17th DEC 2022 - (Ethnic language program-CHO_DAAI) by Radio NUG

📌 (ချင်း တိုင်းရင်းသား - Daai ဒိုင်ရ် ဘာသာစကား) ထုတ်လွှင့်မှု အစီအစဥ် ၂၀၂၂ ဒီဇင်ဘာလ ( ၁၇ ) ရက်နေ့ နောက်ဆုံးရပြည်တွင်းသတင်းများ 

📌📌 ၁။ ဟားခါး မြို့မရဲစခန်းက မင်းတပ်ဒေသခံ ရဲတပ်သားတစ်ဦး CDF - Zophei ထံ လက်နက်နဲ့ အလင်းဝင်

 

ဟားခါးမြို့မရဲစခန်းက ရဲတပ်သား အောင်ထန်းဟာ CDF - Zophei ဆီ လက်နက်နဲ့အတူ အလင်းဝင်လာတယ်လို့ CDF - Zophei သတင်းနဲ့ ပြန်ကြားရေးဌာနက ဒီဇင်ဘာလ ၁၄ ရက်က သတင်းထုတ်ပြန်ပါတယ်။ 

 

ပြီးခဲ့တဲ့ နိုဝင်ဘာလ ၁၅ ရက်နေ့က G3 သေနတ် ၁ လက်၊ ကျည်ဆံ ၁၃၀ ကျော်၊ ကျည်ကာအင်္ကျီ ၁ စုံ၊ ရဲတပ်သားအသုံး ဆောင်ပစ္စည်းတချို့နဲ့အတူ အလင်းဝင်တာလို့ ဆိုပါတယ်။ အဲဒီ ရဲတပ်သားဟာ အာဏာမသိမ်းခင်တည်းက ဟားခါးမြို့မှာ ရဲတပ်သားတာဝန်ထမ်းဆောင်နေတဲ့ သူတစ်ယောက်ဖြစ်တယ်လို့ ဟားခါးမြို့ခံတစ်ဦးက The Mindat Post ကို ပြောပါတယ်။

 

“သူက ဟားခါးမှာ ၄၊ ၅ နှစ်လောက်တော့ရှိ ပြီ၊ လူလတ်ပိုင်းထဲက ရဲကားလည်း တခါတလေ မောင်း တယ်။ နိုဝင်ဘာလ တုန်းက ပျောက်သွားတယ်လို့ တော့ ကြားတာပဲ၊ ခုမှ CDM လုပ်သွားတာ သိရတာပါ” လို့ သူက ပြောပါတယ်။

 

လက်နက်နဲ့အတူ အလင်းဝင်လာတဲ့ မင်းတပ်မြို့နယ်ဒေသခံ ရဲတပ်သား အောင်ထန်းကို ဆုကြေးငွေ ကျပ်သိန်း ၈၀ ပေးပြီး လွတ်မြောက်နယ်မြေကို ပို့ဆောင်ပေးထားတယ်လို့ CDF - Zophei ရဲ့ ထုတ်ပြန်ချက်မှာ ဖော်ပြထားပါတယ်။ 

 

ဒီနှစ် စက်တင်ဘာလတုန်းကလည်း စစ်ကောင်စီရဲ့  ၂၆၆ တပ်ရင်းက တပ်သား ဇင်ကိုထက်၊ အောင်ဖြိုးမင်းနဲ့ သက်နိုင်ထွန်း တို့ ၃ ဦး သေနတ် ၂ လက်၊ လက်ပစ်ဗုံး ၃ လုံး၊ ကျည်ဆံ ၇၀၀ ကျော်နဲ့အတူ CDF - Zophei ထံ အလင်းဝင် ခိုလှုံခဲ့တာကြောင့် ကျပ်သိန်း ၁၅၀ ပေးအပ်ခဲ့တယ်လို့ CDF-Zophei သတင်းနဲ့ ပြန်ကြားရေးဌာနက ထုတ်ပြန်ထားပါတယ်။

========================

📌📌 ၂။ စစ်ကောင်စီတပ်နဲ့ CDF မင်းတပ်တို့ တကျော့ပြန်ပစ်ခတ်မှုဖြစ်၊ စစ်ကောင်စီတပ်သား ၃ဦးသေ၊ ၂ဦး ပြင်းထန်ဒဏ်ရာရ

 

စစ်ကောင်စီတပ်နဲ့ CDF မင်းတပ် ကာကွယ်ရေးတပ်တို့ ဒီဇင်ဘာ ၁၃ ရက် နေ့လည်ပိုင်းမှာ ထိတွေ့ပစ်ခတ်မှု ရှိတယ်လို့ CDF မင်းတပ်က ထုတ်ပြန်ပါတယ်။ မင်းတပ်မြို့ အနောက်ဘက် ၅မိုင် ၅ဖာလုံမှာ အင်အား ၂၀ဝန်းကျင်ရှိတဲ့ စစ်ကောင်စီတပ်သားတွေနဲ့ ပစ်ခတ်မှု ဖြစ်ပွားခဲ့ တာဖြစ်ပြီး စစ်ကောင်စီဘက် အသေအပျောက်ရှိတယ်လို့ CDF မင်းတပ် ပြောရေးဆိုခွင့်ရှိသူက The Mindat Post ကို ပြောပါတယ်။

 

“ဒီနေ့ နေ့လည်က ပစ်ခတ်မှုရှိတယ်။ အဲမှာ ပွဲချင်းပြီး ၃ယောက်သေပြီး ၂ယောက်က ဒဏ်ရာပြင်းတော့ ပြန်သယ်သွား ကြတယ်လို့ မျက်မြင်တွေဆီက သတင်းရထားပါတယ်” လို့ ပြောပါတယ်။ ထိတွေ့ ပစ်ခတ်မှုအပြီးမှာ စစ်ကောင်စီရဲ့ ၂၇၄ တပ်ရင်းကနေ လက်နက်ကြီးတွေ တောက်လျှောက်ပစ်နေပြီး လက်နက် ကြီးကျည် ကျရောက်ပေါက်ကွဲတဲ့ ကျေးရွာတွေအတည်ပြုဖို့ စုံစမ်းနေဆဲဖြစ်တယ်လို့လည်း သူက ဆက်ပြောပါတယ်။

 

ပြီးခဲ့တဲ့ နိုဝင်ဘာလဆန်းပိုင်းက ပလုံတွီကျေးရွာမှာ စစ်ကောင်စီတပ်နဲ့ CDF မင်းတပ်တို့အကြား ထိတွေ့ပစ်ခတ်မှု ဖြစ်ပွားပြီး ၁လနီးပါးအကြာမှာ နှစ်ဖက်ထိတွေ့မှု ပြန်လည်ဖြစ်ပွားခဲ့တာပါ။ ထိတွေ့တိုက်ပွဲအပြီးမှာ ကာကွယ်ရေးရဲဘော်တွေ တိုက်ပွဲနေရာကနေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ လည်း CDF မင်းတပ်က အတည် ပြု ထုတ်ပြန်ထားပါတယ်။

========================

 

📌📌 ၃။ ကန်ပက်လက်နယ်မှာ စစ်ကောင်စီတပ်သားတွေက လိုက်လံပစ်ခတ်လို့ အသက် ၆ဝ ဝန်းကျင်စစ်ရှောင်ပြည်သူ ၄ဦး ပြင်းထန်ဒဏ်ရာရ

 

မကွေးတိုင်း ကနေ ချင်းပြည်နယ်ဘက်ကို စစ်ကြောင်းထိုးလာတဲ့ စစ်ကောင်စီတပ်သားတွေက ကန်ပက်လက်မြို့နယ် ဒေသခံပြည်သူတွေကို လိုက်လံပစ်ခတ် ဖမ်းဆီးတာကြောင့် ဒေသခံ ၄ဦး ဒဏ်ရာရရှိထားတယ်လို့ သိရပါတယ်။

 

ဒီဇင်ဘာလ ၁၀ ရက်နေ့ ကန်ပက်လက်မြို့နယ် စစ်ဘေးရှောင်ကျေးရွာထဲကို စစ်ကောင်စီတပ်သားတွေက ပစ်ခတ်တာ ကြောင့် ပြည်သူ ၄ဦးထိခိုက် ဒဏ်ရာရထားတယ်လို့ CDF ကန်ပက်လက် ဝိတိုရိယတပ်ရင်း တပ်ရင်းမှူးက The Mindat Post ကို ပြောပါတယ်။

 

“လက်နက်ကြီးနဲ့ ပစ်တာမဟုတ်ဘူး၊ ရွာထဲဝင်ပြီး စစ်ရှောင်ပြည်သူတွေကို တွေ့လို့လိုက်ပစ်တာ။ အမျိုးသား သုံးဦးနဲ့ အမျိုးသမီးတစ်ဦး အရိုးထဲထိ ထိထားတာကြောင့် စိုးရိမ်ရပါတယ်” လို့ သူက ပြောပါတယ်။ 

 

ဒဏ်ရာရရှိထားတဲ့ ဒေသခံပြည်သူအများစုက အသက် ၅၅ ကနေ ၇၀ ဝန်းကျင်အရွယ် ပြည်သူတွေဖြစ်ပြီး လက်မောင်းမှာ ကိုယ်စီထိခိုက်ထားတယ်လို့ ဆိုပါတယ်။ စစ်ဘေးရှောင်ပြည်သူတွေ စစ်မြေပြင်နဲ့ အဝေးဆုံးနေရာမှာ သတိဝိရိယနဲ့ ရှောင်ပေးကြဖို့၊ စစ်ကောင်စီတပ်သားတွေရဲ့ စစ်ကြောင်းကို အထူးဂရုစိုက်ကြဖို့လိုအပ်လိမ့်မယ်လို့ ဝိတိုရိယ တပ်ရင်းမှူးက အသိပေး တောင်းဆိုထားပါတယ်။ 

 

စစ် ကောင်စီတပ်က ကန်ပက်လက်မြို့နယ်ဘက်ကို ဦးတည်ပြီး ယော ဒေသက နေ စစ် ကြောင်းထိုး ချီတက်လာခဲ့လို့ ပြည်သူ တွေ အများအပြား ဘေးလွတ်ရာကို ထွက် ပြေးတိမ်း ရှောင် နေကြရတယ်လို့ ကန်ပက်လက်မြို့နယ် ပြည်သူ့အုပ်ချုပ်ရေး အဖွဲ့က လူမှုကွန်ရက် စာမျက်နှာကနေ ဒီဇင်ဘာလ ၁၁ ရက် နေ့ မနက်ပိုင်းမှာ ရေးသားထားပါတယ်။ 

========================

 

📌📌 ၄။ သံအမတ်ကြီး ဦးကျော်မိုးထွန်းကို မြန်မာအမြဲတမ်းကိုယ်စားလှယ်အဖြစ် ဆက်ထားဖို့ ကုလသမဂ္ဂဆုံးဖြတ်

 

သံအမတ်ကြီး ဦးကျော်မိုးထွန်းကို မြန်မာအမြဲတမ်း ကိုယ်စားလှယ်အဖြစ် တစ်နှစ် ဆက်လက်ထားရှိဖို့ကုလသမဂ္ဂ အထွေထွေညီလာခံရဲ့ Credential ကော်မတီကဆုံးဖြတ်လိုက်တယ်လို့ PVTV ရဲ့ ရေးသားချက်အရ သိရပါတယ်။

 

ဒီဇင်ဘာ ၁၂ ရက် ကျင်းပခဲ့တဲ့ ကုလသမဂ္ဂအစည်းအဝေးအတွင်း နိုင်ငံကိုယ်စားပြုမှု သတ်မှတ်တဲ့ Credential ကော်မတီ အစည်းအဝေးကနေ သံအမတ်ကြီး ဦးကျော်မိုးထွန်းကို လက်ရှိ မြန်မာနိုင်ငံကိုယ်စားပြု သံအမတ်ကြီးအတိုင်း ဆက်လက် ထားဖို့ သဘောတူညီခဲ့တာပါ။ ကုလသမဂ္ဂ Credential ကော်မတီမှာ ကုလသမဂ္ဂ လုံခြုံရေးကောင်စီ အမြဲတမ်းအဖွဲ့ဝင် အမေရိကန်၊ ရုရှား၊ တရုတ်တို့ အပါအဝင် နိုင်ငံ ၉ နိုင်ငံပါဝင် ကြပါတယ်။

 

သံအမတ်ကြီး ဦးကျော်မိုးထွန်းကို ပြီးခဲ့တဲ့ရက်ပိုင်းအတွင်းမှာ ရုရှားနိုင်ငံက ကန့်ကွက်ခဲ့ပေမယ့်လည်းသံအမတ်ကြီး ဦးကျော်မိုးထွန်းကို မြန်မာအမြဲတမ်း ကိုယ်စားလှယ်အဖြစ် တစ်နှစ် ဆက်လက်ထားရှိဖို့ အစည်းအဝေးမှာ ခုလိုဆုံးဖြတ်လိုက်တာဖြစ်တယ်လို့လည်း ဆိုပါတယ်။

#RadioNUGLocalNews

#SpringRevolution