ဗန်းမော်မြို့မှာ စစ်ကူအင်အားလာပို့တဲ့ စစ်ရဟတ်ယာဉ် (၂)စင်းကို (KIA) က ပစ်ချနိုင်တယ်လို့ ကချင်လွတ်လပ်ရေးတပ်မတော် KIA ဘက်က ပြည်တွင်းသတင်းဌာနတွေကို အတည်ပြုပါတယ်။

မေလ ၂၀ရက် မွန်းလွဲပိုင်းမှာ  စစ်ကူလာသည့် စစ်ရဟတ်ယာဉ် (၃)စင်းအနက် ၂စင်းကိုပစ်ခတ်နိုင်ခဲ့တာဖြစ်ပြီး ၊ ရဟတ်ယာဉ် ၁စင်းဟာ ရွှေကူမြို့နဲ့ ၁၅မိုင်အကွာ တောတွင်းတစ်နေရာမှာ ပျက်ကျခဲ့ပြီး၊ နောက် ၁စင်းကတော့ ရွှေကူမြို့အနီးမှာ အရေးပေါ်ဆင်းသက်ခဲ့ရကြောင်းသိရသည်။

ဗန်းမော်မြို့သိမ်းတိုက်ပွဲကို ၂၀၂၄ ခုနှစ် ဒီဇင်ဘာလ ၄ ရက်နေ့မှ စတင်တိုက်ခိုက်နေခြင်းဖြစ်ပြီး ယခု ၅ လကျော်ကြာသည်အထိ နှစ်ဖက်တိုက်ပွဲများ ဆက်လက် ပြင်းထန်နေဆဲဖြစ်ကြောင်းသိရသည်။

 

========================

 

📌📌 ၃။ ဟားခါးမြို့ရှိ စကစတပ်ဖွဲ့ဝင်တစ်ဦးကို CDF-Hakka ဖမ်းဆီးရမိ ၊ စကစတပ်ဖွဲ့ဝင်(၃)ဦး Cdf-Hakha ထံအလင်းဝင်။

 

ချင်းပြည်နယ်၊ ဟားခါးမြို့ရှိ စကစတပ်ဖွဲ့ဝင်တပ်သားတစ်ဦးကို CDF-Hakkaက အရှင်ဖမ်းဆီးနိုင်ခဲ့သလို စစ်ကောင်စီတပ်ဖွဲ့ဝင်(၃)ဦးသည်လည်း CDF-Hakha ထံအလင်းဝင်လာကြောင်း CDF-Hakha မှမေလ ၁၈ ရက်နေ့မှာ ထုတ်ပြန်ပါတယ်။

ဟားခါးမြို့ရှိ စစ်ကောင်စီ စစ်သားတစ်ဦးကို CDF-Hakhaက ပြီးခဲ့သည့် ၂၀၂၅ခုနှစ်၊ ‌မေလ ၁၅ရက်နေ့တွင် ဖမ်းဆီးတယ်လို့ဆိုပါတယ်။

ဒါ့အပြင် မေလ ၁၅ နှင့် ၁၇ရက်နေ့တို့တွင် ဟားခါးမြို့ရှိ  စစ်သား(၂)ဦး နှင့် ရဲတပ်သား(၁)ဦးတို့သည် လက်နက်ခဲယမ်းများနှင့်အတူ Chinland Defense Force - Hakha ထံသို့ အလင်းဝင်လာခဲ့တယ်လို့သိရပါတယ်။

အလင်းဝင်ရောက်လာသူများကို Chinland Defense Force - Hakha အနေဖြင့် နွေးထွေးစွာကြိုဆိုပြီး ငွေသားဆုကြေးများ ချီးမြှင့်သည့်အပြင် လုံခြုံသည့်နေရာရောက်သည်အထိ တာဝန်ယူဆောင်ရွက်ပေးမယ်လို့ ထုတ်ပြန်ချက်မှာ ရေးသားဖော်ပြထားပါတယ်။

#RadioNUGLocalNews

#SpringRevolution